Вечерен џоинт на Железара

27 Август 2013 - 09:10

Утрински џоинт на Железара

26 Август 2013 - 08:51

ПОРАДИ KРИЗАТА, УШТЕ ДОЛГО ЌЕ НИ БИДЕ ВАЛKАНО

Металургијата побара одлагање на екостандардите

Металуршката индустрија ги нема стотината милиони евра потребни за да ги воведе сите еколошки стандарди до 1 април 2014 година и во изминатиов период сите металопреработувачки капацитети побараа одлагање на крајниот рок од Министерството за животна средина. Поединечни барања со образложенија и нови предлог-рокови доставиле „Макстил“ АД Скопје, Скопски легури, „Југохром фероалојс“ ДОО Јегуновце, „Фени индустри“ с. Возарци, Kавадарци, „Арчелормитал“ Скопје. Законот за животна средина овозможува одлагање до 2019 година на поединечни капацитети, со одлука на Владата. Дотогаш може да чадат и да загадуваат исто колку и досега.

Kапиталците имаат привилегии

Образложението на металургијата е дека моментно не можат да инвестираат во мерките за заштита на околината затоа што им е намален обемот на работење. Потенцираат дека инсистирањето да се инвестираат милиони за воведување нови технологии до април 2014 година ќе ги принуди да стават клуч на врата.

- Генерално се проценува дека сите компании ќе треба да инвестираат околу 200 милиони евра за да воведат филтри, пречистителни станици, нови технологии за намалени емисии во воздухот, водата и во почвите. Од овие пари најголем дел треба да ги дадат металуршките компании затоа што тие се тешка индустрија и нивните екоинвестиции се најскапи - велат во Министерството за животна средина.

Надлежните објаснуваат дека барањата не значат дека на сите ќе им биде одобрено одлагање, ниту дека сите одлагања ќе бидат до 2019 година. Во однос на загадувањето, смируваат дека одлагањето ќе значи дека истото загадување ќе го трпиме подолго од предвиденото, а ново загадување нема да има.

- Согласно со законот, ако не може да се постигнат условите за добивање интегрирана еколошка дозвола, Министерството ја известува Владата со предлог за добивање дополнителен рок, кој не може да биде подолг од 1 април 2019 година. Лани во јули беше донесена одлука за пакет-мерки за поддршка на црната и на обоената металургија, меѓу кои и пролонгирање на рокот за еколошка дозвола. Со тоа нема да се создаде опасност од загадување на средината со нови дополнителни емисии во однос на постојните, а инсталациите ќе може да ги реализираат активностите од оперативен план во целост и покрај сложените услови на стопанисување во време на светска економска криза - велат во Министерството.

Оттаму додаваат дека барањата од фабриките не значат дека сите ќе добијат одлагање. Стручните служби на Министерството секое барање го елаборираат поединечно и ќе го достават до Владата ако го оценат како реално. На одлагање на роковите може да се надеваат само фабриките што се од капитално значење за економијата и каде што екоинвестициите се огромни. За останатите индустриски сектори, текстилната, прехранбената итн., можноста за одлагање не важи и тие мора да ги исполнат еколошките обврските до април 2014 година.

„Макстил“ и „Фени“ први на листата

Прва компанија која практично веднаш по дадената можност побара одлагање беше „Макстил“, со образложение дека во желбата за инвестирање за заштита на околината ги спречила светската економска криза и неможноста да земат поволен кредит. Од „Макстил“ нагласија дека за исполнување на сите барања од дозволата им се потребни околу 18 милиони евра.

Од „Фени“, пак, кои досега инвестираа 10 милиони евра за подобрување на еколошките стандарди велат дека побарале одлагање за две од предвидените пет години.

- „Фени“ поднесе барање за одлагање на две обврски што произлегуваат од еколошката дозвола: рекултивација на одлагалиште за троска и системот за прочистување гасови од електропечките. Нашето барање се однесува за продолжување на роковите од две години, до 2016 година, а се должи на недостиг од финансиски средства поради актуелните глобални економски состојби, поточно ниската цена на никелот на светските берзи. Сите други обврски од ИСKЗ-дозволата ни се уредно завршени или се завршуваат во дадените рокови до 2014 година. Досегашните екоинвестиции го чинат „Фени“ над 10 милиони евра, каде што влегуваат два нови електростатски филтри, пречистителна станица за води, ремонт на двата стари електростатски филтри, валоризација на троска, систем за мониторинг на излезни гасови од рото-печки, имплементација на ИСО-стандардот за управување со животна средина итн. Дополнително ќе ни бидат потребни уште од 4 до 6 милиона евра, зависно од типот на опремата, за во целост да ги исполниме сите обврски - вели заменик-генералниот директор Никола Ризов.

Соња Христовска

Цементарница според прописите

Од „Усје“, кои не добија можност за одлагање, велат дека веќе ги исполниле сите барања на А-интегрираната еколошка дозвола.

- Сите активности пропишани во дозволата се завршени. Пред десетина дена успешно беше пуштена во работа пречистителната станица за атмосферските води, што е прв ваков пример во Македонија. Oд 1998 година, кога „Усје“ стана дел од Групацијата „Титан“, инвестиравме 68 милиони евра, од кои 36 милиони во активности кои директно се однесуваат на заштита на животната средина - велат во „Усје“.