Спортските сали се матна зделка

Ревизијата констатира многу пропусти и неправилности во работата на Агенцијата за млади и спорт

Катица Чангова

Спортските сали се матна зделка, а сите финансиски трансакции за овие и за други објекти, најверојатно, ќе бидат предмет на контрола на надлежните институции. Ова може да се извлече како заклучок по извештајот објавен вчера на Државниот завод за ревизија што се однесува на Агенцијата за млади и спорт, а која, покрај Министерството за транспорт, се споменува како една од трите владини пералници на пари. Трето на листата на пералници е Министерството за култура.

Проектот на Владата „35 спортски сали“, проценет на 504 милиони денари или осум милиони евра, нема утврдена вредност и сопственост, а објектите се дадени под кирија без договори, констатира ревизорот. Притоа, тврди дека финансиските извештаи за работењето на Агенцијата за млади и спорт во делот на овој проект не ја прикажуваат состојбата вистинито и објективно.

Премиерот Никола Груевски во кампањата за локалните избори 2009 година го апострофира во преден план проектот за спортски сали, а притоа фрли и многу лопати за темели на слични објекти.

„Салите не се изградени во предвидениот рок, до 31 декември 2008 година. Од 35, се изградени 10, во активна изградба се девет, прекината е градбата на 4 објекти, а за 12 во тек е обезбедување градежна дозвола“, вели ДЗР во извештајот. Притоа, и' препорачува на Владата да формира комисија од стручни и компетентни лица за да се утврди вредноста на активираните спортски објекти, но и да се реши статусот на сопственоста.

„Со увид во документацијата и извршеното интервју со вработените, ревизијата констатира дека обврските не се исполнети во договорениот рок поради некоординирано и неефикасно работење на институциите при обезбедување на градежните дозволи, несоодветно изготвена проектна документација, како и несоодветна финансиска конструкција од изведувачот прифатена со спроведување на постапката за јавна набавка. Заради изведување дополнителни и непредвидени работи, во текот на 2008 е склучен анекс-договор со кој е извршено зголемување на вредноста на основниот договор за 30 отсто и е пролонгиран рокот за изградба за една година, до 31 декември 2009“, нагласува ревизорот.

Оваа институција смета дека со прифатената понуда врз основа на невообичаено ниската цена се доведува во прашање целосната, навремена и квалитетна реализација на проектот за спортски сали.

Но, не станува збор за сомнителност само во овој проект на Агенцијата за млади и спорт и директорот Ивица Георгиевски како одговорен во 2007 година, за која е направена ревизијата во периодот декември 2008 - јануари 2009 година.

„Со увид во документацијата, ревизијата не се увери во наменското користење на средствата од 14 милиони денари од програмата ’Млади‘ наменети за трансфери до здруженија на граѓани и фондации и до хуманитарни организации, за проектите избрани на повик“.

Продолжената ревизија во Сојузот на спортските федерации, Кошаркарската федерација и Боречката федерација покажува ненаменско трошење на 88 милиони денари наменети за проекти избрани на повик, поради невопоставен контролен механизам за доделување.

Ревизијата ја проверила ставката „други трансфери“ и констатирала дека од неа се направени трошоци за судско решение во износ од 9,5 милиони денари.

Спомнати се и неправилности со доставувачи за изработка на проектите за градење два современи пливачки базена и за пет покриени пливачки базени, за кои нема постапка за јавна набавка од мала вредност. ДЗР нагласува дека ова е спротивно на Законот за јавни набавки, според кој „набавката на проект од областа на урбанистичкото планирање, архитектурата, градежништвото набавувачот ја врши врз основа на конкурс“. Затоа оваа постапка, додава ревизорот, „предизвикала отсуство на фер конкуренција за еднаква и недискриминаторска положба на понудувачите, транспарентност и јавност“.

Од забелешките на ДЗР за спомнување е тоа што е систематизиран Сектор за капитални инвестиции, што е незаконски и спротивно на Законот за државната управа, во кој е дефинирана надлежноста на Агенцијата. Одговорните од Агенцијата се правдале дека формирањето на Секторот било „поради несоодветно функционирање на ЈП за стопанисување со спортски објекти, кое е перманентно со финансиски проблеми и блокирана сметка“.

Новата спортска сала “Иван Хаџи Николов“ лоцирана во општина Бутел, Скопје, ќе биде отворена денеска од страна на премиерот Никола Груевски.

Како што пишува во соопштението од Агенцијата за млади и спорт овој објект е дел од владината програма за изградба на 35 спортски сали низ целата држава.

На свеченоста ќе присуствува и директорот на Агенцијата, Драган Ѓурчевски.

Куманово гради нова спортска сала

По новогодишните празници ќе биде пуштена во употреба уште една нова мултифункционалана спортска сала во населбата Кисела Вода. Ова неодамна го најави
директорот на Агенцијата за млади и спорт, Драган Ѓурчевски, кој потсети дека со овој спортски објект, покрај веќе изградениот во ОУ Круме Кепески", ќе се зголеми спортскиот дух на скопјани. Новата сала ќе го носи името "Независна Македонија" и истата ќе има капацитет од 500 седишта. Ќе биде опремена со модерна спортска опрема. Според плановите, истата ќе може да се користи за повеќе спортови: мал фудбал, ракомет, кошарка, одбојка, гимнастика, пинг-понг, тенис и сл. Салата ќе има огромно значење за унапредувањето на училишниот спорт во Кисела Вода, особено за учениците од ОУ "Невена Георгиева - Дуња", во чиишто рамки ќе биде изградена. Градоначалникот на Кисела Вода, Марјан Ѓорчев, деновиве рече дека е задоволен кога се говори за спортот во неговата општина, со што се зголемува организирана психофизичка активност на сите граѓани.