Образовни институции (општо)

Радовиш ги обновува училиштата

РАДОВИШ - Интензивно се доградува основното училиште „Никола Карев“ во Радовиш, кое пред речиси четири години изгоре во пожар. За обновувањето се обезбедени 16 милиони денари од Министерството за образование. Тоа значи дека радовишките основци годинава ќе имаат одлични услови за учење.

Истовремено, со посебен градежен зафат ќе се направи физичка поделба на двете основни училишта „Никола Карев“ и „Крсте Петков Мисирков“, кои се сместени во единствена зграда. „Во меѓувреме го доградивме и основното училиште во близина на храмот ‘Света Троица‘. Сега сите одделенија со вкупно 800 основци од ‘Крсте Петков Мисирков‘ се селат во ова училиште, додека 1.200 ученици од ‘Никола Карев‘ остануваат во стариот, реновиран објект“, изјави градоначалникот на Радовиш, Роберт Велков.

Голем проблем со просторни услови има основното училиште во радовишкото село Злеово. Условите за учење се лоши, иако часови посетуваат над 300 основци, а има и една гимназиска паралелка. Учениците во Злеово доаѓаат од повеќе села. На група основци од Радичево, струмичкото село Злеово им е најблиското место каде што можат да одат на училиште.

Општинската администрација преговора со Министерството за образование за финансиска поддршка и на овој проект. Градоначалникот Велков вели дека веќе добиле позитивен одговор според кој, обновата на училиштето ќе почне оваа пролет. (И.Б.)

Катедрата на турски јазик ослободена од комуналии