Предаден во употреба станбен објект со социјални станови во Кочани

Кочани, 29 март

Во населбата Драчевик во Кочани денеска беше предаден во употреба станбениот објект на Јавното претпријатие за стопанисување со станбен и деловен простор на Република Македонија, наманет за лица кои примаат социјална помош. Вкупната станбена површина изнесува 1.136 метри квадратни и располага со 29 стана.

Објектот го предаде во употреба премиерот Никола Груевски кој истакна дека за изградба на оваа зграда беа издвоени околу 40 милиони денари или околу 650.000 евра и оти таа заедно со зградите кои се веќе предадени во употреба во Скопје, Македонска Каменица и оние што ќе се градат и наскоро ќе се пуштат во употреба во Битола, Кавадарци, Охрид, Крива Паланка и Штип се дел од големит проект на Владата за изградба на 2.500 станови наменети за лица приматели на социјална помош, станови за млади брачни парови, станови за лица со ниски примања, станови за деца излезени од домовите за деца без родители, како и станови за комерцијална положба.

- Капиталниот објект во чии рамки беше изградена и оваа социјална зграда е вистински одраз на нашите заложби да им се помогне на што поголем број граѓани кои поради својата социјална положба се наоѓаат во една незавидна ситуација и неможност да го решат своето станбено прашање, истакна премиерот Груевски кој додаде дека изградбата на овие станови не предвидува само социјален ефект и подадена рака на оние на кои им е најпотребна, туку тој го стимулира и градежнит сектор кој е еден од најважните економски двигатели на македонската економија.

Според Владимир Бахчовановски, директор на ЈПССДП, со годишната Програма за изградба и одржување на станбениот простор за 2010 година во сопственост на Република Македонија предвидено е изградба на вкупно 1.753 стана од оваа категорија. Досега се завршени и предадени во употреба и вселени два станбени објекта во Скопје, по еден во Македонска Каменица, Кичево, Крива Паланка, Кавадарци и Кочани. Во градба се објекти во Штип, Битола и Охрид со вкупно 240 стана. До крајот на оваа година се очекува да се започне со изградба на станбени објекти во Берово и Гевгелија со 73 стана.

Рамковен договор за заем за делумно финансирање на Проектот за домување на социјално ранливи групи во износ од 25.350.000 евра потпишаа вчера вицепремиерот и министер за финансии, Зоран Ставрески, и Рафаел Аломар, гувернер на Банката за развој при Советот на Европа (ЦЕБ).

Како што соопшти Министерството за финансии, координатор на проектот ќе биде Министерството за транспорт и врски, а имплементацијата ќе ја врши Јавното претпријатие за стопанисување со станбен и деловен простор на РМ. Државата ќе учествува во реализацијата на овој проект со 25.350.000 евра буџетски средства, а вкупниот износ на Проектот е 50,7 милиони евра.

Преку Проектот ќе се засилат социјалната политика и борбата против сиромаштијата, со зголемување на квалитетот на живот на овие лица со обезбедување на нивно соодветно домување. Неговата имплементација започна во 2007 година, а се очекува истиот да заврши до јуни 2013 година. Предвидено е да се изградат 37 згради со вкупно 1.708 станови во 19 града во земјва.

Дефинирани се шест целни групи, кои ќе бидат подобни да ги користат овие станови: деца без родители над 18 години, невработени лица и лица-корисници на социјална помош, жители на региони погодени од природни катастрофи, инвалидизирани лица или домаќинства кои имаат инвалидизирано лице, социјално загрозени лица припадници на ромската популација и самохрани родители со малолетни деца.

Од почетокот на градбата ракавите ги засукале и зеле лопата в рака повеќе од 200 волонтери од САД, Германија, Полска, Шведска, Италија, Швајцарија и од Канада

Доброволци и идните сопственици на куќите забрзано ги градат првите 24 објекти во велешката населбата Тунел 2, чиј инвеститор е американската невладина организација „Хабитат“. За половина година од почетокот на градбата ракавите ги засукале и зеле лопата в рака повеќе од 200 волонтери од САД, Германија, Полска, Шведска, Италија, Швајцарија, Канада, кои дојдоа да градат дом на семејство што не го познаваат, сами комплетно ги покриваат трошоците за престој и згора на тоа оставаат донација за организацијата што е нивен домаќин. Меѓу изведувачот „Ива инжинеринг“ се и градители, ученици од американската Гимназија „Нова“ од Скопје, како и возрасните лица од фамилиите што во првата распределба ги добија 24-те стана од предвидените 90. Тие се обврзани да вложат по 400 работни часа со цел да почувствуваат дека градат нешто што подоцна ќе им припаѓа ним. 

- Во изградбата на новиот дом учествуваме со сопругата, бидејќи децата ни се под 16 години и тие според правилата не смеат да се појават на градилиштето. Задоволни сме со понудените услови, цената на еден квадрат е околу 450 евра, а во првите пет години месечната рата за отплата ќе биде помеѓу 90 до 110 евра. Ова е најдобрата понуда, која не може да се одбие - вели Димче Велев, еден од новите сопственици на становите, кои ќе се исплатуваат во наредните 20 години.

Станарите ќе имаат ретка можност да се пофалат дека во изградбата на нивните домови учествувале и претседателот на државата, сопругата на американскиот амбасадор, градоначалникот на Велес и други. Сите тие ги здружија силите и вградија симболично неколку бетонски блокови. Иако тоа е нивен мал придонес за објектот, промоцијата на проектот со овој гест е огромна.

- Голем е придонесот на „Хабитат“, бидејќи во време на криза, им овозможува на нашите граѓани да дојдат до евтин стан. Им честитам на иницијаторите што вложуваат во Македонија. Убаво е да се помогне на луѓе што се со ниски примања и на овој начин да го решат станбеното прашање - изјави Ѓорге Иванов, претседател на Република Македонија, при неодамнешниот престој кога помагаше на градилиштето на „Хабитат“ во Велес.

За првата распределба на станови имаше жестока конкуренција по пет кандидати за еден дом или вкупно 126 пријавени за 24 стана, но поплаки немаше. Инвеститорот очекува дека напролет ќе бидат комплетно завршени првите 24 стана.

- При распределбата спроведуваме процедура, која е транспарентна и се заснова на реални показатели. Ние не доделуваме станови, туку селектираме семејства, кои се вклучуваат во програма на изградба на објектите - вели Зоран Костов, извршен директор на „Хабитат Македонија“.

Тој се пожали дека поради нестабилниот курс на доларот, вредноста на инвестицијата од 2,7 скокна на 3,2 милиони долари. Станбениот комплекс се простира на 4,7 илјади квадратни метри површина, а во три фази ќе се изградат вкупно 11 објекти со 90 дома, кои ќе бидат во стар велешки градителски стил, со просечна површина од 52 квадратни метра. Населбата ќе биде комплетно завршена во 2011 година. Велешани се почестени што се први во земјава, кои ќе добијат населба за лица со ниски примања, бидејќи освен во Македонија „Хабитат“ во Европа гради станови со слични услови во Унгарија и во Романија. Патрон на мрежата на „Хабитат“ е некогашниот американски претседател Џими Картер.

Дневник - Петар Печков - 29.09.2009