Повеќе од петнаесетина години името на грчкиот милијардер Кондоминас се поврзува со различни големи инвестициски проекти во земјава, но засега поради различни причини немало реализација на ниту еден од нив

На парцелата каде што некогаш била џамијата треба да никнат Офицерскиот дом и хотел

Ќе биде ли „Бурмали-џамијата“ нова пречка во реализација на намерите на грчкиот милијардер Димитрис Кондоминас да инвестира во Македонија е прашање што неизбежно се наметнува по најавите на дел од Исламската верска заедница дека нема тукутака да дозволат на парцелата на која некогаш се наоѓала џамијата да никнат нов хотел и Офицерскиот дом. Спорната парцела грчкиот магнат ја купи на лицитација во Министерството за транспорт и врски, но доколку дојде до проблематизирање на состојбата, за овој инвеститор Македонија дефинитивно може да стане земја неповолна за вложување.

Повеќе од петнаесетина години името на грчкиот милијардер Кондоминас се поврзува со различни големи инвестициски проекти во земјава, но засега поради различни причини нема реализација на ниту еден од нив. Уште во 1990-тите години тој беше меѓу првите бизнисмени што влегоа во медиумскиот бизнис во земјава како сопственик на телевизијата Алфа, која потоа ја продаде откако оваа ТВ-куќа не доби концесија за емитување на национално ниво.

На домашната јавност, Кондоминас и е познат и како сопственик на телекомуникациската компанија „Космотелко“, која имаше дел од акциите во „Македонски телеком“. Во 2001 година, грчкиот инвеститор беше чекор пред изградба на деловен центар на локација кај базенот „Младост“ во скопската општина Карпош. Тогаш ги доби сите потребни дозволи за почнување на изградбата на центарот познат како „Вилиџ сити“, но изградбата беше одложена на неодредено време поради воената криза. Според неофицијалните информации, овој проект подоцна не се оствари бидејќи во меѓувреме дел од земјиштето каде што требаше да се гради центарот станал предмет на денационализација.

Во 2007 година, Агенцијата за електронски комуникации на фирма на Кондоминас и ја додели првата лиценца за безжични електронски услуги „вајмакс“, но во 2009 година лиценцата беше одземена поради непочитување на договорот од неговата фирма. Во повеќе наврати неговото име беше споменувано и за отворање банка и осигурителна компанија во земјава, но ваквите најави никогаш не се реализираа.

Сега, освен за изградбата на хотел од брендот „Мериот“ и на Офицерскиот дом, Кондоминас неофицијално бил заинтересиран и за инвестиции во енергетскиот сектор во земјава, односно за изградба на мали хидроцентрали. Додека во нашата земја инвестициите на Кондоминас биле полууспешни или од различни причини неостварени, во неговата земја тој важи за еден од најбогатите и најуспешни бизнисмени.

Важи за феномен кога станува збор за осигурителниот сектор во соседна Грција, сопственик е на фирмата „Интерамерикан“, а познат е по своите активности во банкарскиот бизнис, и тоа како сопственик на акции во Алфа банка. Долго време во негова сопственост беше грчката телевизија Алфа пред да и ја продаде на германската Ер-те-ел. Тој е сопственик на синџирот кина „Вилиџ“ и на синџир супермаркети за органска храна, како и на многу други бизниси.