Објекти од културата (општо)

ТЕАТАРСКИТЕ ИНСТИТУЦИИ И ГЛЕДАЛИШТА НЕПРИСТАПНИ

Инвалидизираните лица лишени од театар

Ако ги разгледате театарските салони и салите во кои се изведуваат претстави и друг вид сценска дејност ќе дојдете до констатација дека се непристапни. Освен во Македонската опера и балет, љубителите на театарската уметност кои своето право на движење го остваруваат преку инвалидски колички и други помагала, не можат да одат в театар

Божицата Талија и театарската уметност се речиси недостапни за лицата со хендикеп. Ако ги разгледате театарските салони и салите во кои се изведуваат претстави и друг вид сценска дејност ќе дојдете до констатација дека се непристапни. Освен во Македонската опера и балет, љубителите на театарската уметност кои своето право на движење го остваруваат преку инвалидски колички и други помагала, не можат да одат в театар.

"Во секој случај инвалидизираните лица се категорија на која треба да сметаме, односно публика која не смее да се занемари. Затоа повеќе од четири години во нашата институција тоа им е овозможено на овие лица", ни рече Оливер Арсовски, директор на МОБ.

Но, другите како да не го делат тоа мислење. Недекларативно, но тоа се гледа од генералната слика. Просторот пред влезот на Универзалната сала, иако огромен, е отсекаде опкружен со скалила, а никаде нема ниту најмал спуст или, како што се нарекува, рампа, за да може лице со инвалидска количка да дојде до влезот. Дури и ако тоа со триста маки му успее некому (во случај некој близок на инвалидизираното лице со уште нечија помош буквално на раце го пренесе преку малкуте, но високи скалила) треба да биде вистински велемајстор за да најде соодветно место и позиција во гледалиштето. Тоа би можело да се изведе единствено во Универзалната сала и во МОБ, додека во Драмски, МНТ и останатите театри речиси и да не е изводливо. Доколку и се влезе во гледалиштето, тогаш аголот на гледање е ист како да гледате од помошно столче, а од таа позиција еден агол или речиси третина од сцената останува непрегледна.

И во сета оваа ситуација скоро и да не постои иницијатива за промена на работите. Инволвирањето на инвалидизираните лица во уметноста би требало да биде обврска и приоритет. Ова поради тоа што не мал број од нив и самите творат и се вистински уметници.