За попрецизна анализа правиме споредба со цените за ноќевања на хотели од исти ланец со иста или идентична категоризација. Во Македонија има два такви хотели од светски брендови. Тоа се “Холиеј Ин” и “Бест Вестерн”.

Една ноќ во “Холидеј ин” во центарт на Скопје чини 140 евра. Во Софија ноќевање во “Холидеј Ин” е речиси трипати поевтино, или околу 50 до 60 евра.

Двојно поевтино од Скопје ќе проспиете и во овој хотелски ланец во Атина, каде цената за една ноќ е 70 евра. Малку поскапо од Атина, но далеку поевтино од Скопје е ако спиете во “Холидеј ин” во Белград, таму цената е 85 евра за една ноќ.

И во Виена за една ноќ во “Холидеј Ин” е поевтино, отколку во Скопје. Таму ноќевање е околу 105 евра. Речиси иста цена, односно 30-тина евра повеќе, или 176 евра ќе ве чини ако резервирате хотелска соба во “Холидеј Ин” во Париз, непосредно до париската опера. Ако пак ноќевате во истиот хотел во Нотердам, тогаш за една ноќ ќе платите 210 евра. Толкава сума ќе одвоите и ако ноќевата во “Холидеј Ин” во центарот на Лондон.

Сликата е речиси идентична и со вториот брендиран хотелски ланец во Македонија, “Бест Вестерн”. Една ноќ во “Бест вестерн” во Скопје ќе ве чини 120 евра, што пак е двојно поскапо од ноќевање во истиот ланец хотели во Софија, каде цената е 60 евра.

Во Атина за ова хотелско сместување ви се потребни 70 евра за ноќ. 5 до 10 евра повеќе се плаќа за ноќ во “Бест Вестерн” во Белград, но тоа сепак е 40 % пониска цена отколку онаа што Ви е потребна за во Скопје. И во Виена е поевтино ако се одлучите за овој хотелски ланец. Соба се наоѓа и за 70 евра.

Интеренсо е што ако ги погледнете понудите на “Бест Вестерн” хотелите во Лондон и тоа во централното градско подрачје, тогаш ќе видите дека хотелска соба во “Бест Вестерн”, категоризиран со 4 звези е околу 100 евра, или 20 евра поевтина од сместување во Скопје.

Само 20 евра повеќе, околку во Скопје, ви се потребни ако се одлучите да преспиете во “Бест Вестерн” во Париз, непосредно до Ајфеловата кула.


СКОПЈЕ 2014 И НИСКОБУЏЕТНИТЕ АВИО-КОМПАНИИ ЈА СТАВИЈА МАКЕДОНИЈА НА СВЕТСКАТА ТУРИСТИЧКА МАПА

Порастот на цените на хотелските сместувања почнува пред пет години, кога со тогашните активности на владините институции почнува да се афирмира Македонија како турситичка дестинација, а воедно со тоа во Македонија се враќаат туристите од проанешните простори на Југославија, пред се српските туристи.

Но, бумот во цените и нивното двојно, па и тројно зголемување се случува последните три години, откако Скопје 2014 го прави главниот град на Македонија заинтригирачка туристичка дестинација, а особено по изградбата на новиот аеродорм, “Александар Велики” и влегувањето на пазарот на нискобуџетните авио-компании, кои го зголемија бројот на туристи, по што се појави и недостаток на хотелски сметсувачки капацитети. Некои податоци покажуваат дека ова лето во Скопје, во месеците од мај до септември практично било невозможно да се резервира хотелска соба. Од тие причини на интернет сајтовите кои нудат сместување се повеќе има таканаречени домашни апармани. Многумина скопјани ги издваат становите и на еден ден и тоа по цена од 45 евра па нагоре.

Дончо Таневски, претседател на здружението на хотелиери, ХОТАМ, вели дека е неспорен фактот за пораст на странските туристи во Македонија последните четири пет години, а со тоа и потребата од зголемување на сместувачките капацитети.

-Цените кај хотелското сместување се многу флексибилни, посебно кај делот од сместувачките капацитети чие работење е со сезонски карактер, како на пример, Охрид, Струга, Дојран и слично, со исклучок на градот Скопје кој е економски, културен, бизнис центар и во него има движење на посетители во текот на 12 месеци. Како што споменавме Скопје е бизнис и административен центар, но исто така да не заборавиме дека веќе втора година имаме нискобуџетни летови од Европа до Скопје и обратно, со што побарувањето за сместување во Скопје е зголемено, но воедно Скопје во моментов има премалку активни сместувачки капацитети во однос на побарувачката. И не случајно од минатата година наваму е отпочната изградба на неколку хотелски капацитети, а се надеваме дека ќе се градат и други со тоа што понудата и побарувачката ќе дојдат на некое уедначено ниво и тогаш цените во Скопје ќе паднат, како што и сами споменувате и компарирате, на ниво со цените во земјите во регионот, вели за Денешен.мк, Таневски.

Тој потенцира дека овој наплив на туристи стана предизвик и за брза заработувачка, па така тука ја гледа и една од причините зошто цените на сместување во Скопје се толку драстично повисоки од оние во регионот, па и од некои земји во западна Европа.

- Несомнено проектот Скопје 2014 е една од причините за зголемениот број на туристи, а како што напоменавме погоре голем фактор е и воведувањето на нискобуџетни авиолинии до европските метрополи. Во последните години има видлив пораст на сместувачките капацитети, пред се на приватното сместување како соби (изградени и опремени по теркот на хотелска соба) и апартмани (по теркот на апартманите кои се издаваат во високо развиените туристички земји). Голем број на граѓани бараат алтернативни начини да обезбедат егзистенција на своето семејство, и секако туризмот е еден од тие начини, а воедно еден голем број од работничките одморалишта (~90%) кои беа изградени во периодот до 88 година се конверзирани во хотелски капацитети, вели претседателот на ХОТАМ.

САМО ЗА КАФЕ, ХРАНА И ПИЈАЛОК СТРАНЦИТЕ ПОТРОШИЛЕ НАЈМАЛКУ 4 МИЛОНИ ЕВРА

Статистиката покажува дека Скопје оваа и минатата година станува далеку попосетена дестинација за странците, отколку што тоа е Охрид или кој било туристички центар во Македонија.

- Точно е дека Скопје имал повеќе странски посетители отколку Охрид. Но мора да се има во предвид дека Скопје е метропола и живее 12 месеци во годината, посетуван со најразлични цели, а на нашите гранични премини и аеродромската пасошка контрола не се води евиденција за целта на посетата, дали се работи за туристички посетители или пак бизнис, култура, едукација и слично, вели Таневски, потенцирајќи дека сепак несомнена улога и влијание во зголемениот број на странци има новиот лик на главниот град, преку проектот Скопје 2014.

Статистичките податоци покажуваат дека во периодот јануари-септември 2013 година, во споредба со истиот период од претходната 2012 година, бројот на странските туристи е зголемен за 12.7%. Воедно има зголемување и на бројот на ноќевања на странци за 7,6 %, што практично значи дека голем дел од нив остануваат повеќе денови во Скопје.

Заклучно со септември оваа година Македонија ја посетиле 316 731 странски турист, што во споредба со истиот период минатата година е зголемување за 35 772 туристи. Најголем дел од нив биле или ноќевале во Скопје. Најбројни биле турските, српските, холандските, полските, словенечките и грчките туристи.

Статистиката покажува дека речиси и да нема европска држава од која немало странски посети на Македонија. Забележителен е растот на турсити од Азија. Предничат кинезите и јапонците.

Сите овие странци во Македонија торошат пари по разни основи. Според статистистичките информации од Народна Банка на Република Македонија реализираниот прелив на девизи по основ на “Патување” во 2012 година изнесува € 182.718.454. Во 2011 година реализираниот прелив по основ “Патување” изнесувал € 171.223.685,17, по што може да се забележи раст во 2012 година. За оваа 2013, НБРМ се уште нема официјални податоци.

Но, математички ако се пресмета условно наречена потрошувачката потреба на странците кои биле во Македонија за најосновните потреби, храна и пијалоци, тогаш евидентена е и оправданоста од проектот Скопје 2014, односно тој проект носи странски пари во Македонија.

На пример: ако Македонија ја посетиле во првите девет месеци околу 315.000 странци и ако просечно останале само еден ден, тогаш простата математика покажува дека минимум, само за најосновните потреби потрошиле, околу 4 милиони евра. До оваа минимална сумна се доаѓа ако во просек еден турист во денот испие две кафиња, чија просечна цена е околу 70 денари, двапати во денот да потрошиле по околу 400 денари за храна, и најмалку две испиени пијачки, чија цена во просек е околу 120 денари. Ако на ова се додадат и парите потрошени за смествање тогаш приливот на странски пари е далеку поголем.

Иако Македонија нема морски туристички капацитети, сепак алтернативниот тип на туризам, за кој има инзвонредни услови за развивање, е елемент кој може да го нуди на странците. Експертите за туризам велат дека токму тоа мора д абиде фокусот на стратегијата. Во Агенцијата за поддршка на туризмот велат дека досегашните интензивни активности и промоции го даваат посакуваниот ефект.

-Агенцијата за поддршка и промоција на туризмот во текот на 2013 година се концентрираше на активности со кои ја промовираше Република Македонија на странските пазари. АППТ посети 14 интернационални саеми за туризам низ светот, склучи договори со бројни медиуми за рекламирање на туристичките можности и капацитети и организираше огромен број на ФАМ тури, посети на новинари, работилници, презентации и бизнис форуми од кои ефектот е огромен. За Македонија дознаа повеќе луѓе од што можете да претпоставите, а за тоа зборува и бројот на туристи кој од година во година се повеќе расте.

Следната 2014 година ќе се работи на стратегии за развој на алтернативни форми на туризам, но и ќе ги вмрежиме приватните етно –збирки и ќе ги довршиме веќе започнатите проекти за мапирање и обележување на планинарски и велосипедски патеки со комплетно изработени водичи за истите. Покрај тоа што ќе поддржиме културни, забавни, спортски и еколошки манифестации со меѓународен карактер, ќе се фокусираме на работата за конечно да создадеме берза за туристички работници. Ќе помогнеме да се развијат и промовираат авто камповите, а проектот ,, Изнајми викендица – стан,, е- пазар, ќе влезе во својата завршна фаза со што ќе бидат евидентирани и класифицирани сите природни убавини, културно наследство и традиционални манифестации специфични за конкретни места, велат во Агенцијата за промоција на туризмот.
http://denesen.mk/web/2013/12/04/skopje-2014-gi-vraka-investiciite/