Надлежните од општината Центар упорно ги кријат анкетните ливчиња од последната анкета за најновите измени на Деталниот урбанистички план за „Малиот ринг“, ниту, пак, сакаат да ги обелоденат резултатите од оваа важна анкета. Не обелоденуваат ниту за кој објект од проектот „Скопје 2014“ стигнаа најголем број забелешки од жителите на општината. Овој план летово Уставниот суд, не навлегувајќи во неговата содржина, го прогласи за противзаконски, затоа што при неговото донесување не е почитуван Законот за просторно и урбанистичко планирање, во поглед на постапката за донесување. ДУП за „Малиот ринг“ е оспорен поради тоа што е донесен во скратена законска постапка, а и рокот за јавната анкета зимово беше покус поради бројните празнични денови во јануари. Неофицијално 65 отсто од анкетираните за ДУП за „Малиот ринг“ се против изградбата на триумфалната порта, како и против барокните фасади што треба да ги добијат повеќе деловни и станбени објекти во централното градско подрачје, фонтаните.

По укинувањето на планот спорна е изградбата на катните гаражи кај Музејот на холокаустот, кај МЕПСО и кај телекомот, на паркингот кај „Холидеј ин“, како и новата зграда на Министерството за надворешни работи и уметничко-естетската инсталација во партерот пред Македонската опера и балет, триумфалната порта.

Од Асоцијацијата на архитекти на Македонија, велат дека само нивните членови поднеле повеќе од педесетина забелешки, а според нив имало и жители што пополнувале анкетни листови.

- Заедно со нашите забелешки испративме и писмо до градоначалникот на Центар, Владимир Тодоровиќ, во кое му предложивме заедно да направиме нов функционален детален урбанистички план, или барем да се земе предвид нашето мислење. Но од него не добивме одговор, а и до каде е постапката со планот не знаеме - посочија од ААМ.

И додека од донесувањето на најновите измени и дополнување на ДУП за Малиот ринг нема ни абер, објектите од проектот „Скопје 2014“ се градат со несмален интензитет. Фонтаните во коритото на Вардар од ден на ден се сé повисоки, и постаментот за споменикот на Александар Македонски исто така. Ова е доказ плус дека локалната власт не ги почитува одлуките на судот и, заедно со државата, продолжува со проектот. А според членот 377 од Кривичниот законик, секој што не ги почитува одлуките на Уставниот суд може кривично да одговара.

На прашањата до каде е изградбата на објектот од проектот „Скопје 2014“ за кои е надлежна општината Центар, како и за кои објекти наскоро ќе се распишат конкурси, портпаролот на општината Јовица Ацковски, протоколарно ни одговори дека повеќето од почнатите објекти се видливи на терен, а конкурсите се уредно објавени на интернет-страницата на бирото за јавни набавки.

Од Министерството за култура велат дека во тек е жалбената постапка на јавниот повик за избор на изведувач за триумфалната порта „Македонија“.

Според жителите на централното градско подрачје со кои разговаравме, а кои пополниле анкетни лостови, најмногу жалби поднеле за триумфалната порта, барокната катна гаража, монументалните споменици и новите мостови на Вардар.

- Јас во моето ливче напишав дека најмногу ми пречи споменикот на Александар Македонски, кој навистина ќе биде преголем, а барокната катна гаража кај телекомот е премногу грда - ни изјави М.К., стар скопјанец, жител на општината Центар.