Скопје 2014

Елена Костовска


Дополнителни договори досега се склучиле дури за пет објекти од проектот „Скопје 2014“, со што треба да се одлеат непланирани околу 1,5 милиона евра. Од градежниот сектор коментираат дека причината за таквите дополнителни суми е тоа што на тендери се пријавуваат потценети вредности, колку да се добие зделката, а потоа Владата и фирмите се спогодуваат, така што фирмите добиваат повеќе пари, а Владата плаќа со големо задоцнување. Дополнителни договори се склучиле за зградата на Министерството за надворешни работи за која Службата за општи и заеднички работи со градежната фирма „Бетон“ потпиша договор за непредвидени и дополнителни работи од 425.000 евра. Дополнителни договори се потпишани и за Музејот на ВМРО, каде што непредвидени излегоа 630.000 евра, Стариот театар, за кој беше склучен анекс-договор во вредност од 539.000 евра, Уставниот суд со 200.000 евра и Филхармонијата со 80.000 евра кои не биле предвидени со првичниот договор. Инаку, според тендерот, Музејот на ВМРО и Филхармонијата чинат по шест милиони евра, Стариот театар и зградата на МНР по 16 милиони, а Уставниот суд 25 милиони евра. - Градежните компании излегуваат со ниска цена и со некомплетни и неквалитетни проекти. Тоа се прави за да се победи на јавниот оглас. Се поставува прашањето зошто се прават проекти ако потоа кај сите излегува дека нешто им недостига. Потоа се измислуваат нови позиции, компаниите не ги изведуваат тие со ниска цена или им фали материјал за работа. Инвеститорите, во случајов државата, бидејќи им се блиски, им прогледуваат низ прсти - вели Никола Велковски, претседател на Здружението на градежништво. Тој додаде дека треба да бидат засилени контролите на материјалите што се ставаат во изградбата бидејќи се гради со неквалитетни материјали за да се заштедат трошоци. Од Здружението бараат и да се унифицираат тендерските услови и да не се менуваат додека трае реализацијата на јавната набавка. Оттаму велат дека основниот договор може да отстапува плус-минус 10 проценти, но под точно утврдени причини, како што се условите кои ќе се појават на терен, а кои првично не можеле да се предвидат. Градежните компании не откриваат дали потпишале анекс-договори за одложување на наплатата на државните проекти на кои работат. Владата пред три месеци по брза постапка донесе законски измени со кои си овозможи одложување на плаќањето и до две години, а при тоа беше планирано одложување да има и на реализацијата на јавната набавка. - Поголемите фирми оваа информација ја сметаат како дискрециско право и ретко која сака да признае дека и било понудено или дека потпишала договор за одложено наплаќање. Секој поединечно си води политика - вели Велковски.