Елитна населба со американски стил ќе никне во општината Бутел

Близу месноста Љуботенски Пат, на 16.000 квадрати ќе се изградат вкупно 34 двокатни куќи

Снежана Калабакова

Нова елитна населба од затворен тип, со американски стил на живеење, со видеонадзор на 34 елитни куќи ќе никне во општината Бутел, близу месноста Љуботенски Пат. Инвестицијата е тешка над три милиони евра, а инвеститор е приватното градежно претпријатие „Хот и Хот“. Вчера беа поставени темелите на оградата на оваа прва населба од ваков тип што ќе се протега на 16.000 квадратни метри.

Куќите со големина од 150 до 250 квадратни метри ќе бидат изградени со еколошки материјали, а овој тип населби имаат стопроцентна безбедност и приватност на сите објекти. Нивната цена ќе изнесува меѓу 600 и 700 евра за квадрат. Објектите нема да бидат оградени еден од друг. Секој што ќе биде заинтересиран за купување куќа ќе мора да потпише купопродажен договор со „Хот и Хот“, но истовремено за влез во населбата ќе мора да потпише и кодекс на однесување. Инвеститорите велат дека ова е во согласност со идејата на идните станари да им се обезбедат приватност и ексклузивност на целиот простор. За куќите веќе имало заинтересирани звучни имиња.

„Објектите ќе бидат на две нивоа, со гаража за најмалку две возила и паркинг однапред, исто така за две возила. Секоја куќа ќе има и базен. Ќе имаат комбинирано греење, односно каминско загревање и греење на соларна енергија, а во екстремно студени денови со електрична енергија. На почетокот на населбата ќе има објект со заеднички содржини за нејзините жители, маркет ’Хедис‘, градинка со игротека, фитнес, сауна со џакузи, теретана... Услугите што ќе се нудат нема да имаат комерцијален карактер, туку ќе бидат исклучиво за потребите на населбата. Проектот ќе се реализира за две години, а првите куќи ќе бидат вселиви во јуни или јули идната година“, рече вчера Роберт Хот, претставник на фирмата-инвеститор.

„Ова покажува дека создадовме услови општината Бутел да биде пристојно и атрактивно место за живеење. Оваа инвестиција е особено важна, бидејќи е од станбената сфера. Во непосредна близина на населбата има решена инфраструктура. Особено е важно што на територијата на Бутел никнува една нова еконаселба“, рече вчера градоначалникот на Бутел, Петре Латиновски.

Вакви куќи, покрај во Америка, во последните дваесет години биле градени и во Западна Европа, во Германија и во Австрија. За нив се вели дека се добро изолирани и трошат малку енергија за загревање и ладење. Брзината на градба е фантастична и за една куќа е помеѓу 30 и 60 дена во зависност од квадратурата.