Новата зграда на Турскиот театар, која долги години беше најавувана како капитален проект, во план е да се гради во близината на новата железничка станица. Но изградбата се одолжуваше поради нерасчистени имотноправни односи на парцелата предвидена за градба. Иако спорот не е решен, почетокот на изградбата се најавува за август

Идејното решение предвиденува главен хол издигнат на три нивоа, голема сала со 29 седишта и мала сала со 140 седишта

Во август ќе почне изградбата на новиот објект на Турскиот театар, која се одложува последниве неколку години поради нерешен имотноправен спор за локацијата. Од Министерството за култура нема потврда дека спорот е решен, и покрај амбициозната најава од раководството на Турскиот театар за почнувањето на градежните работи.

- Од формално правен аспект постапката е во тек, но наскоро ќе биде решена - вели Анита Јовановска, порпаролка на Министерството за култура.

На 31 мај се одржа јавното отворање на понудите за изведување затворена карабина за изградба на новиот објект.

- Се очекува комисијата за јавни набавки да донесе одлука за избор на најповолна понуда и најдоцна во август изведувачот да се воведе во работа. Со договор меѓу Министерството за транспорт и врски и Министерството за култура, Турскиот театар доби 2.500 квадратни метри плац, каде што ќе се гради - вели Атила Клинче, директорот на театарот.

Според него, ако во рокот за жалбената постапка нема жалби, ќе се пристапи кон потпишување на договорот.

- Маркицата е чиста. Да се надеваме дека ќе нема жалби и дека проектот ќе напредува. Мојот дел од работата е успешно завршен. Имаме дури 4 фирми-понудувачи, што е одлично - вели Клинче.

Идејата за нов објект на Турскиот театар е иницирана уште од 2006 година, кога двата театри (Турскиот и Албанскиот) станаа самостојни правни субјекти. Новата зграда на Турскиот театар, која долги години беше најавувана како капитален проект, во план е да се гради во близината на новата железничка станица. Но изградбата се одолжуваше поради, како што пред неколку месеци изјавија од Министерството за култура, нерасчистени имотноправни односи на парцелата предвидена за градба.

„Потребно е проширување на маркицата со еден мал дел што се наоѓа во приватна сопственост. Поради проблемите од имотноправен карактер на локацијата, во тек се измени во основниот проект, затоа што постојната локација се наоѓа покрај Центарот за социјални работи на градот Скопје и приватни објекти, кои треба да се дислоцираат“, изјавија тогаш од Министерството за култура.

Сега оттаму нема официјална потврда дека спорот е решен. Сепак, од Турскиот театар се оптимисти и најавуваат дека изградбата на театарот ќе почне уште во август, а се оценува дека за комплетно завршување на новиот објект ќе бидат потребни околу две години.

Идејното решение на новиот театар е на архитектот Виктор Михајлов, и во него се предвидени три нивоа, главен хол издигнат на три нивоа, голема сала со 329 седишта и мала сала со 140 седишта. Предвидено е да има галерија, книжарница, национален ресторан и слично.

- Новиот турски театар е дел од капиталните инвестиции на Владата на Македонија, а имаме најави дека во следните фази на градба ќе се приклучи и турската влада - вели Клинче.