Аеродроми

ТАВ не го изневерува Скопје со Приштина

Турската компанија истакнува дека нема да се пријави на тендерот во Косово, но извори на „Дневник“ од Приштина тврдат дека две делегации на ТАВ деновиве престојувале таму разгледувајќи ги можностите за инвестирање

Турската компанија „ТАВ холдинг“, која треба да ги модернизира двата македонски аеродрома, нема да се пријави на јавниот повик за реконструкција и доградба на аеродромот во Приштина, потврдија од компанијата. Сепак, извори на „Дневник“ од Приштина тврдат дека две делегации на турската компанија деновиве престојувале на Косово на средби со тамошните владини претставници, разгледувајќи ги можностите за инвестирање.

Од ТАВ не ги коментираат неофицијалните информации на приштинските власти, само истакнуваат дека нема да се пријават на косовскиот тендер.

- ТАВ веќе ги информира властите на Косово дека нема да учествува на тендерот за модернизација и развој на Меѓународниот аеродром во Приштина. Целосно сме посветени на модернизацијата на аеродромите во Македонија, која треба да почне некаде во првата половина на следната година - изјавија од турската компанија за „Дневник“.

Минатата недела турскиот министер за транспорт, Бинал Јилдирим, допатува во Приштина на средба со косовскиот министер за економија и финансии, Ахмет Шала. Како што јавуваат косовските медиуми, двајцата министри разговарале за можностите за соработка помеѓу двете земји во секторите на инфраструктурата, железницата и авиотранспортот.

- Разговаравме за соработка помеѓу двете пријателски земји што делат заедничка визија за европската иднина. Ја користам можноста преку министерот да ги охрабрам турските компании да го испитам секоја можност за да финансираат и инвестираат во големи проекти на Косово - изјави по средбата косовскиот министер.

Турскиот министер нагласи дека Турција е подготвена да ги подели со Косово искуствата од областа на инфраструктурата, железничкиот и авионскиот сообраќај.

- Подготвени сме да соработуваме со Косово во овие области - истакна турскиот министер.

Сепак, познавачите тврдат дека и да е заинтересиран да инвестира во аеродромот во Приштина, ТАВ нема да може поради законски пречки. Во косовскиот Закон за приватизација постои член што го спречува ТАВ да конкурира на тендерот за концесија на аеродромот со оглед на тоа дека веќе има склучено договор за концесија во Македонија. Имено, во тој член е наведено дека компанија која оперира со друг аеродром оддалечен помалу од 400 километри од приштинскиот, не може да биде дел од приватизацијата на аеродромот на Косово. Нашите извори тврдат дека доколку ТАВ сака да инвестира во Приштина, ќе мора прво да лобира да се смени тој член од Законот.

Јавниот повик за избор на фирма која ќе го модернизира аеродромот во Приштина и во следните 20 години ќе оперира со него завршува задутре. Според условите наведени во тендерот, фирмата ќе треба да изгради и нов терминал, нова контролна кула и придружни објекти, платформи, граници на пистите за маневрирање, чекалници и друго. Заинтересираните компании мора да инвестираат најмалку 85 милиони евра во постојните граници на аеродромот.

Според пишувањата на косовските медиуми, локалните власти се надеваат дека концесијата на приштинскиот на земјата ќе и донесе 400 милиони евра во следните 20 години.

За проектот за модернизација на македонските аеродроми ТАВ побара поволни кредити од 125 милиони евра од меѓународните финансиски институции. Од Европската банка за обнова и развој очекува 45 милиони евра и уште 80 милиони од Европската инвестициска банка. Двете банки треба наскоро да одлучат дали ќе ги одобрат кредитите.

Турски ТАВ до сега два пати го одложи стартот на инвестицијата во Македонија вредна 200 милиони евра. Освен реновирање на постојните аеродроми, компанијата треба да изгради уште еден нов карго аеродром во Штип. Градежните работи требаше да почнат од почетокот на годинава. Но, поради светската финансиска криза и неможноста да дојде до кредити, ТАВ прво го одложи почетокот за септември годинава, па потоа за март 2010 година. По последното одложување, од централата на ТАВ објаснија дека причините се чисто технички и инвестицијата со сигурност ќе се реализира.

Даница Тунтевска
Горан Ризаов

Десет милиони евра годишен профит

Приштинскиот аеродром продолжува да урива рекорди во остварениот профит, откако во првите осум месеци од годинава заработи 7,6 милиони евра, што е за 600.000 евра повеќе од остварениот профит за цела 2008 година.

Низ аеродромот на Косово, кој последниве години молскавично станува еден од водечките во регионот, до крајот на август поминале 827.000 патници, односно околу 40.000 повеќе отколку лани. Менаџментот на аеродромот вели дека остварениот профит ги надминал сите можни предвидувања за годинава и оти се надева дека до Нова година аеродромот ќе има нето-профит од најмалку 10 милиони евра.