Скопје 2014

Станарите не сакаат барокни фасади

Во сериозни проблеми западна владината и градска идеја за изградба на нови фасади на четири згради на плоштадот Македонија, како дел од проектот „Скопје 2014“. Проблемот се појавил за согласностите од станарите, но и поради авторските права за арфитектурите на објектите, бидејќи се работи за стари или заштитени згради, ги информира градоначалникот Коце Трајановски членовите на Советот на Град Скопје на една од последните седници. Во рамките на проектот „Скопје 2014“, како што беше прикажано и на видеопрезентацијата, предвидено е да се обноват фасадите на четири згради - на „Пелагонија“, над кафеаната „Пелистер“, зградата до неа, како и зградата-лепенка што излегува на улиците Никола Вапцаров и Максим Горки, каде се наоѓаат кафулињата „Тренд“ и „Лондон“.

Според скопскиот градоначалник, минатиот месец беше избрано идејно решение за зградата над „Пелистер“. За објектот на „Максим Горки“, каде што порано се наоѓаше продавницата на „Кооператива“, излегол проблем.

- Десната фасада на зградата, над кафулето „Лондон“ е заштитена. Разговаравме со надлежните. Тешко дека ќе може нешто да се измени по ова прашање. Во врска со левата страна, зградата има повеќе сопственици и се уште немаме согласност од нив. Би распишале конкурс за идејно решение само доколку се сложат сопствениците - рече Трајановски.

Од Одделението за односи со јавноста објаснуваат дека правната постапка за регулирање на ова прашање е во тек.

Во врска со зградата на „Пелистер“ и избраното идејно решение од пред еден месец, како и за другите згради за кои допрва ќе се распишуваат конкурси, членот на Советот Петар Арсовски го запраша градоначалникот дали ги консултирале авторите, односно архитектите пред да распишат повик за менување на фасадата по нивна желба.

- Без да ги консултираме авторите нема да одиме на измена на изгледот на објектите. Нашиот сектор инсистираше на оваа обврска. А за зградата над „Пелистер“ мислам дека авторите не се живи - рече скопскиот градоначалник.

Советникот Арсовски му одговори дека не е изговор доколку авторите не се живи, бидејќи законската обврска за авторско дело има рок на важност од 30 години.

Во контекст на разубавување на плоштадот со нови фасади, опозициските советници го прозваа Трајановски да се погрижи за целата околина на плоштадот. На пример и за зградата над „Типо“, која во моментов е окупирана од масивни билборди, при што нејзината фасада воопшто не се гледа. Според советниците, нема логика да се обновува надворешниот изглед на зградите на плоштад, а објектот на „Типо“ да продолжи да боде очи со огромни шарени реклами. Градската власт даде објаснување дека зградата била приватна и дека немале надлежност, но заборави да додаде дека и зградите на кои ќе им ги менува фасадите се, исто така, приватни. По оваа изјава, Трајановски доби критика од советниците дека тоа не го амнестира од одговорноста да воведе ред околу билбордите кои ги наградуваат зградите, бидејќи се работи за центар на градот.

Според најавите, планираните згради треба да добијат нови фасади дури в година. Не е познато дали изгледите ќе бидат исти како на видеопрезентацијата на „Скопје 2014“ во барок стил, бидејќи според објаснувањето на надлежните, „изгледот ќе се утврди во зависност од понудените решенија“. Конечниот лик објектите треба да го добијат до 2014 година. Вкупната сума за изградбата ќе се знае по изборот на идејните решенија и на изведувачите.

Јорданка Ивановска