Скопски сообраќај (општо)

Ќе се шират улиците, ќе страдаат тротоарите

Градските власти со проширување на неколку улици во наредните години ќе се обидат да го направат попроточен сообраќајот во Скопје и се' уште не размислуваат за изградба на примарните брзи сообраќајници како што е Јужниот булевар

Со проширување на неколку улици градските власти во наредните години ќе се обидат да го решат сообраќајниот хаос во Скопје. Улиците ќе се прошируваат на местата каде што нема да има уривања на објекти и нерасчистени имотно-прави односи, односно во најголем дел ќе се одзема простор од тротоарите, а некаде и од зеленилото. Ќе се шират „Илинденска“ и тоа на потегот од Владата до булеварот 8 Септември во Карпош, „Теодосиј Гологанов“, Првомајска и булеварот Србија, каде што градежните работи се веќе почнати.

„ИЛИНДЕНСКА“ ЌЕ СЕ ШИРИ И КАЈ ВЛАДАТА

Градоначалникот на Скопје, Коце Трајановски, рече дека во Градот имаат проект за проширување на Илинденска, која треба да има четири ленти и во спорниот дел од Владата до Градскиот парк. Проектот, според Трајановски, бил нарачан од претходната гарнитура и ќе биде ставен на гласање на следната седница на Советот на Град Скопје. За проширувањето на „Илинденска“ од паркот до Карпош веќе е одбран и изведувач, градежната компанија „Гранит“.

- Штом Советот ќе го усвои проектот за проширувањето на Илинденска кај Владата, ќе одбереме изведувач и за тој дел. Таму веќе е завршено поставувањето на атмосферската канализација. Имаме нерешени имотно-правни проблеми кај Зоолошката градина, со неколку објекти што се дивоградби. Булеварот Илинден треба да биде завршен до крајот на следната година - рече градоначалникот Трајановски.

„ГОЛОГАНОВ“ ЌЕ НЕМА СРЕДИШНО ЗЕЛЕНИЛО

Тој најави дека ќе ја прошируваат и улицата Теодосиј Гологанов која води од студентскиот дом „Гоце Делчев“ до зградата на „Нова Македонија“. Оваа улица ќе добие четири ленти, но ќе нема простор за средишно зеленило.

Инаку, според Генералниот урбанистички план на Скопје, за растоварување на метежот во овој дел на градот е предвидена изградба на фамозниот Јужен булевар, долг 17 километри, но градските власти со години го игнорираат поради прескапата изградба. По изградбата на Јужен булевар, улицата Теодосиј Гологанов, која сега ќе се проширува, треба да стане негова сервисна улица.

Трајановски во врска со ова вели дека засега им е важно „Гологанов“ да ја направат попроточна со некоја лента повеќе.

- Во тек е изработка на документација како да се изведе проширувањето. Се појавија неколку имотно-прави проблеми. Се' уште не знаеме дали улицата ќе може да ја прошириме од двете страни, тоа допрва ќе се утврди. Исто ќе се утврди и како ќе биде изграден планираниот кружен тек кај Католичката црква - изјави градоначалникот.

Јужен булевар е проект стар неколку децении, а од него досега е изграден само еден дел, зад Старата железничка станица. Дел од неговата траса минува покрај Гологанов, каде што сега има парк со тополи, но проблемот е што таму голем дел е узурпиран од привремени објекти и дивоградби, кои стихијно прераснаа во цврсти градби. На прашање зошто улицата не се шири на сметка на дивоградбите, Трајановски рече дека сегашниот проект опфаќа ширење на сметка на тротоарите и на зеленилото. Тој не одговори дали ќе се уриваат привремените објекти.

„ПРВОМАЈСКА“ ШИРОКА ДО ДРАЧЕВО

Според плановите на градските власти, четири ленти ќе добие и улицата Првомајска во Кисела Вода и тоа од месноста Рампа до Драчево. Од Градот информираат дека за ова проширување ќе пречат само два објекта на потегот од Расадник до општината. Се очекува изградбата да почне во наредната година.

Во моментов привршуваат градежните работи на раскрсницата кај Тутунски комбинат, како и на булеварот Македонска војска во Ѓорче Петров. Проширувањето на булеварот Србија, од Средното хемиско училиште до улицата Првомајска оди според планот, иако и таму се појавиле имотно-прави проблеми.

За наредната година се планира и обнова на улицата Маџари со нови тротоари и осветление, од семафорите во Ченто до населбата Маџари до мостот. Ќе се санира и патот од Средно Водно до манастирот „Свети Пантелејмон“ и ќе се воведува зелен бран на триесетина раскрсници.

Јорданка Ивановска -Дневник

тоа беше варијанта, но сакаа тоа хотелот да го изведе доколку му отстапат простор за подземни гаражи, а бидејќи ова не се случи пропадна и оваа замисла за јужен.

реално сега за сега и проширување горе на бул Митрополит Теодосиј ќе заврши работа, но исклучиво со клучка кај НоМа, вака со кружен ќе биде карамбол, а може и нема, незнам не сум паметен, сигурно има образовани сообраќајни инжињери во градско собрание !?!

па може објектот да е дивоградба но земјата да е легализирана т.е. дворното место откупено... комбинации милион!

за јужен булевар Коце сигурно нема да собере сили (средства) особено не ако сака да го турка тунелот под плоштад, за што исто е малку веројатно дека ќе го бидне доколку владата не вмеша прсти! инаку Коце уште во кампањата најави дека ќе има само проширување на бул Митрополит Теодосиј Гологанов, не дека нешто излажал... http://www.build.com.mk/forum/forum_posts.asp?TID=96&PID=31767#31767 

а за ветувањето со илинденска, незнам што да кажам, откако им ги исекоа дрвата за што да го чуваат сега тротоарот, можеби подобро ќе биде за паркинг  шала на страна поевтино решение од ова а за каков таков проток на илинденска здравје, нели имаше некој предлог од останатите кандидати за градоначалник во изборната трка да се одело под земја, но вакво решение  е и скапо и нелогично, особено на тој потег... проектов лично го оправдувам, но мора да се најде чаре илинденска пак некако да се разелени.