Скопски сообраќај (општо)

ЗАГЛАВЕНИ НЕКОЛКУ СООБРАЌАЈНИ ПРОЕКТИ

Доцни проширувањето на „Илинденска“

Градоначалникот Трифун Костовски е лут поради блокадите од централната власт и од општините, кои не му издаваат документи за градба

Илинденска ќе биде булевар од фонтаната „Лотос“ до раскрсницата кај Воената болница

Проширувањето на булеварите Илинден и Гоце Делчев кај Судската палата, како и изградбата на клучките кај Бит-пазар и кај Тутунски комбинат ќе доцнат бидејќи немаме добиено сообраќајно решение од Министерството за внатрешни работи и градежна согласност од општините, вели скопскиот градоначалник Трифун Костовски. Градоначалникот е лут поради блокадите од централната власт и од општините, кои - како што вели - не ги следат барањата на граѓаните. Од МВР велат дека Градот поднел барање за сообраќајно решение само за булеварите Илинден и Гоце Делчев. Ние ги имаме парите за изградба, кои се наменски и можат да се користат веднаш. Но, од чисто бирократски причини не можеме да кажеме кога би започнале градежните работи. Добивањето сообраќајно решение од МВР е една од пречките што во моментов многу не' кочи. Немаме ниту градежна согласност за клучката кај хотелот „Континентал“, која се гради веќе една година. Нема согласност од Општина Центар за проширување на булеварот „Илинден“ и за проширување на клучката кај Тутунски комбинат - вели Костовски.Според градоначалникот, овие институции се обврзани да соработуваат една со друга и не смее да ја кочат постапката.

- Кога гледам како градоначалниците се ставаат на тапет, морам да кажам дека јас сум претпазлив да преземам обврска без да ги задоволам сите законски прописи. Тоа значи дека некои проекти ќе почекаат - вели Костовски. Од МВР велат дека Градот за дел од најавените проекти нема поднесено барање за сообраќајно решение. Досега стигнаа само барања за сообраќајно решение за проширување на булеварот Илинден и пред неколку дена за булеварот Гоце Делчев. За вториот проект во истиот ден позитивно е одговорено. Решението за булеварот Илинден е вратено на доработка и усогласување поради некои интервенции и потребни дополнувања. Се надеваме дека и тоа наскоро ќе биде решено - вели Борче Пешевски, портпарол во МВР.Според Секторот за урбанизам на Општина Центар, не можат да бидат издадени решение за локациски услови и одобрение за проширување на булеварот Илинден бидејќи поднесените идејни проекти не се во согласност со трите детаљни урбанистички плана. Од Општината велат дека за клучката кај Тутунски комбинат досега не пристигнало барање до Секторот за урбанизам за издавање на градежна согласност.Од Општина Карпош велат дека Градот на 27 јули поднел барање за извод од урбанистичкиот планот, со што ја започнал постапката за добивање на потребната документација.Според планот на Градот, Илинденска ќе биде булевар од фонтаната „Лотос“ до раскрсницата кај Воената болница. Изградбата на клучката кај Тутунски комбинат и проширувањето на булеварот Гоце Делчев се во функција на нормално функционирање на клучката кај хотелот „Континентал“. Со клучката кај Бит-пазар ќе се избегне секое вртење влево и нема да има потреба од семафори. Сите четири проекти Градот ќе го чинат 3,8 милиони евра.

Анела Петрова