Возен парк (ЈСП - двокатни автобуси)

Анета Стојковска

Три од четирите фирми, кои конкурираа на тендерот за набавка на двокатните автобуси за јавниот градски превоз во Скопје, не ги исполнуваат повеќето барани технички и функционални карактеристики, неофицијално дознаваме од Министерството за транспорт и врски. Од наведените барања во тендерот тие не ги задоволуваат критериумите во однос на емисијата на издувни гасови, не поседуваат дводелно предно ветробранско стакло на горниот и на долниот кат, ниту можност за делумно отворање на странични прозорци од двете страни, а има и отстапки во однос на гаранцијата која се дава за моторот и за железниот дел од автобусот. Според документот со неофицијалните податоци од отворањето на тендерот до кој дојде „Време“, кинеската фирма „Јутонг“ и кинеско-бугарската „Кинг лонг“ понудиле моторите на двокатните автобуси да бидат од моделот „куминс“ со стандард евро 4, што во ниту една земја од Унијата не се користи во јавниот градски превоз. Од преостанатите две, домашната „Санос“ конкурира со мотори „МАН“ по стандард евро 5 за идните 300 двокатни градски и два туристички автобуси, а словачката „Пре-ос“ ги задоволува екостандардите на горивото, но понудила мотори „куминс“. - Автобусите што ги нуди најдобриот понудувач се според најстрогите европски еколошки стандарди, какви што мора да имаме пред членството во ЕУ - велат од Министерството за транспорт. Сепак, важна улога, можеби и пресудна, во одлуката кој понудувач ќе победи на тендерот, веројатно ќе има ја има цената на автобусите. Со најниска настапува фирмата „Јутонг“, која за 302 автобуси, со вклучени царински давачки, бара околу 51 милион евра, а највисока е понудата на словачката фирма, која бара околу 100 милиони евра. Во првичното бодување по отворање на понудите во однос на сите барани критериуми најмногу поени освоила фирмата „Санос“ или вкупно 94,74 од можни 100 за набавка на 300 градски и 94,92 за двата туристички автобуси: најмногу конечното. Второрангирана е кинеската „Јутонг“ со 78,60, односно 77,35 бода, од кои максимум, 50 бода, освоила поради најниската понудена цена. Од Министерството за транспорт се уште нема информации кога официјално ќе се соопшти името на фирмата-победник на тендерот, а низ чаршијата веќе се шпекулира дека тоа ќе биде „Јутонг“, која ја поврзуваат со името на познат скопски бизнисмен.

Краток век на скопските „даблдекери“

Два двокатни автобуси имало во Скопје после земјотресот, кои на градот му биле подарени од англиската влада, раскажуваат постарите скопјани. Набргу потоа едниот од нив се превртел при што биле повредени повеќемина патници. Поради тоа било забрането нивното понатамошно користење по градските улици.

http://vreme.com.mk/DesktopDefault.aspx?tabindex=1&tabid=1&EditionID=1610&ArticleID=106621