Град Скопје продолжува со акцијата за отстранување на заболените, исушени и накосени тополи од просторот покрај булеварите.

Со акцијата, во оваа фаза, опфатен е булеварот Мито Хаџивасилев Јасмин, на делот спроти АМСМ, каде што треба да се отстранат 40 стебла. На булеварот Теодосиј Гологанов, спроти млечниот ресторан, треба да се исечат 30 стебла, кај Алумина,  20 стебла и кај трговскиот центар Олимпик ќе бидат исечени 30 тополи, се наведува во соопштението од Град Скопје..

Акцијата ќе продолжи и во наредниот период,во градскиот парк и во населбата Топанско поле. Таа има за цел да го заштити здравјето и безбедноста на граѓаните, континуирано ќе се спроведува до 2012 година, при што, 1.400 стебла тополи треба да се отстранат и да се заменат со 2.500 - 4.200 стебла благородни дрвени насади или јасени.

http://netpress.com.mk/vest.asp?id=66590&kategorija=1

Се гради ботаничка градина под Пелистер

Невладината организација „Биосфера“ ги започна работите за изградба на ботаничкиот рај што ќе се простира на 17.500 квадратни метри

Битола - Во пазувите на Баба Планина, на околу двесте метри од последната куќа во брусничко-лавчанската населба во Битола, земјен пат посипан со дробеник од асфалт ќе ве однесе во прегратките на единствената ботаничка градина во Македонија. На површина од 17.500 квадратни метри, невладината организација „Биосфера“ од Битола ги започна работите за изградба на ботаничкиот рај. Чистиот пелистерски воздух, спокојот и прекрасната панорама на Битола од оваа локација, овозможуваат директен контакт со природата. Малата ботаничка градина ќе биде од отворен тип и ќе се гради според европски стандарди. Посетителите ќе можат да ги доживеат растенијата и другите содржини во неа на автентичен начин. Првите години ќе има домашни растенија и посебен дел за лековити и отровни видови растенија. Архитектите, покрај ботаничката градина, предвиделе и градина во која ќе расте разновиден зеленчук карактеристичен за нашето поднебје, бара за одгледување домашни птици, а како особена атракција е осмислена таканаречената градина на чувствата - насади од ароматични растенија ќе ги опиваат посетителите на градината. Ќе можат да ги допрат насадените растенија и да го почувствуваат нивниот мирис, да си наберат сами од билките и да се напијат свежо подготвен чај.

„Идејата за ботаничка градина се роди пред неколку години. Земјиштето што го добивме на подарок беше запуштено и навистина е потребна многу работа за да се адаптира и да се реализира нашата замисла. Планирани се разновидни растенија од ова поднебје. Работата на проектот почна со изградба на амфитеатарот со капацитет од педесетина посетители. Камењата ги добивме од ископувањата во античкиот локалитет Хераклеја Линкестис. Така театарот доби поголема вредност поврзана со нашето културно и историско минато“, раскажува Нешат Аземовски од „Биосфера“.

Активистите на „Биосфера“ го проширија и пристапниот пат што води до градината, изграден за време на Втората светска војна од бугарските војници, а го реконструираа и стариот бунар што се наоѓа на 150 метри од амфитеатарот. „Го обновивме стариот бунар и го нарековме ’бунар на среќата‘. Според кажувањата на мештаните од Потпелистерието, луѓето од селата Лавци и Брусник го користеле за починка по напорната работа во нивите и во овоштарниците. Бунарот ќе го користиме за наводнување на растенијата во ботаничката градина“, дополнува Аземовски.

Христо Димитровски, пензиониран битолски професор по математика, откако случајно ја чул идејата на екологистите од „Биосфера“ за изградба на ботаничка градина, својот имот им го подарил на младите ентузијасти. Им оставил аманет да го облагородат, да го претворат во место за практична настава во природа - за директен контакт со неа и да го остават во наследство на идните генерации. „Тука ми беше сврталиштето, на имотот доаѓав за чист воздух и спокој. Но, воодушевен сум од идејата за ботаничка градина,особено беа одушевени моите деца. Се надевам дека доколу се изгради според плановите на екологистите, ова ќе биде пријатно место за едукација и престој на нашите сограѓани. Местото е идеално за ботаничка градина и се надевам дека многумина ќе помогнат“, вели Димитровски.

Во комплексот на ботаничката градина е предвиден и детски парк. Околу три илјади квадратни метри ќе бидат наменети за спорт и рекреација. Терени за кошарка, ракомет, тенис, мини-голф и сето тоа под дебелите сенки на триесетината оревови дрвја стари неколку децении каде што ќе може да се побегне од летните горештини. Посебно интересна содржина ќе биде т.н. индијанско село, а во него ќе има социјална компонента, велат од „Биосфера“. „Децата кои не ќе можат да одат на летување или зимување тука ќе можат да се дружат, да помагаат во работата на центарот или да учат преку игра и забава. Целиот простор ќе биде така дизајниран да овозможува еднаков пристап и за лицата со посебни потреби“, вели Аземовски.

Во големите планови за ботаничката градина е и „паркот на климатските промени“, каде што ќе бидат промовирани алтернативни извори на енергија, мала ветерница и мала фонтана со пумпа за соларна енергија.

Ботаничката градина во Битола, онака како што е планирана, чини многу пари, велат од „Биосфера“. Досега се потрошени неколку десетици илјади евра, средства што ги обезбеди невладината организација преку проекти и донации. Голем дел од работите се направени со помош на локалната власт и јавните претпријатија. Азамовски вели доколку се заокружи финансиската конструкција, ботаничката градина ќе биде завршена за неколку месеци. (А.Б.)

Иванов ќе гради парк со скулптури

Советот на Град Скопје ја усвои иницијативата на кабинетот на претседателот да се гради Европски парк на Кале, спроти Балканскиот универзитет, во кој амбасадорите ќе поставуваат скулптури на личности од земјите од каде што доаѓаат

Советот на Град Скопје ја усвои иницијативата на кабинетот на претседателот на Република Македонија, Ѓорге Иванов, да се гради Европски парк на Кале, спроти Балканскиот универзитет. Замислата на Иванов е амбасадорите во паркот да поставуваат скулптури на личности од земјите од каде што доаѓаат.

Отворањето паркови стана еден вид помодарство. Црвенковски во Карпош 3 го отвори Паркот на толеранцијата, а Виолета Аларова во Градски парк оформи катче Парк на франкофони. И едниот и другиот не може да се пофалат со изгледот, зашто на моменти изгледаат запуштено. „Паркот на толеранцијата“ требаше да биде поделен на 5 дела, со фонтана, езерце, несекојдневна вегетација, но се' остана пуста желба.

Иницијативата од претседателот Иванов е доставена до Градот од неговиот кабинет на 15 јануари.

„Станува збор за парк во чиј состав амбасадорите на земјите-членки на Европската Унија и нашите соседи ќе може да донираат скулптури на најзначајните личности од државите од каде што доаѓаат“, се вели во дописот. Од Кабинетот сметаат дека на тој начин во еден природен амбиент ќе се промовира европското културно богатство, а ќе се унапредат и пријателските односи меѓу европските земји и Македонија.

Членот на Советот, Александар Ивановски, изрази сомнеж дека и во овој парк ќе се поставуваат антички скулптури, имајќи предвид дека претседателот Иванов е поддржувач на програмата на владејачката ВМРО-ДПМНЕ. Ако се случи тоа, според него, повторно ќе предизвика негативни извештаи од европските институции.

Опозициските советници сметаат дека идејата е целосно нерационална, имајќи предвид дека ќе се трошат дополнителни средства, бидејќи Иванов бара Градот целосно да биде вклучен во реализацијата. Тоа значи да го осмисли и да го уреди партерно, со целата потребна опрема и пешачки патеки. Истовремено апелира наместо да се гради нов, да се искористи Паркот на толеранцијата, кој се наоѓа во Карпош 3, до Воената болница.

Цветни влезови во главниот град

Влезовите на Скопје од автопатиштата годинава ќе се уредуваат хортикултурно, за да се подобри првиот впечаток при доаѓањето во главниот град

Роза Петкова


Довршување на булеварското зеленило, разубавување на главните влезови во Скопје, кај Визбегово, Сарај и кај Маџари, како и реконструкција на првиот и на вториот дел од Градски парк, се дел од активностите на ЈП „Паркови и зеленило“ за годинава. Во нивната програма за работа се предвидува да се подигне ново зеленило на повеќе локации. Тоа се средишните жардиниери на булеварот Јане Сандански, од „Мајчин дом“ до раскрсницата со булеварот Србија, делови од Видое Смилевски-Бато, Св. Климент Охридски и Партизанска, од мостот „Обединети нации“ до Порта Влае. Претпријатието и за годинава најавува дека ќе го обнови и дооформи постојното зеленило во Градски парк, а ќе ги реконструира и зелените парковски површини до булеварите и останатите улици, како и локациите реонски парк „Кале“, „Паркот на толеранцијата“ и кејот на Вардар од двете страни. Екипите ќе се ангажираат да ги уредат и парковите долж булеварите Теодосие Гологанов, Србија, реонскиот парк „Француски гробишта“ со косината под американската амбасада, како и новопланираниот парк на претседателот Ѓорге Иванов, кој е спомнат во програмата како културно-историски парк долж улица Самоилова. Покрај овие, ќе се средуваат парковите на улиците Трета македонска бригада, Илинденска со хелиодромот, Војводина од двете страни од раскрсницата со улица 808 до мостот „Близнак“, АСНОМ од страната на Вардар кај последната автобуска постојка на 5 и на 15 до спортската сала МЗТ, Првомајска и Македонска војска. Нови дрвца со кои ќе се пополнат постојните дрвореди ќе се садат на плоштадот „Македонија“, булеварите Кочо Рацин, Партизанска, Илинденска, Благоја Стефковски, Теодосие Гологанов, Орце Николов, Трета македонска бригада, Јане Сандански, Македонска војска, Србија, Никола Карев на потегот од крстосницата кај касарна „Илинден“ до крстосницата кај пластичарските продавници, потоа Крсте Мисирков, Кузман Јосифовски Питу, Лука Геров и 11 Октомври. Според програмата, канадските тополи ќе се сечат и во текот на 2010 година, и тоа околу 450 стебла. Ќе се негува и зеленилото во кањонот Матка и Зоолошката градина, а претпријатието и годинава го најавува хортикултурниот проект од лани за изработка на цветен грб и знамиња. Покрај ова, „Паркови и зеленило“ имаат задача редовно да ги одржуваат шумските комплекси Водно, Гази Баба и рекреативните центри СРЦ „ Треска“ и СРЦ „Сарај“. Јавните зелени површини за одржување во нивна надлежност се протегаат на вкупна површина од 48.643.940 квадратни метри, од кои градско зеленило се 1.300.000, а вонградско останатите 47.000.000. Во редовно одржување спаѓаат рачното и машинското косење, полевање на тревници и чистење од лисја, собирање трева, окопување и кроење на дрвја и грмушки, фитозаштита, хортикултурно збогатување и други активности. Секојдневното одржување на јавното градско зеленило ќе се врши со пари од сметките за вода, од кои 17,5 проценти одат за оваа намена, додека новото зеленило ќе се подига со пари од буџетот на Град Скопје.

Десетици паднати дрвја и гранки вчера и денеска им направија еден куп проблеми на скопјани блокирајќи им ги автомобилите, улиците и влезовите.

Вчера биле пријавени 14 паднати дрвја и гранки, а до денеска напладне се пријавени 10.

“Снегот е тежок и мокар и може лесно да дојде до кршење на гранките и дрвјата. Претпријатието максимално ги има ангажирано работниците и механизација во расчистување на снегот, но поради големиот број на дрвја во градот не може да стигне да го истресе сите, така што неопходно е и граѓаните самите да се вклучат во расчистувањето, како би се спречиле несакани последици“, велат од “Паркови и зеленило“.

Голем број од паднати дрвјата и скршени гранки утрово низ Скопје можеше да се видат и врз автомобили, при што кај некои е направена и материјална штета.

http://netpress.com.mk/vest.asp?id=69227&kategorija=1