До Луково Поле од Скопје се стигнува само со џип за околу три часа. Иако времето денеска е врнежливо, патувањето почна добро.

Но, така беше само до Мавровското Езеро. Потоа почнува непристапен терен, со тесен и неасфалтиран пат, по кој освен припадниците на Граничната полиција, поминувал само по уште некој шверцер.

Од Маврово до границата со Косово неудобното патување, дури и со полициски џип, трае околу еден час.

Откако поминавме и предел со снег, конечно стигнавме до местото наречено Луково Поле, кое стана актуелно вчера откако Македонија и Косово се договорија тука северниот сосед да го компензира отстапеното кај Дебалде.

На местото се уште стои стариот граничен премин, поставен мостот на реката Црни Камен. Токму по течението на таа река, како и на реката Шерупска која доаѓа од тримеѓето Македонија-Албанија-Косово, оддалечено околу три километри од месноста, била досегашната граница со северниот сосед.

Според плановите правени уште во '80-тите, тука е планирана акумулација Луково Поле од која би се произведувала електрична енергија.

Проектот го актуализираа македонските и косовските власти годинава, но сега, доколку се реализира во целост ќе биде на македонска територија.

Според пресметките, хидроцентралата ќе се гради најмалку 4 години, ќе чини 40 милиони евра, а ќе произведува 114 милиони киловат-часови струја.

На досегашната граница меѓу Македонија и Косово, и македонската и косовската караула во иднина ќе бидат потопени со вода доколку се изгради планираната брана.

Временските услови во месноста многу брзо се менуваат. Иако од досегашната гранична линија до новата граница со џип се стига за неколку минути, таму веќе почна да паѓа град и снег. Помошните граничните камења што ја означуваат новата граница со Косово веќе се поставени, а на нив обележани се и насоките на граничната линија.

Новата граница меѓу Македонија и Косово се наоѓа на надморска височина од 1.616 метри. Со новото разграничување меѓу двете држави, Македонија доби околу 300 метри повеќе.

Со дилемата дали Македонија некогаш ќе ја изгради планираната хидроцентрала и ќе ги искористи новите неколку стотици квадратни метри територија, или таа ќе остане само дел од пуст рид, се вративме во главниот град.