Возен ред

Со стартот на новата учебна година ЈП "Македонски железници" повторно ги врати на редовна линија возовите што беа укинати во изминативе два месеца. Така, патничките возови што на почетокот на јуни беа укинати, повторно сообраќаат кон Велес, Скопје, Кочани, Гевгелија и Битола. Овој чекор на јавното претпријатие го поздравија повеќе од 600 работници од Велес, но и од Чашка, Богомила, Градско, Лозово кој секојдневно патуваат на работа во Скопје. Бројот на патниците овие денови, значително се зголеми, а тој ќе биде уште поголем со почетокот на студентската година кога од Велес на факултетите во Скопје секојдневно ќе патуваат од 400 до 600 студенти и средношколци. Во редовен сообраќај од Велес кон Скопје се возовите во 14 часот и 26 минути, потоа во 15 часот и 23 минути, 17 часот и 35 минути и последен е оној во 20 часот и 21 минута. Од Скопје кон Велес, пак, повторно се воведени патничките возови кој тргнуваат во утринските часови и тоа во 2 часот и 22 минути и 6 часот и 9 минути, како и оној попладне во 13 часот и 20 минути, а последен е во 18часот и 15 минути.

Кон Гевгелија сообраќа патничкиот воз во 7 часот и 5 минути, а кон Битола возот во 19 часот и 12 минути. Патниците кон Штип и Кочани повторно можат да го користат патничкиот воз кој од Велес тргнува во 3 часот наутро и 10 минути. Според Гордана Трајкова, вработена во ЈП "Македонски железници", со новиот возен ред велешани нема да имаат веќе проблеми со патувањата за Скопје, но и кон другите дестинации во земјава. За средношколецот Славчо Тодоровски за разлика од автобуските билети, поволни се месечните карти што им ги нуди железницата, бидејќи на тој начин многу поевтино стигнуваат до Скопје и се враќаат истиот ден назад во Велес.