Скопје 2014

Општина Центар реши да му ги прекрие гениталиите на митолошкиот јунак бидеќи голем број женски невладини организации реагирале дека не доли-кува среде парк, во центар на град, да стои гол маж
фото: Филип Поповски

Подземна сообраќајница која ќе почнува од катната гаража до „Беко“ ќе поминува поминува покрај штабот на ВМРО-ДПМНЕ апотоа ќе продолжува до објектот на „Технометал-Вардар“ на улица Македонија
фото: Филип Поповски

Во скратена постапка и на секои три месеци, на овој начин се носат измените во деталниот урбанистички план за Мал ринг, коментираат аналитичарите. Последните измени со кои е предвидена триесетметарска статуа на Мајка Тереза на плоштадот Македонија, уште два сплава на Вардар, со што нивниот број се искачи на шест, подземна сообраќајница која ќе завршува кај седиштето на владејачката партија ВМРО-ДПМНЕ и уште неколку административни згради покрај реката се ставени на јавен увид на граѓаните на oпштина Центар. На јавната презентација на планот присуствувале претставници на државните институции. Бројот на граѓаните, пак, како што информираат од Урбаната заедница Мирче Ацев, коишто дошле да погледнат на кој начин ќе се развива нивната општина е многу мал. Од нив добиле само две забелешки, едната се однесува на измените за Мал ринг, а втората за Голем ринг, детален урбанистички план кој исто така е во процедура на изменување. Критиките на граѓаните се чуваат во тајност.

Од oпштина Центар велат дека пред планот да се најде на седница на Советот не можат да изнесуваат детали за неговата содржина, бидејќи, како што потенцираат, тој може и да не биде прифатен од страна на советниците.

„Кога планот ќе се најде на седница на Советот, на неа ќе присуствуваат и планерите кои работат на неговите измени и кои најкомпетентно ќе ги презентираат измените. До тогаш не можеме да откриеме повеќе особености поврзани со планот“, вели Јовица Ацковски, портпарол на општина Центар.

Измените и дополнувањата на деталниот урбанистички план за Мал ринг го изработија ИНПУМА, Институт за урбанизам, сообраќај и екологија.

Ниту советниците не се запознаени со измените во планот за Мал Ринг. Благородна Крстевска-Мојсовска, советник на СДСМ од општина Центар вели дека процедурата за повторно менување на планот за Мал ринг е нетранспарентна.

„Скратената постапка значи дека ние планот ќе го добиеме како готов на самата седница. Какви забелешки ќе имаме ќе знаеме дури откако ќе го видиме планот и откако ќе добиеме објаснување за потребата и начинот на кој се вршат измените кои се предвидени во него“, вели Мојсовска.

Центарот на „фејс лифтинг“ на секои три месеци

Стручната јавност ја изгуби трагата на сите промени кои се предведени во центарот на градот поради честото менување на деталниот урбанистички план. Секоја измена на плановите треба да помине низ една сериозна анализа и евалуација на просторот, смета професорката по урбанизам, Јасмина Силјановска од Архитектонскиот факултет во Скопје.

„Со молскавична брзина се менуваат деталните урбанистички планови и притоа се прекршуваат и процедурите во кои еден ваков план треба да биде донесен. Реакција сигурно ќе има, но, за жал, тогаш ќе биде предоцна“, коментира професорката Силјановска.

Последната предлог-измена е деветта по ред за четири години. Во јануари 2012 година исто така беше направен „фејс лифтинг“ на центарот по оној во декември минатата година. ДУП за Мал ринг два пати бил менуван и во текот на 2010 и 2009 година.