Еднонасочните улици се лек за сообраќајниот метеж

Општината Карпош засега има најфункционален еднонасочен систем, но и другите општини имаат позитивно искуство со ваквите улици, чиј единствен недостаток е можноста за возење со поголема брзина

Новиот режим ќе значи и поголема безбедност за пешаците

Растоварување на сообраќајот, обезбедување поголем простор за паркирање, поголем капацитет за вклучување на крстосница, зголемување на безбедноста на пешаците и на возачите се предностите на еднонасочните улици. Единствен недостаток е што возачите може да возат со поголема брзина, велат познавачите. Теоретски, еднонасочниот систем треба да е добро организиран, да има една улица во една насока, друга во спротивна и уште една улица што ќе ги поврзува овие две и треба да е двонасочна.
Локацијата и геометријата на уличната мрежа се клучни при воведувањето еднонасочен систем.

- Пред да се воведе еднонасочен систем потребно е да се направат испитувања и анализи дали ваквиот систем ќе го подобри или влоши сообраќајот. Еве, во Центар, улиците Мито Хаџивасилев-Јасмин и Железничка се еднонасочни, а се поврзани со булеварот Македонија, кој е двонасочен. Овој систем одлично функционира. Исто така и еднонасочниот систем во општината Карпош што е воведен по сервисните улички супер функционира - ни изјави Јован Христовски, сообраќаен инженер.

Надлежните од градот велат дека сообраќајот се уредува во согласност со сообраќајни студии, каде што секоја студија предвидува решение во согласност со сообраќајните потреби.

- Досега само на мал број сообраќајници има предвидено еднонасочен сообраќај, најчесто на дел од нив, како во случајот со Благоја Стефковски, која само во почетокот е еднонасочна, до надвозникот. Еднонасочен сообраќај од пофреквентните улица има на Мито Хаџивасилев-Јасмин во Центар. Овој режим се воспостави за растоварување на сообраќајниот метеж што се создаваше на овој потег - соопштија од градот.

Самата процедура за воведување еднонасочен сообраќај подразбира и добивање на позитивно мислење од МВР, по кое согласност дава и градот. Во моментов општината Карпош има најфункционален еднонасочен систем, каде што целиот простор меѓу булеварите Илинден и Партизански одреди е речиси решен на ваков начин.

- Еднонасочниот сообраќаен режим е корисен затоа што придонесува за растоварување на сообраќајот и обезбедува дополнителни паркинг-места на едната страна од лентата. Ние подготвуваме елаборати за еднонасочен сообраќај онаму каде што цениме дека е неопходно и потребно, како и по барање на граѓаните, доколку постојат услови за тоа - ни изјавија од општината Карпош.

И општината Центар во иднина планира да воведе ново сообраќајно решение со еднонасочни улици. Од неодамна улицата 29 Ноември е направена еднонасочна, а наскоро тоа ќе се случи и со повеќе други улици.

- Порачавме проект за еднонасочен сообраќај, кој планираме да зафаќа малку пошироко подрачје, но во прво време тоа да биде улицата Ленинова. Со градот изработивме ново сообраќајно решение за Дебар Маало 1 и Дебар Маало 2, со кое треба да се воведе еднонасочен сообраќај, кој заедно со зонското паркирање ќе го растовари сообраќајот и ќе ја зголеми безбедноста на пешаците и на возачите.
Разгледувањето на проектот е во завршна фаза и очекуваме многу скоро да го добиеме мислењето, за потоа да побараме и одобрување од градот - вели Јовица Ацковски, портпарол на општината Центар.

Во општината Кисела Вода преовладуваат двонасочните улици. Сообраќаен режим со еднонасочни улици е воведен на Вера Јоциќ, Иван Козаров, дел од Сава Ковачевиќ и неколку накрсни сервисни улици.

- Според досегашното искуство, еднонасочниот режим е подобар и обезбедува поголема проточност на возила. Иако граѓаните во почетокот имаа мали забелешки во однос на воведувањето на еднонасочниот сообраќај на горенаведените улици, во моментов нивните реакции се доста позитивни, бидејќи, според нив, еднонасочните улици се подобро решение за избегнување на сообраќајниот метеж - ни изјави Марјан Спасески, портпарол на општината Кисела Вода.