Неизвесно е дали градежните работи кои во моментов се одвиваат во речното корито на Вардар пред скопскиот плоштад, каде што се гради мостот „Око“ и две фонтани, ќе влијаат негативно врз преостанатиот животински и растителен свет во подолните токови на реката.

Дел од стручната јавност е против ваквите градежни активности, а биолозите велат дека во канализираниот Вардар во Скопско животинскиот и растителниот свет е со децении речиси уништен.

„Биодиверзитетот во Вардар е сведен на многу ниско ниво каде што доминираат формите карактеристични за високозагадени води. Сè е тоа сведено на базичен минимум на преживување и ние тоа континуирано го гледаме. Во случај кога на нездраво ткиво ставате нешто тогаш тоа автоматски е осудено на пропаст“, вели Светислав Крстиќ – универзитетски професор.

Професорот Крстиќ вели дека до него и до Институтот за биологија не стигнало барање за изработка на студија за влијанието врз животната средина на овие државни проекти кои се реализираат во или блиску до реката. Но, дел од професорите од Градежниот факултет во Скопје пак, се отворено против ваквата нивна реализација.

„Не сум поддржувач на тоа што се случува во реката Вардар. Јас сум силен противник на активностите што се одвиваат во централното градско подрачје, директно во речното корито“, рече Цветанка Поповска - универзитетска професорка.
Од Министерството за животна средина пак, велат дека за проектите на општина Центар се направени потребните студии за влијанието врз животна средина.

„Сигурно се направени потребните елаборати за изградба на сите капацитети или зафати бидејќи секој инфраструктурен проект треба да помине низ оценка за животна средина и не се сомневам дека овие проекти ја извршиле потребната процедура“, истакна Неџати Јакупи – министер за животна средина.

И од општина Центар информираат дека за овие проекти се извршени сите потребни студии за влијанието врз животната средина, но не наведуваат кој точно го направил тоа. Освен мостот „Око“ и двете фонтани во Вардар, во близина треба да биде изграден уште еден пешачки мост наречен „Мост на цвеќето“.

Според општината, фонтаните треба да се завршат во март следната година, додека мостот „Око“ да се изгради до 2012-ттата. Биолозите предупредуваат дека секој инцидент при градежните активности, како евентуално истурање на бетон, токсични бои и слично уште повеќе може да го уништи и онака мртвиот Вардар кој минува низ главниот град.

Фросина Пандурска – Драмиќанин