Во градскиот буџет има 2,3 милиони евра повеќе од очекуваните приходи, но советот на вчерашната седница не го одобри планот на градоначалникот Трифун Костовски тие да се искористат за реконструкција на просторот околу црквата „Света Богородица“ со оформување плоштад, изградба на бетонски жардиниери на булеварите, поставување јавно осветлување на левата и на десната страна од кејот на Вардар, како и за покривање на трошоците за струја за уличните светилки и за субвенционирање на градскиот превоз.

Советниците одлучија да ја одложат расправата за прераспределба на парите од буџетот за крајот на месецов. Неизвесно е дали потоа би имало доволно време да се спроведат планираните градежни работи, затоа што сезоната завршува, се очекува временските услови да се влошат, а мандатот на оваа градска управа трае до март. Видно разочаран од оваа одлука, Костовски ги обвини советниците дека го блокираат, а со тоа им прават штета на граѓаните.

СЕ БАРАА ИЗВЕШТАИ ЗА РАБОТАТА

Пред да почне расправата за буџетот, Марија Јовановска, претседателката на советничката комисија за буџет, побара да се одложи точката и сите сектори на градската администрација да достават извештаи како ги трошеле парите, па потоа да се гласа за прераспределбата. Предлогот го поддржаа и други советници. Костовски им порача дека е најважно да ја усвојат таа точка, но неговите укажувања не помогнаа и расправата се одложи.

- За мене многу значеше да се усвои ребалансот, бидејќи јас како градоначалник и градската администрација најмногу ја чувствуваме потребата од измени во буџетот. Го очекував овој непромислен и нефер потег од мнозинството. Јасна ми е намерата да се блокираат сите активности на градот, како и интервенциите во јавните претпријатија, пред се во ЈСП. Што во е целта? Документите што ги барате можете секогаш да ги добиете, наместо со оваа блокада, која е очигледна и штетна, да се промовирате како „надежни“ за наредните избори. Нека ви служи на чест - истакна Костовски.

ПРОЕКТОТ ЧЕКА ВО ФИОКА

Проектот за оформување плоштад на левиот брег на Вардар е веќе готов, а градските власти го најавија пред околу две недели. Тие тогаш рекоа дека треба само да се направи ребаланс на буџетот и градежните работи можат да почнат уште веднаш. Со тоа треба конечно да се уреди просторот каде што порано се наоѓаше приградската автобуска станица. Се планираше новиот плоштад да завршува со скалила кои би воделе до коритото на реката. Од градската управа се надеваат дека со таков проект би можело конечно да заживее и левиот брег на Вардар.

Зголемениот прилив во буџетот се очекува да биде уплатен за надомест за уредување градежно земјиште, односно за комуналии. Поради тоа градската администрација побара таа ставка да се зголеми за 140 милиони денари. Засега не се знае кога ќе се одржи наредната седница на советот, но претседателката Ирена Мишева најави дека ќе го закаже терминот за најмногу осум дена.