Словенци, Германци и Австријци сакаат да градат ветерници во источна Македонија

пишува: ИВАН БОЈАЏИСКИ

Жител на нашиот главен град прашува штипјанец што има ново во Штип. „Па, дува многу силен ветер“, рекол штипјанецот. „Ама, јас те прашав што е ново“, рекол скопјанецот и продолжил по својот пат.

Тоа дека во Штип има ветер и не е некоја новост. Но, ако во минатото ветерот бил синоним за непријатна клима во градот под Исарот, денес ветерот е тој кој во него привлекува светски бизнисмени кои трагаат по еколошки чиста, обновлива, вечна енергија. Во последните дваесетина дена, ветерот во Штип „додува“ бизнисмени од Словенија, Германија и Австрија. Тие се распрашуваа за тоа дали во градот и во неговата поблиска околина има ветер, дали се вршени мерења на неговата силина и константност, какви се законските можности нивните компании, на определени локации да постават мерни инструменти, а потоа и да добијат концесии за поставување ветерници за производство на струја. Странците беа кај градоначалникот Панде Сарев и кај бизнисменот Ристе Љуботенски, доктор по екологија, човек кој пред десетина години ги изврши првите мерења на енергијата на ветерот, кој тврди дека за најмногу три години ќе ја ја изгради првата вистинска ветерница за производство на струја. Странците не криеја дека поседуваат сателитски слики кои им укажале дека источниот дел на Македонија е едно од најповолните подрачја во Европа во однос на присуството на ветерот, дека неговата енергија е значајна за производство на струја и правење големи пари од тоа.

ИМПРЕСИОНИРАНОСТ Данило Дураковиќ, менаџер на словенечката фирма „Комита“, ни потврди дека неговата компанија е подготвена, во инсталирањето ветерници во ветровитите подрачја во државава да вложи 150 милиони евра. „Татко ми беше офицер во поранешната армија и службуваше во Штип. Јас сум роден во овој град, но подоцна моето семејство се исели од Македонија. Мене во потсвеста ми останаа сеќавањата за ветерот во Штип, а кога ветерот стана интересен за производство на струја се сетив на тој факт и еве ме пак во родниот град. Се надевам дека со својот капитал нашата фирма ќе дојде на овие простори“, ни изјави Дураковиќ. Тој не криеше дека енергијата е клучното прашање на векот што го живееме и дека многу компании би сакале да го вложат слободниот капитал во енергетскиот сектор како мошне исплатлив бизнис. Тил Келпе, менаџер на “Бундесвербанд Винденергие“ од Хамбург, Германија, потврди дека нивен тим наскоро ќе дојде во Штип, зашто регионот, од аспект на ветерот имал голем потенцијал и, како таков, им бил мошне надежен од аспект на нивната заинтересираност за ширење на бизнисот во секторот на обновливата енергија.

Интересот на странците за енергијата на ветерот е производ на две сознајни нешта: прво, дека живееме во век на големата потрага по нови енергетски ресурси, битка која се води на сите делови од Земјината топка и второ, дека источниот дел од државата е можното ново елдорадо за бизнисмените кои гледаат со децении однапред, за оние „ што прават пари“ кои имаа(т) нос да ги насетат новите можности за големи профити, но и за државата да го супституира традиционалното производство на струја кое го имаме сега, чии ресурси не се обновливи, а уште помалу еколошки. На пројавениот интерес на странските бизнисмени (нашите, како и секогаш, доцнат) влијае и фактот дека од идната година Република Македонија ќе може да смета на претпристапните фондови од Европската унија, при што најголем дел од нив ќе бидат наменети за секторот енергетика, со акцент на „зелената“, односно еколошки чиста, обновлива енергија.

ОГРОМЕН ПОТЕНЦИЈАЛ Кон средината на минатата деценија, во период од три години, д-р Ристе Љуботенски, изврши мерења на присуството, силината и константноста на ветерот на повеќе локации во источна Македонија. Овие мерења му биле неопходни за утврдување на можностите за економската исплатливост на силината на ветерот во производството на електрична енергија. „Тригодишните мерења покажаа дека во источна Македонија постојат сите услови за производство на струја преку искористување на енергијата на ветерот. И пред десет години пресметките покажуваа висока исплатливост на инвестициите. Денес технологијата на производство на централите на ветер е на многу повисоко ниво, бидејќи се употребуваат нови легури во производството на самите ветерници, што значително придонесува за зголемена ефикасност во преобразбата на енергијата на ветерот во електрична енергија. Тоа значи дека денес, од секој аспект, секоја инвестиција во оваа смисла е длабоко оправдана. Ова уште повеќе што светот создаде технологија за значително поефикасно складирање на струјата добиена од ветерот. Всушност, според моите истражувања и анализи, нашава држава има потенцијал со користење на енергијата на ветерот да добие 4.000 мегавати електрична енергија, што е за 6,5 пати повеќе од моќноста на РЕК ’Битола‘“, вели Љуботенски.

Според Љуботенски, Овчеполието, Штипско, потегот Неготино-Радовишко (регионот околу Конче), Ѓуриште кај Свети Николе, Пробиштипско, Виничко, Плачковичкиот терен, Осоговските Планини се најветровитите места во Македонија. Тој тврди дека на овој потег може да се изгради цело море од ветерници кои значително би го подобриле билансот на производство на електрична енергија од домашно потекло. „Пред десет години, кога ги завршив мерењата, со компанија од Данска, најпозната во производството на ветерници за добивање електрична енергија, постигнав договор за инвестирање во овој сектор. Но, тогаш во нашава држава не постоеше законска можност за приватни инвестиции во производството на струја. Ветерниците требаше да се постават во Штипско, но целиот процес се одложи се' до денес. Ќе бидам упорен и по најмногу три години ќе го реализирам овој свој сон“, вели Љуботенски. Тој е цврсто решен во близина на својата винарска визба, која е лоцирана шест километри од Штип на патот кон Радовиш, да инсталира ветерница со јачина од 250 киловат-часови, во што ќе инвестира половина милион евра. Ќе има доволно струја за својот капацитет, но и пазарен вишок. Вели дека инвестициите во ветерници се скапи, дека започуваат да се враќаат по десетина години, но нивното одржување понатаму не бара никакви пари, а овозможува високи профити.

БОРБА ЗА ЛОКАЦИИ Штипскиот градоначалник Панде Сарев вели дека странските бизнисмени кои биле кај него настојувале на секој начин да дојдат до повеќе податоци за ветерот во Македонија. „Тие самите рекоа дека сателитските снимки кои ги анализирале им го покажале патот кон Македонија и Штип како централна дестинација. Тврдеа дека плачковичкиот дел, Овчеполието и Штипско, просторот над рудникот ’Бучим‘ кај Радовиш, Ѓуриште кај Свети Николе имале неверојатно големи предиспозиции за производство на струја од ветерот. Од нас побараа да им дадеме локации на кои би поставиле инструменти за мерење на јачината и брзината на ветерот. Словенецот Дураковиќ рече дека тие би сакале да потрошат две години во мерењето на капацитетот на ветерот. Дека ветерот станува значаен фактор на енергетски план говори и фактот што ЕЛЕМ, пред една година, постави свои мерни инструменти во атарот на потплачковичкото село Шашаварлија“, потенцира Сарев.

Љуботенски, пак, тврди дека нашиот проблем што приватниот бизнис не вложува во овој сегмент лежи во фактот што државата се' уште нема административен капацитет за такво нешто. „Во рамките на ЕЛЕМ треба да има посебен оддел на кој единствена работата ќе му е да ги создава административните, законски предуслови за производство на ваков вид енергија. Тоа што државата треба да изгради стратегија воопшто не значи дека во неа ќе нема место за приватната иницијатива. Македонија има силна пропаганда за привлекување странски инвестиции, но странците главно купуваат готови фабрики или други објекти од разни деловни области. Мудроста е во тоа да се привлечат инвеститори кои би вложиле капитал во нови објекти. Енергетскиот сектор, можностите на земјата во моментално најбараната - еколошки чиста и обновлива енергија - широко ја отвора вратата за домашни и за странски инвеститори“, смета Љуботенски.

И „БУЧИМ“ ЗАИНТЕРЕСИРАН Во рудникот за бакар „Бучим“ сериозно се разгледува можноста за сопствени инвестиции во инсталирање ветерници. На такво нешто ги мотивира фактот што рудникот е во семејството на квалификувани (големи) потрошувачи на струја со што таа за нив станува мошне скапа. „До мај годинава цената на струјата во цената на готовиот производ учествуваше со 19,5 проценти. Откако се донесе уредбата која не' обврза 55 отсто од струјата да ја обезбедуваме од увоз, уделот на електричната енергија во цената на готовиот производ се зголеми на 30 проценти. Од Нова година целата струја ќе мора да ја набавуваме од увоз, по што струјата во цената на готовиот производ ќе учествува со преголеми 35 проценти. Во Германија еден мегават струја компаниите го плаќаат 60, а кај нас тој чини 80 евра. Поради тоа нашите намери сами да си обезбедиме струја која ќе ни ги намали трошоците на производството се мошне сериозни и во таа смисла веќе имавме некои контакти за вложување поголеми средства во ветерници“, вели Николајчо Николов, заменик-генерален директор во рудникот.

Германското искуство со ветерниците е најдобро

„Германија најдобро ја користи енергијата на ветерот која во вкупното производство на струја учествува со приближно 30 проценти. Австрија, Данска, Холандија, Шпанија се отидени многу напред во користењето на енергетските можности на ветерот. Во Германија, последниве години, во самата архитектура на зградите, се инсталираат мали, бесшумни ветерници од десет киловати кои обезбедуваат автономија во снабдувањето со струја. Во Јапонија, во куќите се вградуваат мали централи на ветер со елипси од само 50 сантиметри. Тие се планираат во проектите на зградите. Тоа е голема „мода“ во земјата на изгрејсонцето. Ние имаме одлични предуслови за примена на такви решенија“, смета Љуботенски.

Трка да се искористи ветерот во Штип

Претставници од пет европски држави барале одобренија од општината за поставување ветерници

Иван Бојаџиски

Штип - Светски бизнисмени, претставници на компании кои вложуваат во новите енергетски можности, го опседнаа Штип. Во градот под Исарот тие доаѓаат на крилјата од ветерот, поттикнати од неговите големи енергетски можности. При средбите со градското раководство сите странци говорат дека сателитските снимки им покажале дека Штип и околината се европски подрачја во кои вреди да се инвестира во ветерници. Тие само го потврдиле фактот дека на ова подрачје ветерот е константен, што е негова најголема вредност за тој да се стави во функција на производство на електрична енергија.

Градоначалникот на Штип, Панде Сарев, вели дека досега кај нив дошле претставници од пет европски држави. Сите тие барале општината ургентно да им даде одобрение за поставување ветерници.

„Порано од нас се бараше терен за поставување мерни инструменти со кои ќе се констатирало присуството и константноста на ветерот. Сега директно се бара поставување ветерници. Тој факт говори дека тие, од повеќе свои извори, добиле сигурни сигнали дека на штипскиот простор може да се прави профитабилен бизнис преку користење на постојаната енергија на ветерот.

- Кај нас дојдоа компанијата „Комита“ од Словенија, потоа СЕБА и СКК од Германија, компании од Шпанија и од Австрија. Сите се подготвени да инвестираат големи пари и на нашава општина да и' плаќаат надомест од еден процент од цената по која ќе ја продаваат струјата. Некои од нив бараат терени веднаш, зашто имале можности една ветерница да постават само за една недела“, вели Сарев.

Ристе Љуботенски, експерт по екологија, пред 13 години прв почна да ја мери енергијата на ветерот во овие краишта. Според него, овој енергетски извор е светски тренд. Љуботенски тврди дека секоја инвестиција се исплатува под услов инвеститорот да е подготвен извесно време да чека на првите профити.

„Влогот во ветерници не е мал. За производство на еден киловат струја од ветер мора да се вложи 1.000 евра. Во ветерница од 250 киловати потребно е вложување од 250.000 евра, а во ветерница која би произведувала еден мегават - еден милион евра. Инвестицијата се враќа по најмалку седум години, но она што е најважно за овој процес е фактот дека одржувањето на ветерниците е речиси бесплатно. Или за одржување на една ветерница годишно се вложува сто долари“, објаснува Љуботенски. Тој е цврсто решен првата ветерница од 250 киловати да ја изгради во близина на својата винарска визба „Имако вино“ на шестиот километар покрај патот Штип-Радовиш.

Штипско и Овчеполието, Плачковичкиот регион и просторот околу Конче, се подрачја на кои дуваат најповолни ветрови за производство на електрична енергија. Градоначалникот Сарев вели дека посети на Штип најавиле уште три компании од три европски земји. Сите тие биле заинтересирани за новата штипска и македонска енергетска можност -ветерот. Најави за инвестирање во овој бизнис доаѓаат и од домашни фирми, меѓу нив и од самиот Штип, но тие од градоначалникот побарале да не бидат објавувани нивните имиња.

Дамнешната желба на гевгеличани за инсталирање на ветроелектрани станува реалност. Со издавањето на локациските услови од Министерството за животна средина се отвора постапката за инсталирање на 40 ветроелектрани со моќност од 1-3 мегавати и производство на максимум 4.5 милиони киловат часови годишно.

Овој атрактивен проект го реализира австриската компанија „Нова Енергија“ која преку ново отворената фирма „Ветропарк“ наскоро ќе започне со поставувањето на пробни ветроелектрани.
 

Шпанци ќе градат ветерници и фабрика во Штипско

Компанијата „Инвал“ од Шпанија е подготвена да изгради 50 ветерници за производство на електрична енергија

Иван Бојаџиски

ШТИП - Шпанската компанија „Инвал“, која во нашава држава има формирано мешовита шпанско-македонска фирма „Виста групација“, е подготвена да изгради 50 ветерници за производство на електрична енергија во Штипско. За да го инсталираат првото поле на ветерници кај нас, Шпанците се одлучиле по полугодишното, завршно мерење на интензитетот и константноста на ветерот во атарот на Лакавичкиот регион. Својата конечна одлука тие му ја претставија на штипскиот градоначалник Панде Сарев.

„Тие се задоволни од резултатите што ги покажале нивните мерни инструменти во полугодишното мерење на ветерот во Лакавичкиот регион во општината. Притоа, потврдија дека овој дел од Македонија е меѓу најповолните локации за производство на еколошки чиста и обновлива енергија. Шпанците се подготвени да склучат договор со општината веднаш откако Република Македонија ќе ги донесе сите прописи што се однесуваат на алтернативните енергетски извори“, изјави градоначалникот Сарев. Тој додаде дека, според најавите, прописите од оваа област ќе бидат готови до крајот на годинава, а ќе се применуваат од почетокот на идната година.

Стеван Пулејковски, кој е на чело на „Виста групација“ во Македонија, потенцира дека во почетокот на 2009 година, тие во Штипско ќе ги изграделе првите педесет ветерници. Секоја од ветерниците ќе има јачина од три мегавати, со што би се добивала електрична енергија од 150 мегавати. Овој потфат компанијата ќе ја чинел од 150 до 200 милиони евра. „Виста групација“ имала став дваесет проценти акции од вкупната инвестиција да ја понудат на заинтересирани компании и поединци.

Според градоначалникот Сарев, „Инвал“, преку својата мешовита фирма во нашава држава, била со намера во Македонија да инвестира во ветерници чиј капацитет би бил производство од 500 мегавати.

Според искажувањето на претставниците на компанијата, нивните намери биле сите ветерници да ги изградат во источниот дел на Македонија, најмногу во овчеполско-штипскиот дел. Ако од Македонија добијат шанса за такво нешто, тогаш „Инвал“ бил подготвен во нашава држава да изгради и фабрика за ветерници која би работела за потребите на ветровитиот Балкан.

Во намера да ги користат големите ресурси на ветерот, да произведуваат електрична енергија и од тоа да профитираат, во последните осумнаесет месеци во Штип дојдоа претставници на единаесет странски компании од шест европски држави. Меѓу нив и една компанија од Шпанија, но тоа не беше „Инвал“, туку „Хаса“.

Во март годинава на разговорите во Штип интересите на „Хаса“ ги застапуваа менаџерот Хосе Луис Кареско, а за оваа компанија лобираше и светски познатиот ракометар и тренер на скопски Вардар, Веселин Вујовиќ. Никој не можеше да даде податоци дали „Инвал“ е, всушност, „Хаса“, зашто токму „Хаса“ тогаш бараше локации за да инсталира свои мерни инструменти.

И во Свети Николе израелско-британска компанија водеше преговори за инсталирање на 150 ветерници во Овчеполието и на Богословец. Имаше подготвеност од компанијата да инвестира милијарда евра за изградба на сончеви колектори во југоисточниот дел на Македонија. Но, досега за ова нема конкретни резултати ниту во Штип ниту во Овчеполието.

http://utrinski.com.mk/?ItemID=885451C93BA04141A47F0E031154669B

Ќе се градат ветерници за производство на струја

Израелската компанија Е.И.Г. Реневблс во следниве неколку години во Македонија сака да вложи над 350 милиони евра во изградба на ветерници за производство на струја.

Ветерниците ќе бидат поставени во околината на Свети Николе. Претседателот на компанијата Дејвид Браун во соработка со Електростопанство на Израел го доставил планот до владата, а освен ветерници сакаат да градат и соларна централа, која според проценките ќе чини двојно повеќе од ветерниците.

„Во период од неколку години вкупната инвестиција ја проценуваме на над 350 милиони евра. Тоа не ја вклучува инвестицијата за соларната енергија, со соларната енергија ќе започнеме веднаш штом ќе добиеме земјиште и други одобренија од владата, најверојатно прво ќе започнеме со инсталација на соларната енергија“, изјави Дејвид Браун, Претседател на Е.И.Г. Реневблс.

Освен во Македонија Е.И.Г. Реневблс вакви алтернативни извори на енергија ќе гради и во Косово, Бугарија и Албанија. Ветерниците и соларните панели за сите овие држави ќе ги изработува прилепски „Металец“, каде вчера беше склучен и договорот.

„Таа инвестиција во Металец моментално според нашите пресметки ќе изнесува над 10 милиони евра. Со овој чекор мислиме дека Прилеп ќе го направиме енергетска долина во регионов“, изјави Јандре Здравески, директор на „Металец“.

Се очекува соларни панели да бидат поставени во неколку делови на Македонија. За таа цел во Прилеп ќе се започне со монтирање на комплетно нова хала за нивно производство. Целата технологија како и човечките ресурси ќе бидат инвестиција на Израелците. Се очекува реализација на проектот идната година.

Шпанци и Австријци ќе градат ветерници во Штип и во Радовиш

Инвестициите на „Инвал“ и на „Нова енергија“ се вредни 220 милиони евра

Иван Бојаџиски

Штипските ветерници помоќни од сите хидроцентрали

Капацитетот на 50 ветерници е 10 проценти од вкупното домашно производство на струја

Иван Бојаџиски

Штип - Македонија има дефицит во производство на електрична енергија, па од исклучително значење е конечната решеност на шпанската компанија „Инвал“ да гради ветерници за производство на струја во атарот на општина Штип. Во „ЕВН Македонија“ проценуваат дека најавената инвестиција на Шпанците во инсталирањето педесет ветерници со вкупен капацитет од 150 мегавати електрична енергија ќе го подобри домашното производство за десет проценти.

„Вкупниот производствен капацитет на електрична енергија на Македонија изнесува 1.500 мегавати. Информациите дека ветерниците што ќе ги инсталира шпанската компанија во Штипско по Нова година се со производствен капацитет од 150 мегавати говорат дека Македонија ќе го зголеми сопственото производство за десет проценти. Во услови на голема увозна зависност, тоа е повеќе од одлична вест“, ни изјави Ленче Карпузовска, портпарол во „ЕВН Македонија“.

Според Карпузовска, најавените педесет штипски ветерници се со четирипати поголем капацитет од сите македонски хидроцентрали заедно, кои по извршените ремонти и реконструкции, имаат вкупен капацитет од четириесет мегавати.

„Треба да се има на ум и тоа дека ТЕЦ ’Неготино‘ е со капацитет од 210 мегавати, само 60 мегавати повеќе од капацитетот што се најавува за ветерниците во Штипско“, вели Карпузовска. Добрата вест во случајот со ветерниците е дека тие работат на ветер, кој е обновлива, вечна и еколошки чиста енергија, додека термоцентралата кај Неготино троши скапа енергија (мазут) за да произведе струја.

Шпанци, Германци, Австријци, Руси, Французи минатата и оваа година доаѓаа во Штип, Свети Николе и во Радовиш, при што со локалните раководства ја разгледуваа можноста за инсталирање ветерници. Некои од нив за лобирање кај градските власти ангажираа и познати личности од Македонија, како што го направи тоа една шпанска фирма со ангажманот на познатиот ракометен тренер Веселин Вујовиќ. Австриската „Нова енергија“ во почетокот на минатата недела во Радовиш бараше локации за изградба на петнаесет ветерници. Од компанијата најавија подготвеност веднаш, откако ќе се потпишел договорот, да започнат со инсталација на ветерниците.

Летоска во Свети Николе престојуваше поголема делегација на англиско-израелската компанија ЕИЏ, која во Полска има изградено повеќе фарми на ветерници од кои полското електростопанство добивало 600 мегавати струја. Дејвид Браун, претседател на компанијата, тогаш даде интересна изјава. „Светот е пред вистинска енергетска револуција. Тој се' повеќе се свртува кон т.н. зелена енергија, како што се ветерот, сонцето, геотермалните води, биогасот. Во компанијата имаме сателитско истражување на ветровитите и сончевите подрачја во Европа. Заклучивме дека Македонија има исклучителни ресурси на ова поле. За почеток би сакале во Овчеполието да стартуваме со 90 ветерници чиј капацитет подоцна ќе го утврдиме. Наша цел е на ова ветровито подрачје да инсталираме повеќе ветерници, по што Македонија сосема ќе ја елиминира својата увозна зависност. Конечната цел не' води кон тоа југоисточниот дел од Македонија да го покриеме со сончеви колектори за производство на електрична енергија. Во тој процес подготвени сме да вложиме една милијарда евра“, рече првиот човек на ЕИЏ, чие седиште е во Лондон.

Шпански „Инвал“ и Општина Штип договорија потпишување на конечниот договор за изградба на првите ветерници до крајот на годинава, а веднаш потоа да се стартува со изградбата.

http://utrinski.com.mk/?ItemID=4C5593406DE1294F81C8DD327E8CA5C2

http://www.mia.mk/default.aspx?vId=59225375&lId=1&pmId= - МИА - 19.11.2008

Шпански „Инвал“ ќе гради ветерници во Источна Македонија

Виолета Кожинкова	http://www.a1.com.mk/vesti/default.aspx?VestID=109793#komentari - Коментари (0)

Шпанската компанија „Инвал“ ќе гради три фарми на ветерници во Источна Македонија. Првата ќе се гради во Штип. Останатите две во Свети Николе и Крива Паланка. Целиот проект тежи 720 милони евра.

„Во Штип ќе се градат 66 ветерници со моќност од 3 мегавати секоја или вкупно 198 мегавати. Во 90% ќе се користат постоечките патишта“, вели Џорди Молинер од „Инвал-Шпанија“.

Постапката е во тек. Студиите и анализите на терен се готови. По завршувањето на сите адмнинистративни процедури, изградбата во Штип започнува наредното лето.

„По добивањето на дозволата за градба ќе ни бидат потребни 18 месеци да ги поставиме овие ветерници, откако ќе ги завршиме со урбанистичките проекти и слично“, вели Молинер.

Според анализите штипската фарма на ветер ќе произведува 475.000 гигават часови на електрична енергија, што е доволно за 115.000 домаќинства.

Само фармата во Штип ќе произведува околу 475.000 гигават-часови струја, а според европските стандарди толку просечно трошат 115.000 домаќинства, велат во шпански „Инвал“

Шпанската компанија „Инвал“, која во земјава има регистрирано фирма-ќерка, планира со три фарми на ветерници и со инвестиција од 720 милиони евра да ја осветлува речиси половина Македонија. Постапката за добивање документи за изградба на првата фарма кај Штип е веќе почната, а „Инвал“ поднела барање за такви проекти и во Свети Николе и во Крива Паланка.

- Ова досега во Македонија е најконкретен и најголем проект за искористување енергија од ветерот. Фармата кај Штип треба да има 66 ветерници со моќност од по три мегавати или вкупно 198 мегавати. Инвестицијата ќе чини 240 милиони евра - вели Владимир Хаџипетров од „Инвал Македонија“.

Фармата кај Свети Николе треба да има 80 ветерници од по три мегавати или вкупно 240 мегавти, а инвестицијата ќе чини 300 милиони евра. Кај Крива Паланка со инвестиција од 180 милиони евра е планирано да се постават 50 ветерници, исто така, од по три мегавати.

- Се надеваме дека се' ќе биде во ред и дека потребните документи за изградба ќе ги добиеме во разумен рок, по што за 18 месеци ќе ги поставиме 66-те ветерници кај Штип. Таа фарма ќе произведува околу 475.000 гигават-часови струја. Според европските стандарди за тричлено семејство, толку просечно трошат 115.000 домаќинства. Со нашите планирани инвестиции во Свети Николе и во Крива Паланка тој капацитет тројно би се зголемил - изјави Џорди Молинер од централата на „Инвал“.

Прексиноќа во Штип се одржа јавна расправа за оценка на влијанието на фармите на ветер врз животната средина, на која беа презентирани повеќе детални информации за овој проект.

Јавната расправа ја организираше Министерството за животна средина за да ги запознаат граѓаните со проектите предвидени за изградба.

- Студијата за влијанието на фармата на ветерници врз животната средина е направена од експертски тим. Досега тимот нема утврдено негативни влијанија. Добивката од ветерните фарми е многу значајна - се зголемува енергетскиот биланс на земјата, се намалува зависноста од увоз на струја, се обезбедуваат нови работни места - вели Зоран Бошев, раководител на Одделението за оценка на влијанијата врз животната средина во Министерството за животна средина.

„Инвал“ е основан во 1966 година, а во сферата на обновливите извори на енергија има 25-годишно искуство. Во моментов „Инвал“ гради фарми на ветерници во Полска и во Романија.

Ранковце ќе се развива со фарма на ветерници

Фарма на ветерници, која ќе биде изградена на планинскиот масив во Ранковце од страна на шпанската компанија „Инвал“, е капитална инвестиција и ќе има огромно значење за економскиот развој на оваа рурална општина, сметаат во Општината. Инвестицијата ќе чини околу 180 милиони евра, а проектот ќе почне да се реализира идната година и треба да биде целосно завршен во рок од една година.

- На потегот од планината Герман, па се' до Бињино кон Крива Паланка каде што ќе биде изградена фармата на ветерници, инвеститорот од почетокот на годинава постави мерни станици кои даваат извонредни резултати, а позитивно мислење е добиено и од Министерството за животна средина. Ова е огромен проект за една мала општина каква што е Ранковце и тоа ќе биде столбот на кој ќе се темели локалната економија и развојот на општината, но и на целиот регион - вели градоначалникот Орце Тодоровски.

Тој истакнува дека од големо значење е и тоа што ветерниците ќе бидат поставени на истиот локалитет на кој локалната самоуправа планира изградба на туристичка населба, што ќе има повеќекратни економски ефекти за заживување на ова планинско подрачје.

- Општината веќе спроведува постапка за урбанизација на делот од селото Пклиште до Герман, каде што е предвидена изградба на викенд-зона. Заедно со ветерниците и со туристичките капацитети, очекуваме голем интерес од туристите, а воедно и задржување на локалното население на овие простори кое може да најде сопствен интерес во селскиот туризам и во другите локални бизниси. Во изградбата на ветерниците ќе бидат вклучени локални фирми, што ќе поттикне нови вработувања - вели Тодоровски.

Со шпанскиот инвеститор било договорено тие да ја финансираат и изградбата на патната инфраструктура во должина од 15 километри. Поради потребите на механизацијата за поставување на ветерниците, патот ќе биде со широчина од 12 метри, а тоа ќе биде уште една голема придобивка за општината.

не знам ако има таква нишка на форумот, па повеке таму би каал за тоа

Во Македонија ќе се градат ветерници

Сузана Тасева	http://www.a1.com.mk/vesti/default.aspx?VestID=120725#komentari - Коментари (0)   javascript:otvoriVideoPrilog%2810/suzana-07-03,%20120725%29">

Од Демир Капија до Гевгелија, по течението на реката Вардар, ветерот повеќе нема да дува напразно туку ќе создава електрична енергија преку ветерници.

Ќе бидат изградени 27 со јачина од еден до два мегавати.Едногодишните испитувања покажале позитивни резултати. Заинтересирани се инвеститори од Англија, Италија и Австрија, а вкупната инвестиција ќе чини околу 30 милиони евра.

„Најбитна работа е што испитувањата се завршени, бидејќи никој нема да поставува ветерници доколку претходно не ги направи воздушните струења, односно дали е присутен ветерот. Позитивни се показателите што ги имаме, државата најверојатно тука ќе распишува тендер“, рече Николче Чурлинов градоначалник на Валандово.

Идејата за изградба на ветерници не е нова за Македонија, но досега многу малку е реализирано, иако експертите одамна посочуваа дека земјава има многу места што можат да се искористат за изградба на ветерници. Неколку европски земји, дури една третина од електричната енергија ја обезбедуваат токму од ветерот.

Вардарецот ќе произведува струја

И Корејци заинтересирани за ветерници

Претставници на јужнокорејските компании „Касеп“ и „Самсунг“ вчера го потврдија својот интерес за производство на електрична енергија од ветерници во Македонија. Тие деновиве престојуваат во Штип, во чија околина шпански „Инвал“ планира да гради фарма на ветерници со моќност од 200 мегавати.

Поради законската регулатива кај нас, според која еден инвеститор може да гради ветерници до 50 мегавати, се планира фармата кај Штип да биде поделена на 4 дела, а прво ќе се градат два дела, чија вредност е проценета на околу 150 милиони евра.

Претставниците на „Инвал“ нагласија дека се надеваат оти до крајот на годинава ќе ги завршат законските процедури и ќе почнат со монтажата, која трае од 16 до 18 месеци. „Касеп“ е водечка компанија за производство на електрична енергија во таа земја, а „Самсунг“ ако се постигнел договор, треба да ги испорача турбините и другата опрема за ветерниците. Претставниците на „Инвал“ и на корејските компании најавија дека неделава ќе го посетат и солунското пристаниште, преку кое се планирало да биде донесена опремата. (Љ.Ш.)

Корејци ќе градат ветерници во Штип

Македонија ќе гради ветерници

Македонија наесен со финансиска поддршка на Германската развојна банка KFW ќе почне да го гради првиот Ветерен парк. За проектот вреден вкупно 55 милиони евра, договори денеска потпишаа Министерството за финанси, KFW Банката и АД ELEM.

- Денеска ја затворивме финансиската конструкција за изградба на Ветерниот парк Богданци. Со договорите што ги потпишавме со KFW Банката обезбедени се 32,9 милиони евра, а останатите 22,6 милиони ќе ги обезбеди АД ЕЛЕМ од сопстевени средства - рече вицепремиерот и министер за финансии Зоран Ставрески по потпишувањето на договорите.

Во Ветерниот парк на 29 хектари ќе се постават 15 до 18 ветерници, секоја со капацитет од 2 до 3 мегавати. Вкупната производна моќ на Ветерниот парк ќе биде 100 гигават часови, а капацитетот 37 мегавати.

- Целта е искористување на обновливите извори енергија при производство на струја, намалување на емисија на стакленички гасови, но и намалување на увозната зависност на Македонија од електрична енергија - истакна директорот на АД ЕЛЕМ Влатко Чинговски.http://www.dnevnik.com.mk/default.asp?ItemID=75900BFE2E578A4E9D7A4C55158A7A6E