Плоштад Слобода и кеј на река Отиња - Штип

Штип бара два милиона евра да го преуреди центарот на градот

Идејата е со кредит од Светска банка да се преуреди коритото на Отиња во паркиралиште

Иван Бојаџиски


Штип - Големата собраниска сала во Штип беше претесна да ги собере сите заинтересирани архитекти, градежници и граѓани што се одзваа на повикот на градоначалникот Зоран Алексов и дојдоа на јавна трибина за уредување на централното градско подрачје. Многумина дадоа свои предлози за тоа како во иднина да изгледа најугледната штипска локација, а група архитекти се понудија бесплатно да работат на проектот. Кај сите присутни на трибината заеднички беше ставот дека градоначалникот иницирал исклучително значајно прашање за кое во Штип се дебатира над три децении, прашање кое на центарот на градот ќе му обезбеди убавина и функционалност. Многумина од нив, стручни и помалку стручни, дадоа свои предлози за овој проект.

Идејата е Штип, со кредит од Светска банка во висина од два милиона евра, дел од коритото на реката Отиња да го преуреди во паркиралиште за 200 возила и со тоа да го реши се поголемиот сообраќаен хаос во централното подрачје. Во проектот е содржана и идејата улицата „Ванчо Прќе“, која уште се нарекува и трговска улица, да биде претворена во пешачка зона.

„Штип има голема потреба на еден ваков начин да реши повеќе свои проблеми сврзани со централното градско подрачје, а кои со години се во фокусот на барањата на неговите жители. Градот е регионален центар, а нема своја пешачка зона, додека проблемот со места за паркирање на се' поголемиот број автомобили од ден на ден станува се' поизразен. Разговаравме со Светска банка која даде начелна согласност за одобрување на кредитот што ќе го враќаме во наредните десет години. Првичните анализи се дека ратите кои на годишно ниво ќе изнесуваат 200.000 евра ќе можеме да ги подмируваме од наплатата за паркирање на возилата“, вели градоначалникот Алексов.

Идејата во техничка документација ја има преточено ЈП „Штип проект“, но таа допрва ќе се доградува. Според неа, коритото на реката Отиња, од Народниот театар, па се' до црквата „Свети Никола“, ќе биде спуштено за два метра, за колку што го наполниле со земја наносите од талог во изминатите стотина години. Елена Арсова, советничка за урбанизам во кабинетот на градоначалникот, вели дека на Отиња ќе се изградат повеќе платформи што ќе ја имаат функцијата на паркиралишта, при што ќе се води сметка за обезбедување паркинг-простор на 88 возила на жителите од улицата која ќе стане слободна пешачка зона.

„Големиот интерес на штипјани и успешноста на јавната дебата за уредувањето на централното градско подрачје ни даде нов елан во решеноста да истраеме на овој проект за кој во градот како негова голема потреба се дебатира над три децении. Првите симулации покажаа дека со наплата за паркирање од 20 денари на час, градот сам ќе може да си го враќа кредитот. Иако имаме понуди проектот да го правиме по принципот на јавно приватно партнерство, засега остануваме на ставот да биде тоа исклучиво проект на Општината“, потенцира Зоран Алексов.

Со реализацијата на оваа идеја, улицата „Ванчо Прќе“ како слободна пешачка зона ќе се поврзе со плоштадот „Слобода“, кој преку Камениот мост, пак, на Отиња и платформите на неа ќе се спои со улицата „Генерал Михајло Апостолски“ од левата страна на Отиња. Еден таков проект би му дал на градот сосема нова визура, би го разубавил центарот и би му дал нови функционални содржини.

http://utrinski.com.mk/?ItemID=B314B2E1A880C449A1F7E030C2D09383