Основна цел на планот е да се дефинира визијата за идниот развој на одржливиот транспортен систем. Според професорот од техничкиот факултет од Битола Никола Крстановски потребно е да се активираат капацитетите за градење политика за одржлив транспортен систем, а планот треба да послужи при изработка на Генерален урбанистички план и Детални урбанистички планови и сообраќајна студија.

Во планот предвидени се девет мерки меѓу кои се, координирано планирање на намена на земјиште и транспортниот систем, унапредување на јавниот градски патнички превоз, унапредување на велосипедски и пешачки сообраќај, управување со паркирање, мерки за смирување со сообраќајот, воведување на еко такса како мерка за одржлив урбан транспортен систем и управување на товарниот сообраќај.
Крстановски смета дека постои слаба поврзаност меѓу урбанистичкото планирање и сообраќајот, а сообраќајот е директна последица на урбаниот развој.

„Во Скопје градени се цели станбени зони во кои не е предвидена нова сообраќајница или цели трговски комплекси без да се понуди сообраќајно решение“ - вели Крстановски.

Како пример тој го наведе трговскиот центар „Буњаковец“ или пренамената на бројни станбени објекти во продавници или обложувалници каде не е решено паркирањето. Според Крстановски во јавниот градски превоз најбитно е да се одреди категоријата на трасата по која евентуално би поминувал трамвај или метро.

Стручњаците сметаат дека проблем во сообраќајот во Скопје се приградските линии, кои според нив не треба да доаѓаат до Транспортниот центар, туку да има и источен терминал.
Во врска со паркирањето тимот од техничкиот факултет од Битола кој го изработи планот  за одржлив транспортен систем, смета дека треба да се преиспитаат цените и политиката на паркирањето и да се обезбедат максимум паркинг места.

Според нив воведувањето на еко такса во центарот на градот би го намалил сообраќајот за три до пет проценти и би го зголемило патувањето со јавен превоз.

„Преку европската мрежа „Civitas“ и преку проектот „Ренесанса“ разменуваме искуства и знаења со нашите партнери во проектот, правиме промоција на одржливите концепти за мобилност, се со цел развој на нова култура на мобилност во нашите градови. Конкретно, Град Скопје своите намери ги насочува кон проекти фокусирани кон енергетската ефикасност, примена на алтернативни горива, заштита на животната средина и планирање на одржлив транспорт“ - истакна Трајановски.

Според него, преку овој План се очекува да се дефинира визијата за идниот развој на одржливиот транспортен систем во Град Скопје преку предвидување иновативни стратегии и решенија за управување со сообраќајот со цел обезбедување подобри услови за живот на граѓаните.