Финансиска зона во центарот на Скопје?!

На општо изненадување на јавноста, премиерот Никола Груевски вчера во гостувањето во емисијата „Јади бурек“ го призна тоа што многумина го предвидуваа - дека слободната финансиска зона, поради која се прави измена на Уставот, ќе ја прават среде Скопје. Потегот за отворање слободна финансиска зона, инаку, во земјава беше критикуван како крајно недозволив потег, којшто Македонија би ја направил криминално дувло и место во кое би се слевале и переле валкани пари.

Таа зона ќе биде во Скопје, или како што рече Груевски, сред град. Бидејќи центарот на градот е веќе „пополнет“, прашање е и што власта на ВМРО-ДПМНЕ и ДУИ има намера да урива или да узурпира, за да гради нови објекти на површина до 20 хектари.

- Нашата идеја е да направиме една меѓународна финансиска зона во сред град, во Скопје, тоа ќе бидат канцеларии во некои 10-20 хектари ... згради, канцеларии во кои ќе привлечеме да дојдат, меѓународни финансиски институции, како банки, осигурителни друштва, Хеџ фондови, инвестициски фондови, да ги отворат тука нивните хедквортери, нивните главни канцеларии. Две работи треба да им бидат сериозен магнет. Едната е: Во зоната да важат закони коишто важат во најкредибилните земји каде што одат финансиите, како Англија, Луксембург и слично. Втората е да има ниски даноци. Еве, упростено кажано, англиски закони со многу ниски даноци. Оти во Англија имаат многу високи даноци - рече Груевски.