Спомен куќа на Мајка Тереза

Роза Петкова

Со забрзано темпо деновиве привршува изградбата на спомен-куќата на Мајка Тереза, лоцирана пред Домот на АРМ, која е проект на Министерството за култура. Објектот пред шест месеци почна да го гради фирмата „Гранит“ од Скопје според идејното решение на авторот Вангел Божиновски и на неговиот соработник, архитектот Слободан Арсовски, а надлежните од Министерството го најавуваат свеченото отворање за 30 јануари. - За промоцијата на спомен-домот поканети се видни гости од политичкиот, општествениот и од културниот живот, како и од Редот на сестрите на Мајка Тереза “ информираа од одделението за односи со јавност на Министерството. Куќата ќе има подрум, приземје, два ката и потпокрив и ќе зазема површина од 600 квадратни метри, а уште толку метри се наменети за партерно уредување на околината. Таа претставува трансформација на родната куќа на Агнес Бојаџиу, односно Мајка Тереза, која од профана архитектура се трансформира во молитвен простор. Преку архитектонски изразни средства се претставени светот од детството на Мајка Тереза, нејзиното заминување од Скопје и враќањето на нејзиниот дух во родниот град. Покрај музејскиот простор, објектот содржи и личен молитвен простор на Мајка Тереза со придружни простории, мултимедијален простор за камерни претстави, амфитеатар за поголеми претстави. Ќе се отвори и продавница за сувенири, соба за сестринскиот Ред на милосрдието, покриен традиционален трем со бунар кој се трансформира во аквариум со златни рипки, според бројот на годините на Мајка Тереза, и канцелариски простор. Внатрешното уредување на објектот исто така е направено според проектот на Вангел Божиновски, во соработка со Министерството за култура и со Католичката црква, особено во осмислувањето на верскиот простор. Во куќата ќе се постават реалистични скулптури на Мајка Тереза претставена како сестра на милосрдието, кои се дело на Томе Серафимовски. Објектот ќе содржи и скулптура на Агнес- Гонџа Бојаџиу како десетгодишно девојче и семејството на Никола Бојаџиу од 1920 година, како и апстрактни скулптури во вид на столбови-носачи на објектот, на таткото, мајката, братот и на сестрата на Мајка Тереза. Од Министерството велат дека архитектонскиот израз и употребените материјали се вградени со намера да се претстават високиот квалитет и милениумската традиција на македонското градителство и занаетчиство.

http://www.vreme.com.mk/DesktopDefault.aspx?tabindex=1&tabid=1&EditionID=1592&ArticleID=105165