Ќе заврши ли „Скопје 2014“ во 2014-та?

Дали „Скопје 2014“ и натаму ќе се проширува никој не сака да потврди, но очигледно е дека, по неговото промовирање пред четири години, продолжува да се дополнува со нови проекти. Последни се т.н. електромобили, со кои од први април ќе може да се разгледуваат објектите и спомениците од „Скопје 2014“. Дали проектот станува минато или ќе продолжи да се шири секојдневно?

Скопје не толку одамна

Скопје 2014

Реалноста ја надмина и макетата 

Кога во февруари 2010 година спектакуларно беше најавен проектот „Скопје 2014“ со презентација на видеото со новиот изменет лик на градот, идејата што промовираше поинакво руво на Скопје се чинеше премногу надреална и тешкоостварлива. Многумина не веруваа дека Скопје ќе стане идентично на она од промотивното видео, но четири години подоцна, проектот е речиси готов и влегува во годината што беше назначена како временска одредница за негово заокружување.

Речиси сите објекти што беа составен дел од овој проект се реализирани, а некои сѐ уште се во процес на изградба. Има и такви што не беа предвидени во првичната презентација, како „Шпанските скали“, „Милениумското тркало“... За некои, пак, во „Отчетот за Скопје 2014“, се вели дека воопшто не се поврзани со проектот („Воинот на плоштад“, „Карпошово востание“, спомениците на Ѓорѓија Пулевски, Димитрија Чуповски...).

Дали „Скопје 2014“ и натаму ќе се проширува никој не сака да потврди, но очигледно е дека, по неговото промовирање пред четири години, продолжува да се дополнува со нови проекти. Последни се т.н. електромобили, со кои од први април ќе може да се разгледуваат објектите и спомениците од „Скопје 2014“. Дали проектот станува минато или ќе продолжи да се шири секојдневно?

Концертната сала прва почна да се гради - се уште не е готова

Од проектите што се реализираа под надлежност на Министерството за култура, недовршена останала само концертната сала на Македонската филхармонија, тврдат оттаму.

- Министерството за култура беше надлежно за четири проекти од „Скопје 2014“. Тоа се портата „Македонија“, Музејот на ВМРО, Стариот театар и новата концертна сала на Македонската филхармонија. Сите се веќе промовирани и отворени, остана нереализирана само новата концертна сала - вели Анита Јовановска, портпаролка во Министерството за култура.

Концертната сала на Македонската филхармонија нема да биде готова оваа година, како што беше најавено, бидејќи веќе неколку месеци е запрена нејзината изградба. Причина за тоа е банкротирањето на австриската фирма „Алпине бау“. Додека не биде избрана нова фирма, која ќе ја заврши карабината на концертната сала, работата на објектот ќе биде запрена и тоа ќе го одложи најавениот термин за нејзиното отворање. Министерството за култура минатата година најави дека Македонската филхармонија ќе се всели во новиот објект во 2014 година, кога ќе го одбележи и 70-годишниот јубилеј од основањето.
Министерството за култура е задолжено и за внатрешното уредување на Археолошкиот музеј, една од градбите што сѐ уште не се завршени.

Поставени се и 35-те скулптури низ централното градско подрачје што беа составен дел од проектот „Скопје 2014“ за кои исто така беше надлежно Министерството за култура.

Мораториум за „Скопје 2014“ откако речиси сѐ е изградено

Откако општината Центар доби нов градоначалник минатата година, „Скопје 2014“ беше замрзнат, иако најголем дел веќе беше реализиран, или во процес на реализација.

- Ние немаме никакви ингеренции врз проектот „Скопје 2014“ - вели Лидија Неделковска од општината Центар.

Сите надлежности поврзани со проектот „Скопје 2014“ сега ги има градот Скопје, кој од први оваа година е задолжен за одржување, чување и заштита на сите објекти, споменици, мостови и фонтани што беа негов составен дел.

- Од први јануари годинава градот е задолжен за одржување на градбите од проектот „Скопје 2014“. Тоа е единствената наша ингеренција поврзана со овој проект - вели Љупчо Пандиловски од одделението за односи со јавност на градот Скопје.

Новиот градоначалник на Центар, Андреј Жерновски, уште првиот ден кога официјално ја презеде должноста стави мораториум на проектот „Скопје 2014“.

Тој го запре барокно руво за ГТЦ и зградата на ЕВН и најави дека ниту „Шпански скали“, кои ќе бидат дел од новата зграда што требаше да се гради на плоштадот „Македонија“ од општината Центар, нема да добијат дозвола за градба.

И покрај најавите на Жерновски дека нема да дозволи да се градат „Шпанските скали“ на плоштадот, во ноември оваа година на јавна аукција беше избрана фирмата „Амадеус девелопмент“, која треба да ги изгради за шест години откако ќе ѝ биде издадена дозволата за градба.

За оваа година е најавена и изградбата на „Милениумското тркало“, кое ќе го гради јавното сообраќајно претпријатие „Скопје“, кое и ќе стопанисува со него.

- Почетокот на изградбата е планиран за 2014 година, а објектот ќе биде завршен за пет години. Тркалото ќе го градиме од сопствени средства и од донации - велат од ЈСП.

Останаа хотелот и „Градската куќа“

Од капиталните објекти што беа составен дел од проектот „Скопје 2014“, освен концертната сала на Македонската филхармонија и Археолошкиот музеј, останаа само уште неколку што сѐ уште не се изградени. Минатиот месец беа удрени темелите на хотелот на плоштадот „Македонија“ и „Градската куќа“, која се гради на некогашното место на Офицерскиот дом. Почна да се гради и хотелот „Мериот“. Од објектите што беа најавени во проектот „Скопје 2014“, во процес на изградба е црквата „Свети Константин и Елена“, која првично требаше да се гради на плоштадот „Македонија“, но по реакциите на групи граѓани, невладини организации и на Исламската верска заедница беше дислоцирана спроти Домот на АРМ.

И фасадите на објектите во централното градско подрачје го добија ликот од видеото со новите барокни фасади. Отворени се и двата моста - пешачкиот мост „Око“, кој води кон зградата на Уставниот суд, Државниот архив и Археолошкиот музеј, и Мостот на уметноста или пешачки мост, кој води кон зградата на јавното обвинителство и финансиската полиција. Надградена е и зградата на парламентот со уште еден кат и поставени се куполи.