За чување клупи - 165 илјади евра

Општина Аеродром распиша посебни огласи со кои бара специјализирани фирми што ќе ги одржуваат фонтаните, чешмите, клупите и кантите. За таа цел се планирани да се потрошат 164.000 евра

Општина Аеродром бара фирми што ќе ги одржуваат фонтаните, чешмите за пиење вода, клупите, корпите, заштитните огради, како и таква која ќе се грижи за пешачките патеки. Најголем дел од општините за вакви работи користат услуги од јавни претпријатија и имаат една фирма избрана на јавен повик, која ќе се грижи за целата урбана опрема што ја поставиле. Но, во последно време станува пракса дел од општините да бараат фирми за се' и сешто и да ги избегнуваат услугите на јавните претпријатија. Општината покрај овие бара уште две фирми, една што ќе ги одржува спортските игралишта и друга, која ќе се грижи за детските игралишта.

Од општината информираат дека се планирани 164.000 евра за реализација на сите овие набавки. Не ги користеле услугите на јавните претпријатија бидејќи вака огласите биле потранспарентни.

- Вистинската вредност на набавките ќе се добие по завршување на постапките и таа може да биде дури и двојно пониска. И до сега одржувањето го вршеле поголем број фирми што биле избрани за најповолни понудувачи по спроведена постапка за јавна набавка. Јавните претпријатија не го вршат одржувањето и се распишуваат јавни огласи во интерес на транспарентното работење на општината - одговараат од општината.

Само за еден месец од кога почнаа да се трошат буџетите од оваа година, огласите се преполни со вакви набавки преку кои се бара фирма за се' и сешто. Покрај овие набавки, Аеродром бара и фирма за набавка и монтажа на урбана опрема (клупи, канти, заштитни огради), како и за изградба на јавни зелени површини.

Според градоначалникот на општина Аеродром, Ивица Коневски, нема ништо спорно за се' да имаат посебна фирма бидејќи така постручно ќе биде одржувана урбаната опрема во општината.

- Бараме фирма што ако има дефект, на пример на фонтаните, ќе го отстрани. На некои фонтани имаме потреба од комплетна реконструкција. Во Аеродром има вкупно четири големи фонтани и десетина мали. Не ги користиме јавните претпријатија бидејќи од нив не можеме да го добиеме она што го бараме. На тие големи фонтани од општината има потреба на некои да се залепат плочки. ЗВо зима треба да се сепарираат. Ние немаме мајстори во општината и затоа ќе си се грижат фирми што ќе ги избереме на оглас - објаснува Ивица Коневски, градоначалник на Аеродром.

Според условите од огласот за фонатаните, Општината бара од фирмите што ќе учествуваат на набавката да имаат потребна механизација, алат, материјали и резервни делови за контрола и одржување на изградените фонтани на територијата на општина Аеродром. Друг услов е и најмалку едно високообразовано редовно вработено лице дипломиран инженер со завршен технички факултет и минимум три квалификувани работници во редовен работен однос.

Другите општини имаат различна пракса во одржувањето на урбаната опрема на своите територии. Општина Центар има фирма избрана на конкурс, која ќе се грижи за целата урбана опрема на територијата на општината преку цела година. Додека Град Скопје, на пример, за одржување на фонтаните и чешмите ги користи услугите на ЈП „Водовод и канализација“, за клупите и кантите се грижат ЈП „Паркови и зеленило“ и приватна фирма избрана на конкурс.

Александра Филиповска

Поправени градските часовници

Сите 18 градски часовници се во функција и го покажуваат точното време, информираат градските власти. Неодамна беа поправени четирите часовници што досега не работеа и беа проверени преостанатите 14.

- Сите градски часовници покажуваат точно време и се осветлени. Поправката на часовниците ја извршија екипите на фирмата „Електроизградба“, задолжена за нивното одржување, а парите во износ од 320.476 денари се обезбедени од градскиот буџет - велат градските власти.

Во буџетот за 2010 година, Град Скопје за оддржување на градските часовници издвои милион денари.

Тезгињата за повеќе намени, кои Град Скопје планира да ги поставува на плоштадот „Македонија“, нема да бидат изработени пред Нова година. Со тоа и скопјани не ќе можат да купуваат новогодишни сувенири и подароци за претстојните празници на локациите каде што вообичаено изминатите години имаше тезгиња, кои надлежните ги забранија поради лошата организација. - Унифицираните продажно-промотивни штандови имаат долгорочна функција за подобрување на естетскиот изглед на јавните површини. Стратегијата е тие да се изработат и да им се издаваат на регистрирани субјекти, кои се занимаваат со изработка на рачни ракотворби и уметнички дела, како и на занаетчиите, за да се афирмира традиционалното и да се подобри туристичката слика на градот. Врз основа на избраното идејно решение ќе се направат проекти со конечниот изглед на штандовите, а потоа ќе се изработат - велат во Град Скопје. Оттаму информираат дека заинтересирани за тезгињата се и скопските општини, и доколку и тие се вклучат во проектот, во иднина ќе се унифицира урбаната опрема од овој вид на сите јавни површини. Со последниот ребаланс на градскиот буџет, за тезгињата се предвидоа четири милиони денари, а за нив пари ќе се издвојат и во буџетот за следната година.

Р.П