Спомен куќа на Мајка Тереза

На церемонијата на свеченото пуштање во употреба закажана за 30 јануари ќе присуствуваат делегации од Ватикан, Калкута, министри од многу држави, а ходочастија и посети најавија сестрите од Милосрдието на љубовта

Изградбата на спомен-домот на Мајка Тереза е на крај и свеченото пуштање во употреба е закажано за 30 јануари. На церемонијата ќе присуствуваат високи странски делегации министри од многу држави, претставници од Ватикан, од Калкута, а ходочастија и посети најавија сестрите од Милосрдието на љубовта, редот на Мајка Тереза. Преседателот на Граѓанската асоцијација "Мајка Тереза" Стојан Тренчевски, пак, деновиве ќе отпатува во Калкута за лично да ја покани и да ја донесе во Скопје и следбеничката на Мајка Тереза, сестра Нирмала.
- Денот на пуштањето во употреба на спомен-домот на Мајка Тереза е навистина голем ден за сите што го почитуваат ликот и делото на големата хуманитарка. Особено што таа е изградена на свето место, врз темелите на некогашната католичка црква "Пресвето срце Исусово", токму на местото каде Гонџа Бојаџиу добила благослов да тргне во хуманитарните мисии низ светот - вели Тренчевски кој е познат истражувач и хроничар на животот и делото на Мајка Тереза и нејзин биограф. Иницијативата за изградба на спомен-домот е на Граѓанската асоцијација, а реализацијата на проектот, потпишан од познатиот архитект Вангел Божиновски, го финансираше Владата преку Министерството за култура. Чини околу два милиони евра.

Новата градба е интересен спој на неколку архитектонски правци. Преку едноставна куќа од традиционалната македонска архитектура со приземје, кат и потпокрив, која по вертикала се трансформира во духовно светилиште со интересни витражни решенија и елементи. Највисоката точка на куќата е капелата на Мајка Тереза. Дворот пре куќата го отсликува нејзиното време, има мала градина, бунар со 88 златни рипки кои ги симболизираат 88-те години на Блажената, исто толку бели гулаби на фасадата, патеки, порта...
- Спомен домот претставува духовно место, светилиште, симбол на љубовта и хуманоста, но и нова туристичка атракција за Скопје. Секој што ќе го посети музејот, ќе може да го прочита животот на големата хуманитарка, вели Тренчевски.

Четири камени фонтани ќе се разлеваат на улицата Македонија, покрај објектот кој треба да биде пуштен во употреба на 30 јануари

Градежната оператива на „Гранит“ партерно го уредува и светилиштето, со вкопување на монументалната статуа на Мајка Тереза

Со уредување на внатрешните изложбени простори, кои ќе го претставуваат нејзиниот дел од животот, минат во родното Скопје, како и хуманата мисија, привршува изградбата на Спомен-домот на Мајка Тереза, во центарот на Скопје. Свеченото пуштање во употреба е планирано за 30 јануари. Како што информира Стојан Тренчевски, претседател на граѓанската асоцијација „Скопјанката Мајка Тереза“, која е иницијатор на изградбата на објектот, градежната оператива на „Гранит“ партерно го уредува и светилиштето, со вкопување на монументалната статуа на Мајка Тереза во дворот на куќата, кој е означен со стилизираната македонска порта. На портата ќе биде испишано името на улицата на која била родната куќа на Гонџа Бојаџиу - „Поп-Кочина 14“.

Во заднината на куќата е уреден отворен амфитеатар, каде што ќе може да се одржуваат предавања, концерти, рецитали, уметнички и духовни претставувања. Според проектот на Вангел Божиновски, светилиштето се извишува спрема небото.

- Божјата светлина и стилизираниот филигран, кои ја чинат исконската и духовната древност се култно место. Во него ќе бидат поставени статуа и молитвениот портрет на Мајка Тереза. Духовните црковни реквизити веќе се обезбедени, а длаборезот што што го изработуваат охридските резбари се подготвува за благословот на црковните достоинственици и богољуби, кои масовно ќе присуствуваат на чествувањето на 30 јануари - вели Божиновски.

Владата издвои два милиона евра за изградба на Спомен-домот на Мајка Тереза. Пригодното издание и дивидито на македонски и на англиски јазик, посветени на големата хуманистка од авторот Стојан Тренчевски, на денот на пуштањето во употреба на спомен-домот на Мајка Тереза, ќе бидат промовирани во Скопје, Ватикан и во Калкута. Книгата и получасовниот документарен филм се поддржани од Министерството за култура.

Институтот за социјална работа именуван по хуманистката

Институтот за социјална работа и социјална политика на Филозофскиот факултет при скопскиот универзитет ќе се вика „Мајка Тереза“, одлучил наставно-научниот совет на овој факултет. По овој повод, на Филозофскиот факултет ќе се одржи пригодна свеченост на која ќе беседат бискупот д-р Киро Стојанов, деканот проф. д-р Трајан Гоцевски и претседателот на асоцијацијата „Скопјанката Мајка Тереза“, Стојан Тренчевски. Ќе биде прикажан и филмот за младоста на идната светица Мајка Тереза во Скопје.

На скопскиот Филозофски факултет е одбранет и првиот докторат во светот, посветен на Мајка Тереза, од страна на Јапонката д-р Марихиро Кудо, кој наскоро ќе биде објавен и на македонски јазик.