Мал Ринг

Урбанистички нокаут за „Рингот“

Пет нови катни гаражи поврзани со понирачки сообраќајници, два трговски центра до зградата на Филхармонија и Македо-нскиот народен театар, нова ротонда - тркалезна зграда од државен интерес на Кејот на реката Вардар, уште неколку нови понирачки сообраќајници и триесетина нови маркички за споменици се измените и дополнувањата на детаљниот урбанистички план „Мал ринг“. Овој план вчера имаше јавна презентација, а го опфаќа најатрактивниот и најскапиот дел од градот - плоштадот Македонија и неговата околина.Мирослав Грчев, поранешен градоначалник на Општина Центар, автор на планот „Мал ринг“ и професор на Архитектонскиот факултет вели дека измените се инфантилни и со себе носат еден психопатолошки зафат кој му се нуди на народот само тогаш кога планерите немаат идеја што да прават со просторот.

- Секоја футуристичка идеја, која чини многу, ама многу пари, а притоа е потребен само еден зафат за да се реши метежот, како што е посочено во предлогот за нов „Мал ринг“, зборува дека станува збор за дилетантска глупост - вели Грчев. Тој дополни дека идејата за подземна сообраќајница е стара од 2002 година, а досега нема ниту еден знак дека нешто ќе се сработи. Измените и воопшто упропастениот план со преначичканост зборуваат дека најавата за катни гаражи и понирачки улици се илузија како може да се реши овој проблем. Планерите само фантазираат за планови што се апсолутно невозможни за реализација - вели Грчев. Во измените и дополнувањата, Градската куќа веќе нема да биде во состав на елитен хотел, туку во неа ќе се отворат канцеларии што ќе може да ги користат и локалната и централна власт, велат проектантите.Планерите од ИМПУМА, проектантска куќа што традиционално работи со општината Центар, на шега поради новите измени планот го нарекле „план на катните гаражи“, оти од Центар предвиделе изградба на дури пет грандиозни објекти од по девет ката.

- Најмалата катна гаража е предвидена до хотелот „Холидеј ин“. Таа ќе биде и најмодерна, зашто станува збор за т.н. машинско паркирање. Таму со помош на подвижни ленти и компјутери ќе се паркираат автомобили како „риби - сардини,“ односно една до друга. Предвидена е изградба и на катна гаража кај поранешно Беко, со капацитет од 883 возила. Зградата ќе биде висока 21 метар или приземје и седум ката. Две катни гаражи се предвидени и кај МЕПСО и телекомот, а ќе бидат високи до 29 метри, и уште една - кај старата Автобуска станица, со капацитет од 450 возила, во висина од 29 метри. Со овој план се предвидени многу катни гаражи за да се олесни сообраќаниот метеж во центарот на градот. Се предвидува и реконструкција на подземниот паркинг на МНТ, кој не е во добра состојба. Платото пред театарот ќе остане исто, но обновено, а долниот кат ќе има најверојатно две нивоа за паркирање. Поради новоизградените проекти и прегустиот сообраќај, предвидени се и неколку нови траси на т.н. понирачки или подземни сообраќајници. Нова сообраќајница ќе се гради од десната страна на стоковната куќа „Мост“, која ќе води до паркинзите кај новопроектираната зграда на Уставниот суд и МНТ, вели проектанката Силвана Вановска од ИНПУМА.

Според планот, долж Кејот на реката Вардар, каде што сега се распослани бамбус- гарнитурите на кафулињата, општината предвидела дваесетина места за споменици. Популарно, меѓу проектантите тие обележувања се викаат „флеки“, а стануваат маркички за споменици откако советниците од општината ќе ги усвојат детаљните урбанистички планови. На јавната презентација, која беше закажана во Месната заедница „Мирче Ацев“, поминаа одвај два-тројца заинтересирани граѓани. Тие главно немаа забелешки за измените на планот, но изјавија дека поучени од досегашните случувања, се сомневаат оти воопшто нема да се изгради ниту една катна гаража и ниту една подземна сообраќајница.

- Кога го гледам планот, немам забелешки речиси идиличен. Но, ако ги земам предвид сите маркички што се вметнати мижечки, тешко дека во катните гаражи ќе се паркираат автомобили. Тоа ќе бидат дуќани. За подземни сообраќајници, треба прво да се направи подземен катастар. Ќе го посочам само примерот со зградата „Тифани“. Сите велат дека тоа е нелегален објект, а никој не го урива. Општината го толерира тоа, што чини многу пари само да ја смени трасата на подземната сообраќајница, која првично беше планирана токму под „Тифани“. Ова е само една од смешните работи на нашето живеење - вели пензионерката Милица Ефтимова.