Споменик Филип II - Битола

Првиот монументален споменик на Филип Втори, таткото на Големиот Александар Македонски, за прв пат во земјава ќе биде поставен во Битола.

Споменикот е дело на велешкиот скулптор Ангел Коруновски.

Моментално се лие во бронза во Нови Сад и за десетина дена ќе биде донесен во Македонија.

Изградбата на споменикот на македонскиот крал Филип Втори е по порачка на општина Битола.

„ Минатата година учествував на распишаниот конкурс. Добро го простудирав животот, ликот и делото на македонскиот крал. Нешто од длабочината на мојата душа како да ми кажуваше дека ќе го освојам првото место и дека јас ќе ја имам честа да го извајам ликот на Филип Втори. Мојата идеја беше Тој да биде на коњ, достоинствен, смирен, како што му доликува на еден државник кој успеал да ги обедини сите народи и да ја создаде македонската држава. Токму затоа направив Тој со прстот да покажува кон својот народ. Кралот е облечен во посвечена одора, зашто мислам дека таква одора и му доликува на еден голем крал“, вели скулпторот Анѓел Коруновски.

Споменикот заедно со коњот и постаментот е висок 8,5 метри. Постаментот е изработен во вид на саркофаг и е збогатен со фигури на неговата фаланга.

„Верувајте, за да се изваја ликот на Филип не беше лесно. Тоа беше макотрпна работа, но јас со големо зсдоволство го направив и мислам дека Филип Втори, после толку векови, повторно го донесов во Македонија. Го правев со голема љубов, зошто како и секој македонец Филип и неговиот син Александар ги носам во својата душа“, вели Коруновски.

Споменикот моментално се лие во бронза кај металургот Александар Станишиќ во Нови Сад.

Како млад скулптор, Коруновски досега има извајано неколку импозантни дела од нашата подалечна историја.