Клучката кај хотелот "Континентал" градските власти ја градат на диво, бидејќи не добиле одобрение за градба од Општина Центар. Изградбата на оваа сообраќајница почна во септември, а од Градот велат дека биле принудени да почнат со работа без согласност од Центар. Скопскиот градоначалник Трифун Костовски вели дека за да добие согласност од Центар, градоначалничката Виолета Аларова му барала противуслуга, односно барала градоначалникот да дозволи спроти хотелот "Холидеј ин"да се градат стокатници и заради нив да направи измена на Генералниот урбанистички план.
"Работата на клучката ја почнавме без согласност од Општина Центар. Тоа е така затоа што е поврзано, да не речам, со една дебела бирократија, која наместо да помага во решавањето на овие работи, максимално ги отежнува. Тоа е системот. Знаеш, јас ќе ти дадам, ама и ти мора да ми вратиш. Што бара Аларова за возврат? Па ги бара стокатниците да и ги дадам. Но, јас со тоа не можам да се согласам. Дадовме негативен одговор на измените на ДУП 'Голем ринг' и во него дадовме 15 причини поради кои не се согласуваме со предлогот во центарот да се градат стокатници", вели Костовски.
Општина Центар ги негираше обвинувањата од градоначалникот Костовски. Од таму велат дека не издале одобрение за изградба на клучката кај "Континентал", бидејќи таа не е предвидена во ГУП-от.
"Не се работи за реваншизам, туку затоа што во ГУП, кој е донесен во 2002 година, не е предвидена сообраќајна инсталација во вид на клучка во населбата Крњево во близина на улица Беласица за вклучување во сообраќај на булевар Александар Македонски. Со ГУП-от е предвидено вклучувањето на булевар Александар Македонски да оди преку неизградениот булевар Крушевска Република и од тие причини не е дадено одобрение за градба. Општина Центар ја очекува долгонајавуваната измена на ГУП-от, каде ќе биде ревидирано и решението за булевар Крушевска Република, што е приоритет во нашите барања за измени на планот", велат од Општина Центар. (Е.А.)

Клучката ќе доцни најмалку еден месец

Изградбата на клучката кај Континентал, ќе доцни најмалу еден месец. Според надлежните во Градот причината се временските услови, но и неодамнешните неколкудневни застои во работата од страна на градежното претпријатие Пелагонија. Од Градот додаваат дека поради дождливото време градежните работи во моментов се одвиваат со намалено темпо, а доколку падне снег или, пак, температурите бидат под минус пет, можно е и стопирање на работите.

- Дождот ги успорува земјените работи, но засега можат да се вршат ископувања поврзани со темелите за носачите и потпорните ѕидови, како и бетонирање.Сепак, се надеваме дека најдоцна до мај клучката ќе биде пуштена во сообраќај, вели Мичо Поповски, од Град Скопје.
Оттаму додаваат дека веќе нема никакви проблеми и со сообраќајот во овој дел од градот.

- Граѓаните се навикнаа на новиот сообраќаен режим и главно ги користат алтернативните сообраќајници кон центарот на градот. Единствено во шпицевите сообраќајот е успорен, но таква е ситуацијата во целиот град, додава Поповски.

ПО ЗИМСКИОТ ОДМОР ГРАДЕЖНИТЕ РАБОТИ ПРОДОЛЖУВААТ

Клучката „Континентал“ готова до јуни

Со ова сообраќајно решение и со веќе изградениот булевар Словенија, ќе се растовари метежот на влезот во Скопје, во Чаир, но и на Бит-пазар и кај Судската палата

По еден месец застој, градежните работи на клучката „Континентал“ продолжуваат. Од Градот велат дека работниците деновиве ќе се вратат на терен. Клучката, од која се очекува да го растовари сообраќајот во тој дел од градот, се очекува да биде предадена во употреба до крајот на пролетта.

- Градежните работи на клучката кај хотелот „Континентал“ беа во застој поради сезонските одмори што градежните работници од „Пелагонија“ ги користат во овој период од годината. Од денеска изградбата ќе продолжи според планот и динамиката за изведба на овој голем инфраструктурен објект. Ако нема сериозни проблеми со временските услови, Град Скопје очекува до крајот на оваа пролет клучката да биде пуштена во употреба - велат во Одделението за односи со јавноста.

Пред зимскиот одмор, во октомври минатата година, работниците од „Пелагонија“ кратко престанаа со работа, поради внатрешни проблеми со раководителите и нередовна исплата на плати. Од Градот тогаш изјавија дека тие проблеми не се нивни и ако градежното претпријатие доцни со изградбата и не го почитува рокот за завршување на клучката, ќе плаќа казни. Дури најавија и дека ќе распишат нов конкурс за изведувач ако е потребно.

Овие неколку месеци, додека траат градежните работи, булеварот Александар Македонски е делумно затворен за сообраќај. Клучката „Континентал“ е сложен проект за градење една голема раскрсница на две нивоа, на која сообраќајот ќе се одвива без семафори и без застој. Со ова сообраќајно решение, но и со булеварот Словенија, кој беше пуштен неодамна, се очекува да се реши хаосот на влезот во Скопје, во Чаир, но и на Бит-пазар и кај Судската палата.

Проектот предвидува од страната на ридот Гази Баба да се градат ленти за вклучување и за исклучување на возилата, како и подземен премин, со кој клучката ќе добие форма на труба. Кај хотелот и кај Скопското сајмиште ќе се гради кружен тек за возилата и коловозни ленти за вклучување и за исклучување од булеварот Александар Македонски. Целта на изградбата на оваа клучка е да се овозможи директно поврзување на населбата Автокоманда со новиот мост на реката Вардар кај Транспортниот центар, а оттаму и со центарот на Скопје. Со ова сообраќајно решение ќе се избегнат надвозникот кај Бит-пазар и булеварот Крсте Петков Мисирков. Исто така, меѓуградските автобуси што доаѓаат од кај Автокоманда ќе може директно да пристигаат на меѓуградската автобуска станица.

Изградбата на клучката почна во јули минатата година. Според процените на Градот, инвестицијата е вредна три милиони евра.

Јорданка Ивановска

СО ЗАДОЦНУВАЊЕ ОД ТРИ МЕСЕЦИ

Клучката кај Континентал ќе финишира во јуни

Иако беше најавено дека нејзината изградба треба да заврши до март, поради проблемите со подземната инсталација и временските услови, работите се пролонгирани за три месеци

Сообраќајната клучка на две нивоа кај хотелот Континентал ќе биде целосно завршена во јуни годинава. Иако беше најавено дека нејзината изградба треба да заврши до март, поради проблемите со подземната инсталација и временските услови, работите се пролонгирани за три месеци. Според надлежните, во моментот се работи најтешката фаза од проектот, односно изградба на подвозникот кој ќе биде завршен до мај, а до тогаш и сообраќајот на овој дел од булеварот Александар Македонски ќе се одвива по една лента.

-Бидејќи временските услови се поволни, се работи под полн капацитет на подвозникот. Завршени се темелите, а избетонирани се крајните и средните столбови. Следната работа е да се постави скеле за горниот строј односно за армирано-бетонски елементи што ќе се прават во фабриката Карпош, а ќе бидат донесени и монтирани тука. Доколку дозволат временските услови ќе се изведуваат и насипи на приклучните правци, а во завршна фаза е и потпорниот ѕид во должина од 240 метри, објаснува Коста Зекмановски, главниот надзорник на објектот од Град Скопје.

Во мај, по изградбата на подвозникот, ќе започне и третата фаза која според Зекмановски е многу полесна, а се работи за изградба на кружниот тек, што треба да биде завршен за краток период. Тогаш на булеварот Александар Македонски, повторно ќе биде сменет режимот на сообраќај во согласност со градежните работи на теренот.
Инаку, со новата клучка ќе се растеретат сообраќајните метежи што се создаваат во правец на Бит Пазар и Пластичарската улица, а ќе се овозможи и директно поврзување со мостот кај Транспортниот центар.

Со понуденото решение на гостите кои сакаат да дојдат до хотелот Континентал им се овозможува користење на подвозникот и директен влез кон хотелот преку кружниот тек, а исто така и за користење на влезот кон Саемот. Со ова решение од хотелот Континентал и Скопскиот Саем ќе се овозможи возачите да се движат кон центарот на градот и Транспортниот центар. Клучката ќе овозможи и излез кон западниот дел на градот, без поминување преку Бит Пазар и булеварот Никола Карев. Сите возила кои доаѓаат од Чаир кон Автокоманда ќе се движат по долната коловозна лента, а со клучката ќе постојат две коловозни ленти, една за непречено движење кон излезот на градот кон Автокоманда, а друга преку која ќе може да се користи кружниот тек на клучката кај хотелот Континентал за да можат да се вратат назад кон Чаир и булеварот Никола Карев.

Инаку малце чудно ми е зошто се вели клучка на две нивоа, малце нејасно ми е ова. И да се надеваме дека кружниот тек ќе биде завршен за еден месец.

Работниците на ГРО „Пелагонија“ што работат на клучката кај хотелот „Континентал“ ќе стапат во штрајк ако следната недела не им се исплатат заостанатите плати за изминатите пет месеци. Тие бараат и зголемување на личните доходи затоа што со пет илјади денари немаат за нормален живот. Исто така, работниците велат дека има потреба од вработување помлади работници што ќе ги заменат постарите. - Имам 63 години и не сум способен да се качувам по скеле. Треба да ме пензионираат и на мое место да дојде некој помлад - се жали еден од работниците. Тие се огорчени и од односот на работодавците за редовноста на исплата на платите. - Покрај тоа што не ни даваат плата веќе пет месеци, не ни ги намируваат ниту придонесите, па немаме ни сини картони. Веќе 36 години работам и не сакам никој да си поигрува со мене. Од платата од пет илјади денари, три илјади давам за сметка за струја. Децата ми се невработени. Се чувствувам како роб - вели еден од работниците.

Х.Б.

Се поставуваат носачите на клучката „Континентал“

Носачите се лијат во фабриката „Карпош“ и ќе се монтираат вкупно 32

Градежните екипи на „Пелагонија“ деновиве започнаа со монтирање на бетонските преднапрегнати плочести носачи на клучката „Континентал“. Носачите се лијат во фабриката „Карпош“. Во моментов има поставено 4 носачи, а треба да се монтираат вкупно 32. Ова е претпоследната фаза во изградбата на подвозникот, по што ќе следува поставувањето на асфалтот, тротоарите и заштитната ограда.

Според информациите од Градот Скопје, потпорниот ѕид е веќе направен, а со завршување на подвозникот ќе започне и подготовката на сообраќајниците кои ќе ја врзуваат клучката со околните улици. Последна фаза од изградбата на овој капитален објект ќе биде кружниот тек кај хотелот „Континентал“, чија изведба ќе трае многу пократко од изградбата на подвозникот. Пред почетокот на изведбата на кружниот тек, откако ќе се асфалтира подвозникот, ќе се направи нов режим на сообраќајот, со што тој и практично ќе почне да се користи. Од Градот најавуваат дека до крајот на месецов ќе биде готова и споредната сообраќајница која ќе ја поврзе општината Гази Баба со булеварот „Александар Македонски“.

На објектот во моментов работат околу 80 работници на „Пелагонија“, а атмосферската канализација ја изведува „Козјак“ од Куманово. Засега, градските власти не сакаат да прогозираат термин за завршување на објектот, за кој велат дека многу зависи од временските услови, но и од условите во градот, како што се блокирање на улиците со протести и слично. Сепак, се надеваат дека доколку не се јавата некои непредвидени проблеми, клулката ќе биде завршена во предвидениот рок, во јуни годинава. (С.Н.)

За дваесетина дена нов режим на сообраќај кај клучката „Континентал“

За дваесетина дена ќе заврши првата фаза од изградбата на клучката „Континентал“ по што ќе се изврши и пренасочување на сообраќајот, информираат во Градот Скопје. Возилата ќе сообраќаат по новиот коловоз, а ќе биде затворен делот од булеварот „Александар Македонски“ по кој сега се вози, каде што ќе започнат градежни работи. Во меѓувреме, пред промената на сообраќајниот режим, ќе биде урната бараката каде што беше сместена општинската организација на Црвен крст - Гази Баба, а ќе завршат и последните зафати на надвозникот.

Во Градот се задоволни од новата динамика со која работи градежното претпријатие „Пелагонија“ и прогнозираат дека ќе се запази рокот за завршување на објектот. Пред завршувањето на првата фаза од изградбата, за која во Градот велат дека е најтешка и претставува 80 проценти од клучката, ќе се направат и жардиниерите од средишното зеленило, а околината на клучката хортикултурно ја уредува „Паркови и зеленило“. Во моментов, информираат градските власти, направено е и уличното осветление и поставени канделабрите. Улицата што ја поврзува Општина Гази Баба сосе булеварот е завршена и предадена во сообраќај.

„Во рамките на проектот за изградба на клучката ’Континентал’ ќе бидат направени и два дополнителни зафата, додека трае втората фаза од изградбата. Ќе се санира подземниот премин од хотелот „Континентал“ кон општината, каде што ќе биде поставена хидроизолација за да се спречи прокиснувањето. Исто така, целосно ќе биде реконструиран коловозот на булеварот ’Александар Македонски’ - од клучката до семафорите во Автокоманда“, информираат во Градот. (С.Н.)