Споменици и скулптури (општо)

За споменикот на Јане Сандански се заинтересирани 16 автори

Шеснаесет автори се понудиле да го изработат споменикот на Јане Сандански, кој е предвиден да се постави во истоимената населба во Аеродром, во близина на полициската станица. По кое решение ќе се гради споменикот на македонскиот револуционер, надлежната комисија ќе треба да одлучи најдоцна за 90 дена.

Согласно со критериумите на јавниот повик за избор на идејното решение, споменикот ќе може да достигне максимална висина до 8,5 метри, од кои 3,5 метри е дозволената висина за постаментот, а остатокот е за коњаничката скулптура на Сандански. Македонски револуционер качен на коњ, согласно со ДУП, е предвидено да го краси зеленилото во близина на полициската станица, на аголот на булеварите „Јане Сандански“ и АВНОЈ. Кога ќе се постави скулптурата и колку пари ќе чини, се' уште не е утврдено.

Градоначалникот на Аеродром, Ивица Коневски, вели дека овие детали ќе се утврдат по конечниот избор на идејното решение, а дотогаш ќе се одреди и максималниот буџет за оваа намена. Засега е сигурно дека за најуспешните три труда од конкурсот, Општината ќе обезбеди награден фонд во висина од 10.000 евра.

Идејата за поставување споменик на Јане Сандански е на градоначалникот Ивица Коневски, а беше поддржана и од мнозинството на Советот. Изградбата на овој споменик е дел од предлог-програмата за одбележување значајни настани и истакнати личности на подрачјето на Аеродром. (Дс.Т.)

Оштетена скулптура во Прилеп

Деветнаесет одлуки за подигнување спомен-обележја на значајни личности и настани, донесени од Советот на Општина Центар, ќе бидат под лупа на уставните судии на наредната седница, в среда. Уставниот суд ќе ја разгледува иницијативата за оценување на уставноста и на законитоста на одлуките на советниците од Центар, поднесена од група скопјани. Станува збор за одлуките на Советот за спомениците на Крсте Мисирков, Карпош, Никола Карев, Гоце Делчев, Даме Груев, на загинатите припадници на МВР, на Цар Самуил, Ченто, гемиџиите, цар Јустинијан Први, скулптура на воин, светите Кирил и Методиј, светите Климент и Наум Охридски, на македонските бранители, на паднатите херои за Македонија, на основачите на македонската револуционерна организација, првото заседание на АСНОМ и на Тарас Шевченко. Покрај другото, ќе се разгледува и прашањето за локацијата за поставувањето на спомен-обележјата, за надлежноста за нивното донесување, како и за постапката и за процедурата при донесувањето на советничките одлуки.

Ж.Ќ.

Нема осветлување за новите споменици во Центар

Општината треба да одлучи дали повторно ќе се обиде да најде идејно решение за осветлувањето

Деспина Трајковска

Седум од триесетината споменици што треба да се постават во централното градско подрачје нема да бидат осветлени, иако општинарите планираа преку конкурс да изберат идејно решение за нивно осветление. На меѓународниот конкурс не била доставена ниту една понуда, па така неизвесно е дали ќе има осветление за спомен-обележјето на ајдутскиот водач Карпош, за гемиџиите, Јустинијан Први, како и за спомениците на просветителите Кирил и Методиј, Климент и Наум Охридски и за спомен-обележјата на основачите на ТМОРО и на АСНОМ.

Во повикот Општината не инсистираше ниту, пак, укажа за начинот на системот на осветлување. Единствено побара оригиналност и иновативност во предлогот.

Сега допрва надлежните ќе треба да одлучат дали ќе се откажат од проектот или можеби ќе го повторат конкурсот. Ќе треба да се разреши и дилемата дали евентуално повторениот повик ќе ги има истите критериуми и услови. Инаку, спомен-обележјата се' уште се во фаза на изработка. Општинарите објаснуваат дека проектот за осветлението бил, всушност, дел од целиот проект за изработка и поставување на спомениците.

„Спомен-обележјата не се завршени, но идејното решение е прва фаза од подготовките за изработка на постаментите и поставување на спомен- обележјата. Откако ќе заврши конкурсот за идејно решение за осветлението, ќе може да се донесе одлука за почнување постапка за јавна набавка, избор на изведувач на осветлувањето. Конкурсот е распишан токму за да се дадат идеи за видот и начинот на осветлување“, објаснија општинарите за текот на планираната постапка.

Не информираа дали и колку средства во тековниот буџет се предвидени за оваа намена. Единствено посочија дека имаат пари да ги наградат авторите на најуспешните трудови. Во повикот беше наведено дека наградниот фонд е во висина од 370.000 денари.

Инаку, со одлука на општинскиот Совет од пред година и пол одлучено е скулптурата на Карпош да се постави на плоштадот „Карпошово востание“, од левата страна на Вардар, покрај Камениот мост. На десната страна на Вардар, пак, покрај Камениот мост, предвидено е спомен-обележјето на Јустинијан Први. Во паркот „Жена борец“ се наоѓа локацијата наменета за спомен- обележјето во чест на Првото заседание на АСНОМ. За гемиџиите и за останатите споменици допрва ќе се одлучува каде ќе се постават. Начелно, сите ќе се наоѓаат на некоја јавна површина во централното градско подрачје.

КОНКУРС ЗА ГРАНДИОЗЕН СПОМЕНИК СПРОТИ СП ПЛАНЕТ

Скулптура на Ѓорче Петров на влезот во Ѓорче

Коњаникот ќе биде висок 7 метри и ќе биде поставен на триметарски елиптичен постамент на кој ќе бидат испишани големите мисли на Ѓорче Петров. Споменикот ќе гледа кон Водно, од неговата јужна и западна страна ќе биде поставен грбот на општината, а на скверовите на сите четири улици ќе има по една фонтана и клупи за одмор

Грандиозна скулптура на Ѓорче Петров со висина под 9 метри ќе биде поставена на крстосницата кај трговскиот центар СП Планет во Општина Ѓорче Петров. Конкурсот за идејно решение веќе е распишан и ќе биде отворен до крајот на јануари идната година до кога можат да се пријават сите скулптори од земјава и странство. Проектот ќе го реализираат Општина Ѓорче Петров со поддршка на Министерството за култура и ќе чини 90 илјади евра. Пристигнатите трудови ќе ги разгледува специјално формирана комисија која најдобриот ќе го награди со 100.000 денари, а второ и треторангираните со 50.000 денари, односно 30.000 денари.
- Нашата општина ќе биде единствената која на влезот ќе изгради голем кружен тек и на него ќе постави модерен споменик посветен на својот патрон. Коњаникот ќе биде висок 7 метри и ќе биде поставен на триметарски елиптичен постамент на кој ќе бидат испишани големите мисли на Ѓорче Петров. Споменикот ќе гледа кон Водно, од неговата јужна и западна страна ќе биде поставен грбот на Општината, а на скверовите на сите четири улици ќе има по една фонтана и клупи за одмор. Споменикот ќе биде изработен во бронза, ќе биде достоинствен, велелепен и не многу скап, информираше претседателот на Одборот за подигање на споменикот Марјан Димитријевски.

Градоначалникот Сокол Митровски информираше дека споменикот симболично ќе претставува капија на општината која ќе ги потсетува минувачите дека влегуваат во општина која гордо го носи името на македонскиот револуционер.
- Ние во континуитет работиме на афирмација на името и делото на Ѓорче Петров. Освен споменикот ние имаме покренато иницијатива и за враќање на моштите на нашиот патрон од Бугарија. Ако успееме во таа наша намера тие ќе бидат изложени во црквата Свети Петар и Павле - рече Митровски. Тој најави дека стариот споменик на Ѓорче Петров, што се наоѓа во паркот, ќе биде преместен во дворот на училиштето што го носи неговото име. "Нашиот патрон заслужува поголем и помаркантен споменик", рече Митровски.

http://www.vecer.com.mk/?ItemID=9C86173ECA776046A05A8E2BF5BDFC4C

(Е.А.)

ДВА НОВИ СПОМЕНИКА ВО ОПШТИНА ЦЕНТАР

Коњаници во Жена-парк, а Св. Климент Охридски пред Универзитетска

Наместо очекуваниот транспаретен отчет како се трошеле народните пари, на седницата на Советот на општината, Тодоровиќ презентираше извештај за сработеното кој не даде одговор - кога ќе бидат готови спомениците за Александар, Гоце и другите

На платото пред Универзитетската библиотека "Св. Климент Охридски" во Скопје наскоро ќе никне споменик на ученикот на просветителите Кирил и Методиј. Ваквата идеја ќе се реализира некаде на почетокот на следната година. Оваа одлука центарските советници ја усвоија во четвртокот на последната седница на Советот на општината каде покрај неа тие одобрија подигање на уште еден споменик на паднатите херои на Македонија како и ослободување од комуналии во висина од 14 милинои денари на ЈП ССД за изградбата на трибините на стадионот. Наместо очекуваниот транспарентен отчет како се трошеле народните пари, на седницата на Советот на општината, Тодоровиќ презентираше извештај за сработеното кој не даде одговор - кога ќе бидат готови спомениците за Александар, Гоце и другите.

Поставување на споменикот пред платото пред Универзитетската библиотека е дел од програмата за култура на Општината Центар, а истиот ќе биде финансиран од Министерството за култура. Засега не се знае колку додатно овие два споменика ќе ја чини Општината ако се земе предвид дека таа од почетокот на оваа година за 6 месеци потрошила 140 милиони денари за подигање на спомен-обележја на нејзината територија.

Опозициските советници јавно критизирајќи го проектот околу спомениците побараа детален финансиски извештај околу изработките на спомениците и нивното вајање.
Советничката Благородна Мојсовска во своето излагање рече дека дел од средствата кои општината ги расфрла по споменици и уривање на дивоградби таа треба да ги пренамени во незавршените примарни проекти: осветлувањето, фекалните канализации, пешачки патеки и сл. Според советниците од ВМРО-ДПМНЕ, со поставувањето на ваквите споменици ќе се потенцира духовноста на градот и општината.

Неофицајално спомен-обележјето на паднатите херои за Македонија, кој ќе биде извајан на четири коњаници со фонтана од страна на скулпторот Томе Аџиевски, ќе биде сместен во Жена-паркот и ќе претставува еден од најубавите идејни решенија за споменици со фонтана во нив на нејзина територија.

http://www.vecer.com.mk/?ItemID=BDABAA4F0FAF634BBF68F7EAE9D421B1