Голем Ринг

Новите градби во скопските населби, кои се градат со се поинтензивно темпо, го прекинаа нормалното струење на воздухот што порано можеше да се почувствува во градот дури и во најжешките денови. Старите скопјани забележуваат дека воздухот во градот веќе воопшто не циркулира и повеќе не може да се почувствува свежото ветре, карактеристично за главниот град. Сместен во котлина, Скопје неповратно се задушува поради преобразениот изглед на ниските куќи и згради, надградени во висококатници. Згора на тоа урбанистичките планови предвидуваат цели нови населби - гратчиња во мало, деловни и трговски центри или катни гаражи на секој чекор, а некаде се отиде и понатаму, па во плановите се зацртаа стокатници до небото. Еколошките здруженија сметаат дека проблемот со загадувањето е само последица на неограничениот развој на градот, кој треба да се постави во определени рамки. - Се што се предвидува да се гради, како на пример поголем паркинг-простор кој се обезбедува со катните гаражи, е последица на нешто друго. Во овој случај тоа е зголемениот број автомобили, што, пак, е последица на зголемен број жители. Но вистинскиот проблем е неограничениот пораст на градовите. Веќе јасно се гледа дека Скопје се изградило од едниот до другиот крај на котлината. Потребно е да постојат некакви граници - вели Петар Бошевски од граѓанското здружение „Екомисија“. За протекот на воздухот низ центарот на градот проблематична беше изградбата на населбата Капиштец. Многумина тогаш тврдеа дека со блокот високи згради се запира струењето од Водно, кое треба да ги претставува белите дробови на Скопје. Архитектите посочуваат дека генералниот урбанистички план е оној кој го содржи одржливиот развој на градот и каде се внимава да не се предвидуваат премногу високи градби. - Во посебна студија се вметнати сите аспекти, социјални и економски и во неа јасно се кажува дека не е пожелен стихијен и неконтролиран развој на градот. ГУП е документот каде се води сметка за тоа да се зачува улогата на шумите во прочистувањето на воздухот. Така, и новите градби во подножјето на Водно не се повисоки од 21 метар. Што значи, тој план говори дека не може да се апсорбира повеќе од предвиденото, ниту како број на население, ниту како вработувања. Но требаше да се направи просторен план за Скопје со кој ќе се каже до каде можат да одат неговите граници. Генерално, препораките од ГУП се запазуваат, но само врз тоа што е во опфатот на овој план. Скопје има проблем со она што е надвор од планот, а такви се на пример Припор, Сопиште, Батинци, Студеничани кои немаат атрибути на градска населба - вели архитектот Никола Велковски. Градските власти потврдија дека законот пропишува дека Министерството за животна средина и просторно планирање е надлежно да изработи просторен план. Последниот план датира од дамнешната 1985 година, кога градот изгледал многу поинаку отколку денес.