Враќање на коцката на Плоштад Македонија

Коце Трајановски сака да ја врати старата коцка на плоштад

Ексградоначалникот Пенов вели дека коцката е ислужена, а и естетски не одговара

Сања Наумовска


Градоначалникот на Скопје, Коце Трајановски, има идеја да ги врати старите коцки на плоштадот „Македонија“. Засега нема проект за намерата на Трајановски, а во буџетот за следната година не се предвидени ниту финансиски средства. Идејата не е дел ниту од изборната програма на градоначалникот, кој вели дека желбата за старите коцки му се вратила по посетата на Париз.

Трајановски вчера беше на службено патување во Турција, па не одговори на прашањето дали и кога ќе ја реализира својата најнова замисла. Во градските служби велат дека само тој знае каков концепт посакува, а реализацијата ја најавил за в година или, пак, за 2011 година. Градските служби не знаеја да одговорат колку пари ќе се потрошат за повторното прекопување на плоштадот „Македонија“. Иако за изградбата на сегашниот плоштад се потрошија речиси 3 милиони евра, Трајановски вели дека ако реши да ја врати коцката, парите нема да бидат проблем.

Поранешниот скопски градоначалник, Ристо Пенов, кој во 2004 година го заврши новиот плоштад, вели дека една од причините што коцката била извадена е што таа е ислужена, а и естетски не одговара за центар на град. Коцката, според него, датира од 40-тите години на минатиот век. Пенов се сомнева и дека се чуваат сите камени коцки, бидејќи во текот на годините голем дел од нив биле употребени за поплочување на повеќе локации низ градот.

„Плоштадот е оформен и нема потреба повторно да се прекопува и да се обезличува. Коцката не беше сменета од луксуз, туку зашто беше истрошена. Дел од старите коцки се вметнати во новиот лик на плоштадот, а оставен е простор да се извадат делови од гранитните коцки и да се додадат и нови линии ако биде потребно. Сепак, сметам дека нема потреба целосно да се менува ликот на центарот на градот“, вели Пенов.

Доколку се подготвува и нов концепт на уредување на централното подрачје, ново осветление и друга урбана опрема која ќе одговара на новата околина, ќе бидат потребни и нови подземни инсталации. Тоа ќе значи повеќе пари, а и копање на плоштадот, кое сигурно ќе трае долго.

Старата коцка или барем она што останало од неа се чува во магацин на „Улици и патишта“. Се' уште е помешана со песок и земја, како што била извадена од плоштадот. Од она што е исчистено, 20 проценти е искршено и неупотребливо. Дури 2.000 кубици, од вкупно 10.000 извадени од плоштадот и од улицата „Македонија“ се искористени за поплочување патеки во Зоолошката градина, за дополнување улици на кои се' уште има коцка, изградба на скверови и триаголници на раскрсници. Сепак, и во Градот Скопје и во „Улици и патишта“ тврдат дека доколку се реши, ќе има доволно коцка за повторно поплочување на плоштадот, независно што тој сега е со поголема површина од првобитниот.