Концесија на автопатишта

Владата ќе им плати речиси 200 милиони евра за субвенции на идните концесионери на патишта од Коридорот 8, кои во два пакета ќе ги понуди под концесија на 35 години

Владата ќе плати речиси 200 милиони евра наредните неколку години како субвенции за идните концесионери, кои ќе управуваат со македонските патишта долж Коридорот 8 наредните 35 години. Концесионерите, според пресметките што ги објави една национална телевизија, покрај државните субвенции, за грижата за нашите патишта ќе наплатат најмалку двојно повеќе од вложените пари.

Владата одлучи патиштата долж Коридорот 8 да ги даде под концесија на 35 години со обврска идните концесионери да ги доизградат патиштата во наредните 8 години.

Првиот пакет или Источна концесија во должина од 177,5 км ги опфаќа патните правци Крива Паланка - Романовце, Кочани - Штип, Миладиновци - Штип, постојната обиколница Скопје, постојната делница Миладиновци - Скопје.

Вториот пакет или Западна концесија е во должина од 196 км и ги опфаќа патните правци Стенковец - Блаце, Гостивар - Ќафасан, Требеништа - Охрид и Подмоле - Струга.

Тендерот на кој ќе се бара концесионер ќе биде распишан овој месец. Рокот во кој концесионерите ќе треба да ги изградат патиштата изнесува 8 години, а концесијата ќе трае 35 години. Експертската анализа на проектот покажала дека, заради краткиот рок за градба Владата во првите години ќе треба да им исплаќа субвенции на идните концесионери. Вкупната патна површина изнесува околу 370 километри, од кои околу 90 километри се веќе изградени. Концесионерите треба да изградат околу 280 километри пат и да ги одржуваат реконструираат патиштата за кои ќе можат да наплатуваат патарина. За првиот пакет вкупните трошоци на инвеститорот се очекува да изнесуваат 434 милиони евра. Според објавените неофицијални податоци, концесионерот би имал нето приходи од 844 милиони евра. Приходите на Владата за целиот период би изнесувале 76 милиони евра, а во текот на првите години таа ќе исплати субвенции во висина од 121 милион евра.

Вториот пакет има вредност од 558 милиони евра, а нето приходот на концесионерот ќе изнесува 1,5 милијарди евра. Од овој колач, Владата ќе добие само 183 милиони евра, а како помош на концесионерот во првите години ќе му исплати 72 милиони евра.

Во Министерството за транспорт, кое го водеше проектот за концесија на патиштата, ниту ги потврдуваат ниту ги демантираат економските анализи, кои ги објави националната телевизија. Од таму за одговори на прашањата упатуваат кај Агенцијата за патишта. Од Агенцијата топката ја префрлаат назад во Министерството транспорт како единствени носители на проектот за концесија на патиштата. Министерството не сакаше да одговори дали концесионерот ќе може да гради нови наплатни пунктови за патна такса долж Коридорот 8 и според кои критериуми.

Со концесијата за патиштата, државата ги изнајмува и патарините долж Коридорот 8, кои годишно носат приходи од околу 10 милиони евра. За 35 години, државата се откажува од најмалку 350 милиони евра. Приближно иста е сумата (10 милиони евра), која годишно ја носат и петте патарини долж Коридорот 10, кои ќе се даваат под концесија без обврска идниот концесионер да ги одржува патиштата. Вкупните приходи од постојните патарини во наредните 35 години би требало да изнесуваат речиси 700 милиони евра.

Според пресметките, концесионерите за двата пакета патишта што ќе се нудат под концесија за 35 години треба да вложат околу 1 милијарда евра и да остварат нето-приходи од 2,3 милијарди евра.

Според владината одлука, објавена во „Службен весник“ државата може да му плаќа надомест на концесионерот и заради постигнување социјално прифатлива цена на услугите при вршење на концесијата. Односно за да ја задржи постојната цена на патната такса низ земјава.

Според одлуката објавена во Службен весник, концесионерот ќе остварува и други приходи: „од наплата на патарина, од надомест за прекумерно користење на пат, од вонреден превоз и за штетата сторена на патот и објекти на патот“.

Економската оправданост од проектот владата го гледа во попрофесионална услуга, изедначувањето на економскиот развој и во бенефициите кои ќе ги добијат граѓаните.

„Економските и социјални придобивки ќе се состојат и од директни придобивки за граѓаните, кои ќе произлезат од намалување на времето на патување, зголемување на безбедноста во сообраќајот и намалување на трошоците за одржување на возилата“, е посочено во образложението на Владата.

Александра Филиповска

Ќе остане ли обиколницата без возила?

Ниеден град во Европа нема кружен прстен на кој се наплатува патарина