Трифка

Без дозвола од скопската полиција, градот го претвори кејот „13-ти Ноември“ во улица по која камиони пренесуваат градежен материјал. Градоначалникот Костовски призна дека тој дозволил да се узурпира кејот, но според него, виновна за тоа била Владата.

Таа инсистирала општина Центар да потврди дека на тоа место има маркица.

„Градежната дозвола ја дава општина Центар. Ние како Град сме обврзани да најдеме начин како да обезбедиме сообраќајно решение, како тој објект да се изгради“, рече Трифун Костовски, градоначалник на Скопје.

За уништената пешачка зона и погледот на скопјани од кејот, денеска се дебатираше и во Собранието.

„Плоштадот сега личи на руина, затоа човек не може да пројде на кеј, бидејќи некој решил во непосредна спогодба да му даде градежно земјиште за изградба на објект, којшто по ниедни перформансите не треба да биде таму“, изјави Јани Макрадули, СДСМ.

„Знаете вие дека таа парцела ја продаде вашата Влада и ова што сега го гледаме на плоштадот, овој затворен простор и се што се случува на плоштадот и што граѓаните не можат да пијат кафе на кејот, е затоа што вие го продадовте тој плац, и тоа за багателна цена“, вели Зоран Петрески, ВМРО-ДПМНЕ.

Инвеститорите „Дивелоп“ и „Латис“ со амин од Градот го добија на користење кејот, иако согласно законот, за да го заградат и да го користат треба да бидат сопственици на земјиштето.

Дневник - Сунчица Николоска - 10.11.2008