Езера и распаднат асфалт на последна „23“ во Капиштец

Додека автобусите се заглавуваат во кратерите на стојалиштето, а патниците чекаат среде вода, Градот и Центар си ја додаваат топката со ингеренции

БОЈАН ШАШЕВСКИ

На само дваесетина метри од Цветниот пазар, веднаш зад реконструираниот нов паркинг спроти Дом на печат, последната станица на автобусот „23“ во Капиштец веќе долги години го нагрдува централното подрачје. Насекаде кратери по асфалтот, рабници и тротоари што се распаѓаат, а кога врне дупките се полнат со вода, па локацијата тоне во нечистотија, песок, кал. Понекогаш автобусите буквално се заглавуваат во дупките. Верглаат во место полни со патници.

Поради нерамниот терен и езерата со вода патниците мораат да чекаат автобус по ситните тревни површини или на паркингот, а кога врне да се кријат под малата стреа на билетарницата. Дел за да не накиснат бегаат до најблиските објекти. Кој како ќе се снајде. Нема ниту една клупа или натстрешница, никакво место за чекање. Иако, автобуската станица дневно опслужува стотици граѓани.

„Сосема е нелогично и неразумно ваква слика да се случува на една од најпознатите градски автобуски локации. Секој ја знае ’последна 23’. Живеам тука во близина, досега имаше ретки иницијативи за реконструкција на теренот, но никој не излезе со конкретен план за уредување, за одржување. Останаа нерамнини, нечистотија, распаднат асфалт со дупки...“, вели Мите Радиќ од Капиштец. 

Освен автобусите „23“ на приватните превозници „Слобода превоз“, на оваа станица застануваат и тргнуваат и црвените возила на ЈСП со броевите „7б“, „33“, „44“, „57а“. Од билетарница на јавното претпријатие велат дека проблемот трае со години и, практично, го забавува нормалното функционирање на автобускиот сообраќај. 

„Пред некој ден врнеше и бидејќи патниците немаат каде да чекаат, почнаа да се пикаат под стреата на билетарницата. Ја окупираа и не можеше човек да се пробие и да си купи карта. Немаше место за сите, па дваесетина претрчаа до сервисот за миење возила. Таму стоеја заедно со вработените во сервисот и чекаа да преврне или да им дојде превозот до дома. Да не зборуваме колку автобусите имаат проблем со дупките“, вели вработениот во билетарницата на ЈСП. 

Директорот на приватното автобуско претпријатие „Слобода превоз“, Ленин Јовановски, укажува дека и покрај што не е во нивна надлежност, тие два-три пати интервенирале и со сопствени средства ги пополнувале дупките на асфалтот. 

„Реагиравме, но повторно се прават дупки. Тоа е стар асфалт, треба комплетно преуредување на целиот терен. Конечно да се уреди како што треба. Од корен. Поради ваквите околности понекогаш се случува автобусите да доцнат“, вели Јовановски.

Од ЈСП, пак, велат дека Секторот за урбанизам од Град Скопје е задолжен за тоа прашање, односно за реконструкција на локацијата. Ги прашавме Општина Центар и Град Скопје околу можните иницијативи за реконструкција на асфалтот, тротоарите, рабниците на оваа автобуска станица, но тие си ја префрлија одговорноста. Од Центар кратко одговорија дека за тоа е надлежен Градот, а од таму, пак, потенцираат дека, иако се работи за простор кој во моментов се користи за автобуска постојка, тој за одржување во целост е во рацете на Општината!