[Вештаците од Бирото за судски вештачења, кои по барање на Градот Скопје и на „Паркови и зеленило“ го испитуваа случајот со сечење шума на Водно, констатирале дека се вршени незаконски активности во заштитеното подрачје. 

Близу 14.000 евра изнесува штетата направена во парк-шумата „Водно“ каде што во мај беа исечени поголем број дрвја и грмушки поради пробивање пат до приватна парцела со лозје. Вештаците од Бирото за судски вештачења, кои по барање на Градот Скопје и на ЈП „Паркови и зеленило“ го испитуваа случајот со сечење шума на Водно, констатирале дека при крајот на мај годинава во парк-шумата биле вршени активности во заштитеното подрачје кои не се во согласност со планските документи за заштитени подрачја и притоа била направена вкупна штета во висина од 853.200 денари. Откако ја утврдиле штетата, вештаците изготвиле стручно мислење. Против физичкото лице кое ја предизвикало штетата, поднесена е пријава до МВР.

„Град Скопје и ЈП ’Паркови и зеленило‘ ја информираат јавноста дека за настанатите штети во парк-шумата ’Водно‘, во местото викано Рупи, на крајот од месец мај, побараа од Бирото за судски вештачења да ги утврди околностите и висината на штетата којашто е настаната. Од вештаците на теренот е утврдена следнава фактичка состојба: во парк-шумата се вршени градежни земјени работи за пробивање на земјени патишта и зарамнување на одредена површина. Со извршените земјени работи, зафатена е вкупна површина од околу 5.864 квадратни метри, при што е извршено копачење, односно отстранување на постојната вегетација, што е во спротивност со Законот за шумите и други акти донесени од Градот Скопје“, се вели во соопштението од Градот.

Вештаците констатирале дека се уништени стебла од црн бор и од разни листопадни дрвја, како и од природен подмладок од црн бор со старост над 3 години. Штетата на црниот бор е во висина од 403.200 денари, на листопадните дрвја 90.000, а на природниот подмладок од црн бор 360.000 денари.

„Врз основа на правилник за висина на цената за штети во шума (Сл. весник на РМ број 75/2010 год.) вкупно проценетата штета предизвикана со активностите во парк- шумата ’Водно‘, според стручното вештачење, изнесува 853.200 денари“, се вели во соопштението.

Против кого е поднесена пријава, засега останува непознато. Од Градот велат дека поради презумпцијата на невиност не можат да кажат кој е човекот што ги вршел незаконските дејствија на Водно. Додаваат дека нивните ингеренции околу случајот завршуваат тука, а натаму презема МВР. Градот и „Паркови“ го пријавиле случајот, штетата е утврдена и сега полицијата треба да истражува дали и кој се' е вмешан, кој сечел, кој издал дозвола за сечење...

„Не би сакал да го соопштам името на физичкото лице, бидејќи сите информации ќе ги соопшти Градот. Дали во понатамошната постапка ќе биде преземено нешто против Општина Карпош, која издала одобрение за градежни активности, не би можел да знам, бидејќи нашите ингеренции завршуваат тука. Доколку најдеме сторител во недозволени активности во шумски појас, наша задача е да направиме записник, усно да го опоменеме и случајот да го пријавиме во најблиската полициска станица“, вели Душан Авировиќ, директор на ЈП „Паркови и зеленило“.

Случајот беше актуализиран кон крајот на минатиот месец кога рекреативци на Водно забележале дека на простор над Детската болница „Козле“ е исечена шума и се пробива пат до парцела на која исто така е извршена сеча. Откако јавноста реагираше, од Општина Карпош информираа дека тие издале одобрение за расчистување на пат кој претходно бил непрооден.

„Ве известуваме дека на конкретната локација ќе нема никакви градежни активности од типот на изградба на објект или слично. По барање кое е пристигнато до нашите служби, поточно до одделението за уредување на градежно земјиште, издадено е одобрение за расчистување на пат кој претходно беше непрооден. Се работи за катастарска парцела број 915. Расчистувањето ќе биде со цел да се направи пристап за поминување на земјоделски машини, односно да се стаса до парцелата која се наоѓа во приватна сопственост. Станува збор за лозје, за кое приватното лице има потпишано ИПАРД-договор за копачење на старо и садење на ново лозје“, гласеше одговорот од Општина Карпош.

Оттаму ги отфрлија како шпекулација гласиштата дека сопственик на парцелата е поранешниот вицегувернер Томе Неновски.

http://think.mk/pregled/shteta-od-14000-evra-vo-parkshumata-vodno