Реставрациja / Реконструкциja

Ќе се заштитува Симиќева кула

Музејот од Кратово изработи проект и ги почна активностите за заштита на Симиќевата кула, за која се смета дека е стара 4-5 века. Предвидено е објектот да го зачува надворешниот лик, односно ќе се работи на внатрешно фасадирање, санирање на покривот, замена на прозорците и вратите, како и поставување нова електроинсталација во внатрешноста на кулата.За градежните работи и набавката на потребните елементи, се обезбедени 808.000 денари, од кои половина милион се од Министерството за култура, а другите 308.000 денари ги донира амбасадата на Норвешка.

Симиќева кула е градена на квадратна основа, со димензии 8 на 8 метри. Ѕидовите во приземјето се дебели два метра, а ѕидот од вториот и третиот кат е дебел еден метар. Со трикатната конструкција Симиќевата кула е висока 22 метра.

- И покрај повеќевековното опстојување кулата има добра статика, но поради дотраеноста на покривот, последниве 30-ина години внатрешноста прокиснува. Долго е запуштена - изјави Драган Георгиевски, директор на Музејот во Кратово.

Симиќева кула, една од седумте зачувани средновековни градби, е посебен објект, опфатен со Законот за заштитата на културното и историското наследство. Иако сопственик на кратовските средновековни кули е Република Македонија, од 2008 година Симиќевата и Саат-кулата, за афирмација и развој на туризмот, му се доделени на Музејот од Кратово на десетгодишно користење.

Со турски пари ќе се реконструираат османлиски објекти во Тетово

Арабати баба теќе ќе прерасне во мултимедијален конгресен центар. Дел од мегапроектот за враќање на сјајот на Теќето веќе е подготвен, а турската фондација ИБЦ пројавила интерес да го финансира. Ова е само една од програмските активности на Националниот конзерваторски центар кои ќе се реализираат годинава во Тетово. Директорот Бехиџудин Шехапи, во Тетово ги претстави активностите на Националниот конзерваторски центар изминативе четири години и плановите за годинава. Со видеопрезентацијата што се одржа во тетовскиот амам беше претставен и проектот за адаптација на Теќето.

Изминативе четири години извршена е конзервација на внатрешните ѕидови на Шарена џамија, покривот на Беговата куќа, конзервирана е внатрешноста на црквата „Св. Богородица“ во Лешок, извршени се ископувања и истражувања на тетовското кале Балтепе, конзервирана и реставрирана е влезната порта на Арабати баба теќе и подготвени се елаборати за валоризација на три куќи, конзервацијата и реставрацијата.

- Позначајни активности се конзервацијата и реставрацијата на внатрешните ѕидови на Арабати баба теќе и негово адаптирање во мултимедијален центар, реконструкција на Саат-кулата и Мостот на казазите, конзервација на Калето и уште неколку други зафати на објекти во градот и околината - рече Шехапи.

Реконструкцијата на Саат-кулата и на Мостот на казазите, кои биле срушени во минатиот век, ќе ја финансира турскиот град Коња со кој Тетово има воспоставено блиски односи. Исто така, турски пари ќе бидат вложени и во адаптацијата на Арабати баба теќе, кој е планирано да прерасне во мултимедијален конгресен центар. Единствена пречка за реализација на овој проект е имотно-правниот спор што го водат Исламската верска заедница и Бектешката заедница. На видеопрезентација на досегашните активностите за заштита и конзервација на културно-историското наследство во Тетово присуствуваше и турска новинарска екипа. Според Шехапи, средствата за сите активности биле од Министерството за култура или донации од странци.

Со донација од американската амбасада, во периодот од 2005 до 2007 година, тетовскиот амам, кој е изграден кон крајот на 15 век, беше адаптиран во уметничка галерија. Во Тетово има 50 евидентирани споменици на културата. Цркви има четири, три се исламски објекти, 18 и' припаѓаат на староградската архитектура, 14 се споменици и спомен-обележја од НОБ и 11 археолошки споменици на културата.

Се распаѓа портата на Учителската школа

Дел од резбата беше украдена од хулигани, а еден дел се одлепил и пад­нал. - Портата на Учителската школа беше обновена пред две години