Трговски објекти (општо)

„Карфур“ сака да влезе во Македонија?

Нина Нинеска-Фиданска

Најголемиот европски синџир маркети француски „Карфур“ има интерес да влезе на македонскиот пазар. Оваа информација ја објави порталот „Проперти експрес“. Во веста на порталот се наведува дека „синџирот за малопродажба ’Карфур‘ покажа интерес за влез на српскиот пазар, исто како и на албанскиот и на македонскиот пазар“.

Дека овој трговски француски гигант имал идеја да го прошири својот бизнис во некои од балканските држави каде што досега не е распространет, меѓу кои и во Македонија, за „Утрински весник“ потврдуваат и владини извори, кои бараат да останат анонимни.

Според овие извори, претставници на компанијата „Карфур“ веќе имале остварено контакти со македонски фактори, на кои им ги изложиле своите идеи за влез на македонскиот пазар. Овие владини извори велат и дека, наводно, луѓе на „Карфур“ веќе имале остварено неколку посети на земјава. Но, според нашите соговорници, тоа е работа што е во тек, па засега е рано да се даваат какви било подетални информации.

Инаку, според веб-страницата на овој гигант во областа на трговијата, во 2008 година продажбата преку неговите маркети достигнала 97,6 милијарди евра, што се смета за здрав и солиден раст. За 2008 година компанијата наведува дека имала одличен успех на пазарите во развој. На веб-страницата на компанијата стои дека само минатата година групацијата инвестирала дури 600 милиони евра за пораст на продажбата. „Во последните 40 години групацијата ’Карфур‘ постојано се зголемуваше и стана една од водечките дистрибутивни групации во светот. ’Карфур‘ е втора најголема група за малопродажба во светот и најголема во Европа“, се вели во профилот за оваа групација што е објавен на нејзината веб-страница.

„Карфур“ оперира со четири вида малопродажни објекти, како што се хипермаркети, супермаркети, дисконти и продавници за секојдневни производи.

Моментно групацијата „Карфур“ има над 15.000 продавници. Нејзините најзначајни пазари се поделени на три сегменти, и тоа Европа, Латинска Америка и Азија. Во нив таа е распространета во 33 држави. Над 56 проценти од прометот на групацијата потекнува од маркетите што се надвор од Франција. На веб-страницата на „Карфур“ стои и дека таа гледа силен потенцијал за развој на пазарите во Кина, Бразил, Индонезија, Полска и во Турција.

Инаку, на нашите граѓани маркетите на „Карфур“ им се познати од соседна Грција, но и од други европски градови, како места каде што може да се пазарува за пристојни цени, а кои располагаат со огромен асортиман на производи.

Нови пазари ќе го спасат „Бисер“ од картонски тезги

Граѓаните се незадоволни од грдата слика пред и зад популарниот трговскиот центар, која ја создаваат продавачи што стоката ја нудат на картонски кутии и на чаршафи

Трговскиот центар „Бисер“ во Аеродром со години е заземен од диви продавачи кои на картонски кутии или на распослани чаршафи на земја нудат разновидна стока со непроверен квалитет. Се нуди се' и сешто - пиратски цедиња со најновите светски филмови и компјутерски игри, разна текстилна стока, долна облека, цвеќиња, па дури и детски автомобили на акумулатори. Нерегистрираните трговци го зафаќаат просторот и пред и зад трговскиот, па таму е тешко да се помине, а ги има и на други локации во најурбанизираната општина во Скопје.Граѓаните што живеат во тој дел од градот се незадоволни од инертноста на надлежните институции, кои со години не сакаат да го решат овој проблем.

- Во име на социјалниот мир ништо не се презема. Ја разбирам потребата на луѓето што продаваат разна стока за да заработат некој денар и немам ништо против тоа, но имам против хаосот што го создаваат по плочниците. Стари лица продаваат се' што им дошло под рака, дури и храна. Жално е да се гледа дека ги продаваат и цвеќињата од дворот за да заработат. Дали некој од државните служби зборува за оваа сива економија на улица - вели Васил Цветановски од Аеродром.Тој смета дека местото на овие продавачи им е на пазарите.

За оваа појава и за незадоволството на граѓаните одамна се свесни и надлежните во Општина Аеродром, но решенијата бавно се донесуваат. Градоначалникот Ивица Коневски вели дека се обидува да најде решение и за продавачите и за минувачите. Тој објаснува дека нелегалната продажба на стока од секаков вид и пиратерија е во надлежност на Пазарната инспекција, поради што Општината постојано ги потсетува да ги преземат законските мерки.

- Општината Аеродром има подготвено и стратегија за дислоцирање на дивите пазарџии преку изградба на три нови пазари, кои според деталните урбанистички планови се предвидени на неколку локации. Еден меѓу црквата „Свети Пророк Илија“ и амбулантата Јане Сандански, вториот е зад „Бисер“, а третиот во Горно Лисиче. Проектот за пазарот кај црквата е готов, а за другите два се изработуваат. Трите пазари ќе служат за продажба на овошје, зеленчук, кондиторски производи и слично - велат во одделението за односи со јавност во Општината. Од Државниот пазарен инспекторат известуваат дека во овој период има засилени инспекциски надзори на местата каде што се врши нелегална продажба. Сашо Акимовски, директор во Пазарната инспекција, вели дека активностите ги насочуваат кон контрола.

- Инспекторатот надлежностите ги врши во согласност со законските прописи. Многу е сложена „борбата“ со граѓаните што продаваат стока на црно. Акциите секогаш треба однапред добро да се организираат зашто штом ќе отидеме на терен кај еден продавач, другите веднаш ќе се разбегаат. Единствениот лек за отстранување на овие трговци е инспекторите упорно и континуирано да вршат контрола и да одземаат стока. Тие вообичаено продаваат филмови, текстил, овошје и разна стока. Деновиве во една акција пред „Бисер“ беа одземени 5.000 дивиди-парчиња - вели Акимовски.Тој најавува засилени инспекциски надзори и во следниот период.

Милион евра за три пазари