Aalborg, Олборг, Данска

Овој патепис е дел од тура што ја направив низ Гетеборг, Малме, Копенхаген, Орхус и Олборг. Ќе гледам да не ги трупам темите со слики за да нема се и сешто.

Олборг е четврт град по големина во Данска со околу 140.000 жители. Најголем град на северот од Данска, но не и најсеверен.

Фантастичен град од повеќе причини (да не пишувам премногу), но она што најмногу ме фасцинира беше среденоста на градот. Можам слободно да кажам најсреден град што сум го посетил досега. Сите улици со максимум 8-10 години стар асфалт, ни во Германија сеуште немам видено толку добро нивелирани шахти, тротоарите совршено рамни иако сите поплочени, зеленило насекаде. Сите останати градови се валкани за Олборг бидејќи овде немаше ни прашина на улиците, а не па пластика или хартија. Ќе го процените тоа и самите од сликите, но еден интересен податок вели дека Европската комисија донела заклучок дека граѓаните на Олборг се најзадоволни луѓе во Европа со својот град!

Како и сите поголеми скандинавски градови, така и овој има многу квалитетен и високорангиран универзитет - Олборг универзитет. Еден мал куриозитет што не поврзува со него е дека таму имаме нашинец - проф. д-р. Петар Поповски од Охрид кој работи како истражувач и заедно со 4ца негови колеги е добитник на награда од данската принцеза за најдобри истражувачи поради нивната работа во поставување на темелите за 5G мрежата.

Се надевам ви се допаднаа сите градови и дека ќе ви послужи како мотивација да ги посетите.