Булевар Борис Трајковски (Првомајска)

Со реконструкција на водоводната мрежа на улиците „Балканска“, „Есенинова“, „Жил Верн“, „Трпе Петровски“ и „Јордан Филиповски“ во општина Кисела Вода, ЈП „Водовод и канализација“ од денеска почна со најавените реконструкции кои годинава планираме да бидат во висина од 120 милиони денари.

Ова денеска го изјави директорот на ЈП „Водовод и канализација“, Сашо Лазаревски кој присуствуваше на промоцијата на новата опрема за ЈП „Дрисла“.

Лазраевски информира дека се работи за реконструкција на стара, азбестна и  поцинкувана водоводна мрежа во должина од 770 метри. Инвеститор на проектот е ЈП „Водовод и канализација“ и тој ќе чини околу 5,5 милиони денари.

- Со општина Кисела Вода се договоривме ние да ги извршуваме сите реконструкции на водоводната мрежа, а тие да го вршат асфалтирањето за да може да опфатиме што е можно поголем број улици во секоја скопска општина, изјави Лазраевски и потенцира дека реконструкцијата се врши со цел да се намали загубата на вода.

Тој најави дека реконструкцијата на водоводната мрежа ќе продолжи во општините Центар, Карпош, Ѓорче Петров, Гази Баба и Аеродром.

Градоначалникот на општина Кисела Вода Марјан Ѓорчев изјави дека соработката со Град Скопје и со јавните претпријатија, посебно со „Водовод и канализација“ е на многу високо ниво.

- Ние имаме доста руинирана водоводна мрежа. Замената на водоводните цевки на улиците „Жил Верн“, „Есенинова“ и „Трпе Петрески“ и на уште две улици ќе значи многу, рече Ѓорчев и изрази надеж дека тоа ќе го подобри квалитетот на живот на граѓаните од оваа општина.

Одговарајќи на новинарски прашања, Ѓорчев рече дека во моментов, заедно со Град Скопје најмногу се фокусирани на булеварот „Првомајска“. - Помагаме околу експропријацијата на потегот од „Охис“ до Рампа. Тоа се околу 3,5 километри. Има многу приватни имоти. Експропријацијата добро се одвива и се надевам дека од јули ќе почне изградбата на булеварот „Првомајска“, изјави Ѓорчев.