Железници (општо)

Ќе се редуцира железничкиот патнички сообраќај

Наташа Стојановска	Коментари (0)

Од транспортното претпријатие во железницата потврдуваат дека експертски тимови ја подготвиле анализата, на кои релации треба да се намали бројот на возовите.

Од министерството за транспорт се чека одобрување дали, колку и на кои релации ќе се редуцираат возовите..Ваквиот потег железницата го правда со намалениот број на патници во лето и со намерата да ги скуси трошоците.

Од друга страна железницата се уште не ги добила парите што владата ги вети за субвенционирање на патничкиот сообраќај. Лани власта најави два милиони евра од буџетот за оваа намена. Според познавачите железницата е во лоша кондиција - во делот на инфраструктурата, состојбите на возовите но исто така и во тешка финансиска ситуација.

Токму поради ова раководството според информации на А1 размислувало дел од вработените да ги прати на принуден одмор - но потоа се донела одлука да се скуси дел од платата - ставката квалитет во работењето е намалена за 10 проценти.

Финансиската ситуација во железницата дополнително се искомплицира по поделбата на МЖ на две фирми Транспорт што ја финансира и другата компанија - Инфраструктура. Формалните односи меѓу нив не се регулирани поради што веќе извесно време има незадоволство кај вработените.

Последниот таков случај беше минатата недела кога луѓето од инфраструктура ги запреа возовите, лути оти дознале дека плата ќе добијат само нивните колеги од транспорт. Ситуацијата беше решена за кратко - но вработените и натаму стравуваат дека тоа е краткорочно решение а проблемите и натаму ќе се случуваат поради нарушената финансиската позиција на компанијата.