Јарболи и знамиња

Во период кога македонскиот идентитет е апсурдно загрозен, а името на државата и јазикот се ставени под прашање, едно е сигурно - државното знаме нема да загине. За тоа се заслужни македонските текстилци, кои досега никогаш не исткајале толку примероци на државното знаме. По заслуга на нивниот труд, државното знаме наскоро ќе стане секојдневна глетка за граѓаните на Македонија, а особено за жителите на Скопје.

Градот Скопје одлучи да ги следи стапките на Владата. Триметарски знамиња на Македонија ќе се виорат на 23 нови локации во Скопје, откако градските власти распишаа тендер во кој, меѓу другото, се бара набавка на 23 јарбола и исто толку знамиња. Јарболите ќе бидат со помали димензии од владините триесетметарски столбови што никнуваат низ земјава и ќе бидат поставени пред училишта и институции од културата во главниот град.

Дополнително, градот Скопје и Службата за општи и заеднички работи при Владата во наредниов период ќе купат илјадници нови знамиња. Така, градот Скопје на тендер бара набавка на 600 знамиња на Република Македонија (со димензии 80х160 см), 200 знамиња на градот Скопје (80х160), 50 знамиња на албанската националност (80х160см), 200 метални држачи за знамиња-розетни (комплет со 400 завртки и навртки), од кои 150 за светлосиви-сребрени столбови и 50 за зелени столбови и 800 дрвени држачи (стапови).

Неделчо Крстевски, портпарол на градот, вели дека целта на оваа набавка е да се дополни недостигот од знамиња што се истакнуваат за време на државни празници.

- Јарболите се со помали димензии и ќе се поставуваат пред училиштата и институциите од културата каде што веќе имало јарболи, меѓутоа биле оштетени, но и на нови места. Градот Скопје има законска обврска да ги истакнува државните знамиња за време на празниците и да ги истакнува знамињата на националностите во согласност со прописите - вели Крстевски.

Владата преку Службата за општи и заеднички работи веќе подолг период го остварува проектот за поставување 50 јарболи високи по 30 метри. На разни локации во Скопје веќе се поставени петнаесетина јарболи, а по еден или два веќе има или допрва ќе се поставуваат речиси во сите поголеми општини во земјава и на сите гранични премини.

Васил Доневски, директор на Службата за општи и заеднички работи при Владата, информира дека јарболите веќе се поставени во Скопје на булеварот Партизански одреди кај „Тифани“ и „Лептокарија“, кај училиштато „Кочо Рацин“, во населбата Ѓорче Петров, населбата Аеродром, булеварот Србија, во населбата Радишани, кај Камени мост, на улицата Македонија, во Штип, кај Сарамзалино, во Прилеп, на Плетвар, кај Јажинце, Блаце, Богородица, Дојран и во Охрид.

- Во тек е поставувањето на јарболите во Шуто Оризари, Драчево, Ростуше, кај Стража, во Гевгелија, во Меџитлија, на Ќафасан, на граничниот премин Ново Село, во селото Ново Село и во Струмица. По завршувањето на овие градежни зафати, јарболи ќе се поставуваат во Радовиш, Кочани, Македонска Каменица, Берово, Велес, Штип, Лакавица, Маврово, Скудриње, Тетово и на уште неколку места - вели Доневски.

Тој додава дека локациите за поставување на јарболите се избираат во соработка со општинските власти. Овој проект за поткревање на националното чувство ќе ја чини Владата по околу 7.000 евра по јарбол или вкупно околу 350.000 евра. Интересно е што Службата неодамна распиша и оглас за набавка на основи за знамиња и за знамиња со помали и поголеми димензии. Доневски вели дека се набавуваат повеќе видови знамиња, и тоа за на маса, за приредби, за истакнување во просториите на Владата и на други места.