Скопје 2014

Роковите зададени за „Скопје 2014“ ги прегазија ветувањата на градителите. Стариот театар и Музејот на македонската борба, чие финале имаше неколку презакажувања, требаше веќе да бидат завршени, а Уставниот суд, објектот на Филхармонијата, мостот „Око“, фонтаните во Вардар - во завршна фаза. Иако градителите ја демантираат поместената динамика на изградбата, прегледот на закажаните рокови потврдува многу вистина во шегата што деновиве ја лансираа скопјани: ако продолжи да доцни изградбата на објектите, можно е проектот и да се преименува во „Скопје 2020“.

Новиот театар, кој треба да го има изгледот на театарот крај Вардар урнат во земјотресот 1963 година, според првичните најави требаше да биде готов минатата година. При последната обиколка што премиерот Груевски ја направи на објектите од „Скопје 2014“беше даден нов целен датум - Музејот на револуционерната борба ќе биде завршен до крајот на 2010-та, а театарот на средината на наредната 2011 година.

Нови рокови сега можат да се слушнат и од Министерството за култура, од каде што најавуваат дека изградбата на Музејот на револуционерната борба е предвидено да заврши кон средината на идната година. Изградбата на музејот и на театарот е сложена, па од таа причина нивната изградба трае толку долго, велат во Министерството.
Освен сложената конструкција на објектите, познавачите наведуваат уште неколку причини за доцнењето - беспарицата, крајот на градежната сезона и несоодветните временски услови или оспорениот детален урбанистички план за „Малиот ринг“. Ниту една институција вклучена во овој грандиозен проект не сака да даде попрецизно објаснување. Сите едногласно одговараат дека градежните работи се одвиваат со предвидената динамика.

Одговорните од Службата за општи и заеднички работи на Владата, под чија ингеренција се изградбата на Уставниот суд, Државниот архив и Археолошкиот музеј, новите објекти на Министерството за надворешни работи, Јавното обвинителство и финансиската полиција, велат дека сé се одвива со предвидената динамика.

- Објектите што ние ги градиме треба да завршат во втората половина на идната година, односно август, септември и октомври. Изградбата си има своја динамика и објектите ќе бидат завршени во предвидениот период. Нема да има никакво пробивање на роковите - објасни Васе Доневски од службата за општи и заеднички работи на Владата.

Од општината Центар велат дека градежните работи на мостовите и на фонтаните во Вардар се одвиваат со предвидената динамика. А градоначалникот на Центар, Владимир Тодоровиќ, кога се поставуваа темелите на мостот „Око“, најави дека тој ќе биде пуштен во употреба во почетокот на идната година. Фонтаните од двете страни на Камени мост, пак, требаше да се постават во јуни, но градежните работи се одолжуваат со месеци, според одговорните од Центар, поради високиот водостој на Вардар.
Професорот Мирослав Грчев, архитектот што неколку пати поднесуваше иницијативи до Уставниот суд за испитување на уставноста и законитоста на ДУП за „Малиот ринг“, смета дека изградбата на голем дел од објектите е запрена поради финансиски проблеми.

- Владата, наместо да инвестира од својот буџет, бараше од изведувачите да ги финансираат проектите, па кога тие снемаа пари, запре и изградбата. Дури ни одлуките на Уставниот суд не ја запреа Владата. Единствено нешто што работи против неа во моментов е пустата беспарица - категоричен е Грчев.