Изостана парадата за портата на независноста

Екипите на градежното претпријатие „Гранит“ веќе неколку дена молчешкум работат на изградбата на триумфалната капија, за која ниту премиерот фрли лопата за среќа, а ниту, пак, дедо Стефан ја освети

Првата лопата за триумфаланта порта помина во тајност

Изминативе неколку години неизбежен тренд во градов е при поставување една обична тула, канализациска цевка, детско игралиште, премиерот Никола Груевски да ја фрли првата лопата, а г.г. Стефан да ја отпее градбата. Деновиве оваа процедура изостана, и тоа кај најоспоруваниот објект од проектот „Скопје 2014“ - триумфалната или портата на независноста. Наместо помпезно фрлање лопати, осветување на триумфот, говори и што сé не што оди во вакви пригоди, екипите на „Гранит“ молчешкум ги почнаа градежните работи на триумфалната порта.

Од која причина се одбегна официјалното поставување на камен-темелникот на портата, капиталниот објект со чија изградба се гордеат и Министерството за култура и Владата, не се знае. Надлежните за изградбата на овој објект не сакаа да коментираат дали причината за ваквата постапка е евентуалното избегнувањето на реакциите на скопјани, кои се против изградбата на овој објект. И така триумфалната порта, која ќе го симболизира чинот на стекнувањето на независноста на Македонија, остана сама на плоштадот „Пела“.
Од Министерството за култура вчера потврдија дека портата се гради, но не сакаа да објаснат зошто немаше официјално поставување на камен-темелникот.

Триумфалната порта е еден од најнепосакуваните објекти во проектот „Скопје 2014“. Летово на јавната анкета за последните измени на деталниот урбанистички план „Мал ринг“ имаше стотина забелешки, во кои се бараше портата на независноста да не се гради, затоа што таков објект не е својствен за нашата култура и традиција. Скопјани и стручната јавност објектот го нарекуваат и порта на срамот.

Испитувањата на земјиштето каде што се гради портата почнаа пролетва, градилиштето се огради во ноември, кога и официјално „Гранит“ беше избран да го гради објектот. Потоа уследи поместувањето на подземната водоводна и канализациска инсталација. Портата, според најавите на надлежните од општината Центар, треба да биде готова до 8 септември, во чест на 20-годишнината од независноста. Идејното решение на портата го направи вајарката Валентина Стефановска, авторка и на споменикот на Александар Македонски што ќе се постави на плоштадот „Македонија“. И фасадата од портата ќе има релјефи со ликови и со настани од историјата на македонската борба за независност. Министерството за култура за овој објект одвои 4 милиони евра.

http://novamakedonija.com.mk/NewsDetal.asp?vest=12911102191&id=14&prilog=0&setIzdanie=22193