Споменик Филип II - Битола

Пеце Стефановски

Споменикот на Филип Втори, кој беше планиран да се постави на Широк сокак во Битола ќе доцни, иако неколку месеци се наоѓа во дворот на општинската зграда. Неофицијално дознаваме дека споменикот, кој според најавите требаше да биде поставен уште во април, ќе го почека денот на ослободувањето на Битола 4 ноември, до кога треба да биде позната и оценката од Европската комисија за напредокот на Македонија.
Половина година, пак, на плоштадот Магнолија изведувачите ги вршат финалните подготовките околу неговиот постамент. Според проектот, споменикот ќе биде поставен спроти градската саат-кула, а ќе биде украсен и со античка декорација со штитови, венец и фонтана со сонцето на Вергина.
Локалната власт тврди дека ова е најосмислениот и најубав градски простор, а политичките противници дека изведбата е кич со груба антиквизација на најатрактивниот простор во градот.
Од битолската организација на СДСМ реагираат дека кочењето на проектот е смислено сценарио на власта.
- Нека не ја лаже градоначалникот битолската јавност со технички прашања. Механиката е на фонтаната, а споменикот веднаш може да се постави наместо да лежи во дворот на општината. Сите знаат дека Груевски го натера да крене рачна кочница на оваа антиквизација, веројатно до бриселскиот извештај - вели професор Томе Наумов, координатор на советничката група на СДСМ.
Градоначалникот Владимир Талески, пак, ги отфрла обвинувањата и тврди дека станува збор за технички прашања.
- Деведесет отсто од работите се завршени, а на фонтаната има мошне сложена механика и сакам работите да се доведат до перфекција. Ова е чисто локален проект и со буџетски средства на општината, па никој друг не може да одлучува кога споменикот ќе биде поставен, а тоа ќе биде за многу кратко време. Дека централната власт нема влијание говори и фактот што покрај преостанатите обележја предвидени со идејниот проект, се поставени и плочите со биографијата на големиот македонски крал и војсководец - вели Талески.

Филип Втори доцни поради штитот

Коњаникот чека во дворот на битолската општина да се доведе до перфекција работата на луксузната фонтана во форма на владетелскиот штит

Грандиозниот споменик на македонскиот крал Филип Втори половина година чека во дворот на битолската општина да биде однесен на плоштадот Магнолија во центарот на Битола. За одложувањето на неговиот кас до Широк Сокак општината се правда дека е поради средување на техничките детали на изградениот меморијален комплекс, кој зафаќа повеќе од 100 квадратни метри пред Саат-кулата. Градоначалникот на Битола, Владимир Талески, вели дека Филип ќе почека додека не бидат уверени оти беспрекорно функционира сложената фонтана со форма на кралскиот штит. Фонтаната деновиве со неколку проби беше пуштена во употреба, а битолчани ги изненади со својата подвижност. Штитот се подига, спушта, се навалува странично, а осумкракото сонце што е исцртано на него го пронижуваат повеќе водоскоци. Сето тоа е поддржано со специјални хидраулични, светлосни и музички ефекти.

- Споменикот е завршен од многу поодамна, едноставно чекаме момент кога ќе бидеме уверени дека и 1.000 пати да се пушти фонтаната, нема да има никаков проблем. Се работи за многу сложена фонтана што има две програми. Едната за секојдневни, а другата за посебни моменти. Летото најверојатно 100 дена ќе работи програмата „Б“. Тоа значи една аудио-визуелна атракција, која треба да отслика еден амбиент од периодот на Филип Втори - вели Талески.

Најголемиот дел од работата е завршена, поставена е фонтаната, постаментот за споменикот, клупите, штитовите, се очекува за скоро време Филип да „дојава“ на Широк Сокак. Досега беа направени повеќе корекции кај споменичниот комплекс, а од постаментот беше повлечен кралскиот венец.

- Тоа е екипа од стручњаци, која работи во проширен состав. Веројатно се прават варијанти. Понудија една варијанта во предниот дел да има еден таков венец, ако ценат ќе го постават, ако не, ќе го сменат. Се' е во рамките на проектот и сакаме совршено да биде направен - вели Талески.

И дипломати во Брисел се интересирале за споменикот. Министерот за одбрана, Зоран Коњановси, за битолска телевизија потврди дека додека престојувал во седиштето на НАТО, го прашале дали навистина во Битола се гради споменик на Филип. Тој им појаснил дека споменикот е во чест на владетелот, кој ја основал Хераклеја до Битола и дека со ова не присвојуваме нешто што е регионално.

Споменикот го изработи велешкиот скулптор Ангел Коруновски. Филип е прикажан на неговиот коњ со прстот вперен во народот. Заедно со постаментот ќе се издига на висина над осум метри. Ова е најграндиозниот споменик што се поставува во Битола.

- Концептот за Еврорегион меѓу пограничните општини на Македонија, Грција и Албанија, институтот „Иствест“ не успеа да го продолжи. Но, останаа одличните релации со општините, кои ни помагаат за лобирање и добивање проекти од програмата Интерект 3 и ИПА-фондовите. Ние поддржуваме инфраструктурни проекти во Грција, а тие ја поддржаа реконструкцијата на патот М5 во Битола - велат од општината. Спомен-обележјата од античко време, освен археолошките локалитети, во Битола скоро и да не постојат. Иако има 175 меморијални споменици и друг вид спомен-обележја најголем дел од нив се посветени на НОБ.